रोकिएका कामदार कोरिया पठाउने वातावरण बन्दै, एक जनालाई ४ लाखसम्म खर्च लाग्ने

रोकिएका कामदार कोरिया पठाउने वातावरण बन्दै, एक जनालाई ४ लाखसम्म खर्च लाग्ने

A+ A A-

सरकारले दक्षिण कोरिया कामदार पठाउन सिधा उडानका लागि एयरलाइन्सको वोलपत्र आह्वान गरेको छ । वैदेशिक रोजगार विभागले दुई साताअघि कोरिया जाने कामदारको कोरोना बीमा गर्ने कम्पनीको छनोट गरेको थियो ।

कोरोनाका कारण दुई वर्षयता कोरियाको रोजगारी ठप्प छ । २०७६ फागुनको पहिलो सातादेखि नै ईपीएस प्रणालीमार्फत नेपाली श्रमिक कोरिया जान पाएका छैनन् । नियमित भाषा परीक्षा पास गरेर ‘लेबर कन्ट्रयाक्ट’ आइसकेका करिब ५ हजार र कोरियाबाट प्रतिबद्ध कामदारका रूपमा फर्किएका ३ हजार श्रमिक प्रक्रिया पुगे पनि रोकिएको ईपीएस कोरिया शाखाले जानकारी दिएको छ । कोरोनाका कारण कोरियन भाषा उत्तीर्ण गरेका करिब १२ हजार कामदार रोकिएको शाखाले जनाएको छ ।

दक्षिण कोरियाले नेपालबाट लैजाने कामदारको कोभिड बीमा अनिवार्य हुनुपर्ने, सिधा हवाई उडान हुनुपर्ने र १४ दिन होटल क्वारेन्टाइन बसेको खर्च कामदार स्वयंले व्यहोर्नुपर्ने सर्त राखेको विभागले जनाएको छ । कोरियाले राखेको सर्तअनुसार कामदार पठाउनका लागि वातावरण बन्दै गएको विभागले जानकारी दिएको छ । ईपीएस शाखाका अनुसार यी सर्त अनिवार्यजस्तै हुन् ।

कोरियाले राखेको सर्तअनुसार अजोड, प्रिमियर, शिखर, एनएलजी, प्रभु र आईएमई इन्स्योरेन्स कम्पनी छनोटमा परेको विभागले जनाएको छ । यी कम्पनीले कोरिया जाने कामदारको ५ हजार अमेरिकी डलरसम्मको कोरोना बीमा गर्नुपर्ने छ ।

कोरियाको अर्को सर्तअनुसार विभागले सिधा उडान भर्ने एयरलाइन्सको बोलपत्र आह्वान गरिसकेको छ । अर्को साता बोलपत्रअनुसार एयरलाइन्सको छनोट गर्ने विभागले जानकारी दिएको छ ।

कोरिया जाने कामदारको खर्च

कोरिया जानका लागि ५ हजार अमेरिकी डलरसम्मको कोरोना बीमा गर्नुपर्ने भएको छ । जसका लागि कामदारले ३ सय अमेरिकी डलर (३६ हजार) खर्च गर्नुपर्ने हुन्छ ।

यस्तै, कोरियामा पुगेर १४ दिन क्वारिन्टिन बस्नुपर्ने र त्यसको खर्च कामदार स्वयंले व्यहोर्नु पर्छ । क्वारिन्टिन बसेको १ हजार ५ सय अमेरिकी डलर (१ लाख ९० हजार) खर्च कामदारले नै गर्नुपर्छ । यो खर्च नेपालमै तिरेर जानुपर्छ । क्वारिन्टिनपछि एक पटक कोरोना परिक्षण गराउनु पर्छ ।

यसैगरी, सीधा उडानमार्फत कोरिया जाँदा प्रतिकामदार ७ सय अमेरिकी डलर (करिब ८७ हजार रुपैयाँ) कामदारले तिर्नुपर्छ । विगतमा ट्रान्जिट हुँदै जाँदा करिब ३ सय डलर (करिब ३७ हजार रुपैयाँ) मात्र हवाई खर्च हुन्थ्यो ।

बीमा, क्वारिन्टिन खर्च र हवाई टिकटबाहेक कोरिया जाने कामदारले ८० हजार रुपैयाँ नेपाल सरकारलाई बुझाउनुपर्ने व्यवस्था कायमै छ । कोरियाले राखेको नयाँ सर्तअनुसार रोजगारीमा जाँदा कम्तिमा ४ लाखसम्म खर्च हुने विभागको अनुमान छ ।

कोरोना महामारी फैलिएपछि रोकिएका करिब १२ हजार कामदार कोरिया पठाउन पहल भइरहेको वैदेशिक रोजगार विभागका महानिर्देशक कृष्णप्रसाद दवाडीले जानकारी दिए ।

कोरियाले राखेको सर्तअनुसार कामदार पठाउदा खर्च बढ्ने दवाडीले बताए । ‘कोरिया सरकारले राखेको सर्तअनुसार कोरियन भाषा उत्तीर्ण गरेका कामदार रोजगारमा जान इच्छुक भएका छन् । सोहीअनुसार विभागले तयारी गरेको छ,’ उनले भने, ‘दुई वर्षदेखि रोकिएको कोरियाको रोजगारी खुल्ने वातावरण बनेको छ । विभागले सक्दो प्रयास गरिरहेको छ ।’ कोरोनाका कारण अस्तव्यस्त वैदेशिक रोजगारी लयमा फर्किन समय लाग्ने उनको भनाइ छ ।

कोरियाले नेपाल सरकारसँग सन् २००८ मा श्रम सम्झौता गरेर कामदार लैजान थालेको थियो । ईपीएस कोरियन भाषा उत्तीर्ण गरेका ६५ हजार कामदार रोजगारीका लागि कोरिया पुगेको विभागको तथ्यांक छ ।

कोरिया जाने कामदारको मासिक करिब २ लाखसम्म कमाउँछन् । कोरियाले नेपालबाहेक कम्बोडिया, म्यानमार, बंगलादेश, चीन, भियतना र लाओसलगायत १६ वटा देशबाट ईपीएस प्रणालीमार्फत कामदार लिँदै आएको छ । कोरोना महामारीमा पनि नेपालबाहेकका देशबाट कामदार आपूर्ति गरिरहेको छ ।

प्रकाशित मिति: आइतबार, भदौ ६, २०७८ १०:०९