भरत गुरुङ हत्या प्रकरण: गणबाट हतियार चोरेको ढकालले स्वीकारे

A+ A A-

सेनाका हुद्दा भरत गुरुङ हत्या प्रकरणमा प्रयोग गरिएको एसएमजी हतियार हत्या आरोपित सैनिक जवान गंगाधर ढकालले भरतपुरको कालीबहादुर गणबाट चोरी गरेको पुष्टि भएको छ ।

चितवनमा गत साउन ७ गते गुरुङको हत्या भएको थियो। अभियुक्त ढकालले २०७५ सालमा कालीबहादुर गणबाट हतियार चोरेको चितवन जिल्ला अदालतमा बयान दिने क्रममा खुलाएका हुन् ।

महेन्द्र दल गण काठमाडौंमा कार्यरत हुँदा छुट्टीमा घरमा आएको मौकामा हतियार चोरेको उनले बताएका छन् । जाडोको महिनामा छुट्टीमा घर बिदामा आएको समयमा उनले हतियार चोर्ने योजना बनाएका थिए । करिब दुई वर्ष सो ब्यारेकमा काम गरेका ढकाल त्यहाँको वस्तुस्थितीबारे जानकार थिए ।

यसरी चोरी भयो हतियार

ढकालले हतियार आफैँले चोरी गरेको अदालतमा बयान दिएका छन् । तीन वर्षअघि ढकाल हतियार चोरी गर्नकै लागि भरतपुर चितवनको ब्यारेकको चौबिसकोठीतिरको तारबाट रातको १० बजेतिर छिरेका थिए ।

तर ब्यारेकमा आवतजावत देखेपछि उनी करिब २ घण्टाजति झाडीमा लुकेर बसे । करिब रातको १२ बजेपछि डयुटीमा सेनाहरू अगाडि ढोकामा बसेको समयमा पछाडिको झ्यालबाट हतियार राखेको ठाउँमा सो हतियार चोरी गरेका हुन् ।

ढकालले हतियार चोरी गरेर घरको टौवामुनि लुकाएर राखेका थिए । उनले बेलाबखत हतियार राख्‍ने स्थान परिवर्तन गर्ने गरेको समेत बताएका छन् । उनले चोरी गरेको हतियारबारे घरम कसैलाई थाहा नदिएको समेत बयानमा उल्लेख गरेका छन् ।

भरत गुरुङको हत्यापछि प्रहरीले ढकालको घरमा लुकाइ राखेको अवस्थामा ७८ राउन्ड र चितवनको टाँढीबाट ७ राउन्ड गोली बरामद गरेको थियो ।

ढकालको बयानले सैनिकको अनुसन्धानमा गम्भीर प्रश्न

हतियार ढकालले चोरी गरेको खुलासा भएसँगै सोही हतियार चोरी अभियोगमा कैद सजाय खेपिरहेका कालीबहादुर गणका अमल्दार पदका दुई सैनिक निर्दोष पुष्टि हुने आधार भेटिएको छ ।

ढकालले चोरेर लुकाएको हतियार सैनिक अमल्दार लवकुमार गुरुङ र सरोज तामाङले चोरेको बयानबाट प्रमाणित गरिएको थियो । यो घटनामा दुवैजनालाई कोर्ट मार्सलबाट दोषी ठहर गरी सजाय सुनाएको थियो ।

सैनिक अदालतले गुरुङलाई १० वर्ष र तामाङलाई ७ वर्ष कैद सजाय तोकी २०७५ चैत्र १८ बाट कैद गणना हुने गरी २०७६ वैशाख ६ मा जिल्ला कारागारमा कैद सजाय भुक्तानिका लागी चलान गरेको थियो । दुबैजना अहिले भरतपुर कारागारमा कैद सजाय खेपिरहेका छन्।

चोरी गरिएको भनेको हतियार एउटै भएको यकिन अङ्कित भएको नम्बर ९ एमएनकेआर १००७९२ र वट नं ख २५ बाट गरिएको थियो । जिल्ला प्रहरी कार्यालय चितवनका प्रवक्ता डीएसपी सूर्य थापाले हतियारको नम्बरको आधारमा हराएको र भेटिएको एसएमजी एउटै भएको पुष्टि भएको बताए । चोर्ने एउटा सजाय अर्केले खेपिरहँदा यतिबेला सैनिकको न्यायिक अनुसन्धान प्रक्रियामा प्रश्न उठेको छ ।

यसअघि उदयपुर चौदण्डीगढी नगरपालिका- ९ का पवन गुरुङ र उदयपुरकै त्रियुगा नगरपालिका- ४ की तारा तामाङ पक्राउ परेका थिए । तर, २०७६ पुस २० मा चितवन जिल्ला अदालतले तारा र पवन दुवैलाई सफाइ दिएको थियो । सोही निर्णयलाई उच्च अदालत हेटौँडाको फैसलाले १० चैत २०७७ मा सदर गरेको थियो ।