माधव नेपालले पार्टी विभाजन गरेर गल्ती गर्नुभयो : ठाकुर गैरे (भिडियो वार्ता)

A+ A A-

नेकपा एमालेका नेता ठाकुर गैरेले आफू पार्टी विभाजनको पक्षमा नरहेको बताएका छन् । माधव कुमार नेपाल नेतृत्वले नेकपा एमाले समाजवादी पार्टी दर्ताका निवदेन दिएर गल्ती गरेको नेता गैरेले बताए ।

शिलापत्रसँगको कुराकानीमा नेता गैरेले भने, ‘पार्टीको अन्तरसंघर्षलाई विभाजनमा पुर्‍याएर माधव नेपालले गल्ती गर्नुभएको छ ।’

कुराकानीका क्रममा उनले थपे, ‘विवाद समाधानका लागि गठित कार्यदलले तयार पारेको १०बुँदे सहमतिकै आधारमा एकताको प्रयास हुँदै थियो, तर विभाजनसम्मै उहाँहरू पुग्नु भयो जुन दुखद छ ।’

तपाईंहरूले माधव नेपाललाई उचालेर धोका दिनुभयो नि भन्ने प्रश्नमा गैरेले तत्कालका लागि त्यस्तो देखिए पनि दीर्घकालीन राजनीतिमा आफूहरूको अडान सही साबित हुने बताए ।

केपी ओलीले कम्युनिस्ट पार्टी सिध्याए, ओली स्वेच्छारी भए, विधि पद्धति मानेन भनेर आफूहरूले विगतमा भने पनि अर्को पार्टी बनाउने कुरामा माधव नेपाललाई साथ दिन नसकेको उनले स्वीकारे ।

पार्टी विभाजनका लागि कुनै राजनीतिक र वैचारिक कारण नभएको र एमाले विभाजित हुँदा हिजो पनि बेठीक भएकाले अहिले पनि बेठीक भएको उनको तर्क छ । अझै पनि एकताको सम्भावना भएकाले आफूहरूको समूहले वार्ताका लागि पहल गर्ने नेता गैरेले बताए ।

माओवादीसहितको एकता टिकाउन नसक्नुमा एमाले अध्यक्ष ओली दोषी भए पनि एमाले विभाजन गर्न पर्ने कुनै कारण नरहेको पनि उनको भनाइ छ ।

एमाले नेता ठाकुर गैरेसँग शिलापत्रका लागि प्रदीप बस्नेतले गरेको भिडियो वार्ता :