किन छोड्दैछन् विश्वास पात्रहरूले नै भीम रावलको साथ ?

A+ A A-

सुदूरपश्चिम प्रदेशसभाका अधिकांश सदस्यहरूले पार्टी विभाजनसँगै एमाले उपाध्यक्ष भीम रावलको साथ छोड्न थालेका छन् ।

पार्टी विवादमा नेता रावलको भूमिकाका कारण उनको साथ छोड्नेहरूको संख्या बढेको हो । हालै रावलको साथ छोड्नेमा उनका अत्यन्त निकट मानिने दीर्घ सोडारी रहेका छन् । सामाजिक विकास मन्त्री हुँदा केपी शर्मा ओलीबाट बर्खास्तीमा परेका सोडारी अहिले सुदूरपश्चिम सरकारमा भौतिक पूर्वाधार मन्त्री छन् ।

सोडारी नेकपा एमाले कैलाली (माधव समूह) का अध्यक्ष समेत हुन् । उनको अध्यक्षतामा बसेको एमाले कैलालीको पदाधिकारी बैठकले माधव नेपालका पक्षमा उभिने निर्णय गरेको हो । अधिकांश प्रदेशसभा सदस्य नेकपा एमाले समाजवादीमा आबद्ध हुने स्रोतको दाबी छ ।

सोडारीले आफूसँग आधा दर्जन सांसद रहेको दाबी गर्छन् । अमर साउद र बलबहादुर सोडारी उनीनिकट मानिन्छन् । सुदूरपश्चिम प्रदेश सरकारकी आन्तरिक मामिला तथा कानुनमन्त्री पूर्णा जोशी पनि नेपाल नेतृत्वको नेकपा एमाले समाजवादीको पक्षमा उभिएकी छन् । मन्त्री जोशीले आफू अतिवाद र प्रतिगमनको विपक्षमा रहेको बताइन् ।

पूर्व वन, वातावरण, उद्योग तथा पर्यटनमन्त्री माया भट्टले पनि रावलको साथ छोडेकी छन् । भट्टले पनि नेपाललाई साथ दिएकी हुन् । त्यस्तै नेकपा एमाले कञ्चनपुरमा अध्यक्ष रहेका तारा लामा तामाङ, प्रदेशसभा सदस्य कुलवीर चौधरी र सुशीला बुढाथोकीले पनि नेपाल पक्षमा नै रहेको बताएका छन् ।

आर्थिक मामिलामन्त्री प्रकाश शाह भने नेता रावलको पक्षमा देखिएका छन् । मन्त्री शाहले पार्टी विभाजन गर्ने सैद्धान्तिक र वैचारिक आधार नभएको र आफू पार्टी विभाजनको पक्षमा नरहेको बताए । उनले पार्टी विभाजन हुँदा लोकतन्त्र नै कमजोर हुने भएकाले आफू पार्टी एकताका पक्षमा रहेको स्पष्ट पारे ।

प्रदेशसभाका सभापति हर्कबहादुर कुँवर (गोविन्द) पनि रावलको पक्षमा लागेका देखिँदैनन् । सरकारमा राज्यमन्त्री रहेकी अर्चना गहतराजले रावललाई साथ दिएको स्रोतले बतायो । कुँवले आफू प्रतिगमन र अतिवादको विपक्षमा भएको शिलापत्रलाई बताए ।

'हिजो हामीले प्रतिगमन र अतिवादविरूद्ध संघर्ष गर्‍यौं,' कुँवरले भने, 'प्रतिगमन त सच्चियो, अतिवाद सच्चिएको छैन ।' प्रदेशसभा सदस्य प्रकाश रावल पनि भीमनिकट मानिन्छन् । तर, यतिबेला उनी तटस्थ छन् । चुनकुमारी चौधरीलाई रावलले राज्यमन्त्री बनाएका हुन् । यद्यपि मन्त्री पद जोगिने शर्तमा मात्र उनी रावलको पक्षमा जाने देखिन्छ ।

एमालेका २५ सांसद रहेको सुदूरपश्चिम प्रदेशसभामा भीम रावलका पक्षमा १८ सांसद थिए । सात जना भने ओली पक्षमा उभिएका छन् । पार्टी विभाजन हुँदा उनीहरूले एक ढिक्का भएर रावललाई साथ दिने दाबी गरिएको थियो । तर, पार्टी विवादमा रावलको कदमका कारण विश्वास पात्रहरूले उनको साथ छोडेका छन् ।

प्रकाशित मिति: बिहीबार, भदौ ३, २०७८ १५:३५