लुम्बिनीमा माधव नेपालको नयाँ पार्टी कमजोर, जिल्लामा नेताहरू पर्ख र हेरको नीतिमा

लुम्बिनीमा माधव नेपालको नयाँ पार्टी कमजोर, जिल्लामा नेताहरू पर्ख र हेरको नीतिमा

A+ A A-

विगतमा नेकपा एमाले सग्लो हुँदा नै कमजोर अवस्थामा रहेको माधवकुमार नेपाल पक्ष नयाँ दल दर्ता गरेपछि लुम्बिनीमा झनै कमजोर बनेका छन् ।

एमालेमा रहँदा पनि माधव पक्षका भनेर खुलेका लुम्बिनीका कतिपय नेताहरूले अन्तिम समयमा साथ दिएनन् भने कतिपय पार्टी विभाजनको पक्षमा नरहेको भन्दै माधव नेपालको साथ छाड्दा नेपाल लुम्बिनी प्रदेशमा कमजोर बनेका हुन् ।

माधव नेपाल पक्षका नेताहरू अध्यक्ष केपी शर्मा ओली प्रति रूष्ट भएपनि पार्टी विभाजनको विपक्षमा थिए । त्यही कारण नेता नेपाललाई धेरैले साथ छाडेका बताइरहेका छन् । लुम्बिनीबाट नेपाल समूहका युवराज ज्ञवाली, घनश्याम भुसाल, गोकर्ण बिष्ट, ठाकुर गैरे, सोमप्रसाद पाण्डेल लगायतले अन्तिम समयमा साथ दिएनन् । यी नेताहरूको कारण पनि नेपाल सो क्षेत्रमा कमजोर बनेका हुन् ।

नयाँ बनेको पार्टीमा लुम्बिनीबाट वेदुराम भुसाल, रामकुमारी झाँक्री, डा. विजय पौडेल, मेटमणि चौधरीका नेताहरू रहेका छन् । तर यी मध्ये धेरैको जनाधार राम्रो छैन । माधव नेपाललाई साथ दिएका वेदुराम भुसाल, रामकुमारी झाँक्री, डा. विजय पौडेलको बलियो जनाधार छैन । दाङका नेता मेटमणि चौधरीको अरूको तुलनामा केही जनाधार देखिएको छ ।

अन्तिम समयमा माधव नेपालको साथ छाडेका नेताहरू भने जनाधार बलियो छ । गुल्मीका गोकर्ण विष्ट, पाल्पाका सोमप्रसाद पाण्डे जिल्लामा राम्रो जनाधार बनेको छ ।

केन्द्रीय नेताहरू मात्र होईन लुम्बिनी प्रदेश सभामा पनि माधव नेपाल पक्षको उपस्थिती अब ‘निल’ हुने भएको छ । माधव नेपाल पक्ष मानिने कपिलवस्तु क्षेत्र नं. १ (क) बाट निर्वाचित सांसद विष्णु पन्थी र पाल्पाबाट समानुपातिक सांसद बनेकी रमा घर्तीले पनि माधव नेपालको साथ छाडेपछि माधव नेपाल समूह प्रदेश सभामा ‘निल’ भएको हो ।

जिल्लामा पर्ख र हेरको अवस्था

केपी ओलीसँग रूष्ट भएकै कारण ४८ वर्षसँगै सहकार्य गरेर नयाँ दल एमाले समाजवादी दर्ता गराएका माधव नेपाल समूह जिल्ला तह देखि स्थानीय तह सबैतिर कमजोर छ । अहिले माधवकुमार नेपाल पक्ष मानिने कतिपयले पार्टी विभाजनको पक्षमा नभएको बताइरहेका छन् भने कतिपयले ‘विद्रोह’ले सफलता पाउने बताएका छन् ।

दाङ जिल्लाबाट माधव नेपाल समूहको जिल्ला अध्यक्षको जिम्मेवारीमा रहेका टिकाराम खड्काले नयाँ पार्टी बनाउने कुरामा सहमत नरहेको बताएका छन् । खड्का नेपाल समूहमा नलाग्ने संकेत गरेपनि तत्कालिन एमाले दाङका उपसचिव सुरामणि बेल्बासे र पूर्व संविधान सभा सदस्य अनारकली मिया भने नेपालको नयाँ पार्टी जाने भएका छन् ।

रूपन्देहीमा नेपाल समूहको अध्यक्ष रहेका राजु गुरूङले समाजवादीमा दृढ भएर लाग्ले बताए । घनश्याम भुसाल नै नेपाल समूहमा नभएपनि यहाँका कार्यकर्ताहरू भने नेपाललाई साथ दिने बताएका छन् । नेपाल समूहका नेता सिद्धिचरण भट्टराईले समाजवादीमा कुन नेता छ या छैन भन्दा पनि विद्रोहको सफलता भएको बताए । उनले समूह छाडेका कतिपय साथीहरू पछि पार्टीमा आउने समेत बताए ।

गुल्मीमा भने माधव नेपाल समूहका जिल्ला नेताहरू भने मौन छन् । गोकर्ण बिष्टले अन्तिम समयमा नेपाललाई साथ नदिएकाले जिल्लाका नेताहरू अहिले पनि के गर्ने स्पष्ट भइसकेका छैनन् । तत्कालिन एमालेको माधव नेपाल समूहका अध्यक्ष रोमनाथ सापकोटा अहिले मौन छन् । त्यसबाहेक जिल्लाका नेताहरू गणेश श्रीपाली, हिरा एसी, लक्ष्मण पराजुलीले पनि मुख खोलेका छैनन् ।

अर्घाखाँचीमा भने माओवादी नेता टोपबहादुर रायमाझी कित्ताकाट गर्दै ओली समूहमा आएपछि जिल्लामा एमाले अझ बढी सशक्त भएको छ । जिल्लाबाट तीनपटक निर्वाचित भएका रायमाझी ओली खेमामा नेकपा विभाजनकै बेला गएका हुन् । अर्घाखाँचीमा नेपाल समूह नगन्य छ । रामबहादुर चौहान तत्कालिन एमालेको माधव नेपाल समूहबाट अध्यक्ष हुन् । उनी सहित सिद्धी भुसाल लगायत नयाँ पार्टीमा जाने बुझिएको छ ।

रोल्पामा भने एमाले कमजोर छ । त्यहाँ माओवादीको पकड रहेको मानिन्छ । माओवादी नेता वर्षमान पुन र पूर्व सभामुख ओनसरी घर्ती र लुम्बिनी प्रदेशका मुख्यमन्त्री कुलप्रसाद केसी रोल्पाकै हुन् ।

बाँकेमा माधव पक्ष नेपालका नेताहरू भने पर्ख र हेरको अवस्थामा छन् । माधव नेपाल पक्षका अध्यक्ष अशोक कोइरालाले जिल्लामा छलफल हुन बाँकी भएकाले छलफल पछि मात्र निचोडमा पुग्ने बताए । बाँकेबाट गोपाल कोइराला, रत्न खत्री लगाएतका नेताहरू सो समूहमा छन् । केन्द्रीय सदस्यमा संविधान सभा सदस्य दलबहादुर सुनार परिसकेका छन् । ‘एक/दुई दिनमा केही सिनारीयो आउँछ । त्यसपछि हामी अघि बढ्छौ । सम्भवत: हामी नेपाल कै पार्टीमा जान्छौ,’ उनले भने ।

बर्दियाबाट समाजवादी पार्टीको केन्द्रीय सदस्यमा कोशिल्ला सिंहको नाम छ । बर्दियाका नेताहरू पनि अहिले कता जाने स्पष्ट भइसकेका छैनन् । ‘नेताहरू युवराज ज्ञवाली, ठाकुर गैह्रे आएर संगठन बनायौ । तर उहाँहरू अहिले मौन हुनुहुन्छ । हामी छलफलमा छौं । उहाँहरू मौन भएपनि हामी सम्भवत: नेपालकै पार्टीमा जान्छौ ।’ माधव समूहका नेता प्रेम पोखरेलले भने ।

जिल्ला कमिटिको बैठक राखेर यसबारे थप अघि बढ्ने उनको भनाई छ । प्युठानमा माधव नेपाल समूहका अझै खुलेका छैनन् । तत्कालिन एमालेको माधव समूहका जिल्ला अध्यक्ष भोजविक्रम बुढामगर भएपनि उनले मुख खोलेका छैनन् ।

प्रकाशित मिति: बिहीबार, भदौ ३, २०७८ १४:४२