श्रम र कृषि मन्त्री नहुँदा मन्त्रालयका महत्त्वपूर्ण योजना प्रभावित

A+ A A-

प्रधानमन्त्री शेरबहादुर देउवा गठबन्धनको सरकार गठन भएको महिना दिन भयो । तर, उनले सरकारलाई पूर्णता दिनसकेका छैनन् ।

सत्ता सहकार्य गरिरहेका दलहरूले मन्त्रीको नाम पठाउन ढिलो गर्नाले सरकार विस्तार कार्य प्रभावित भएको हो । तर यसको प्रत्यक्ष असर मन्त्रालयहरूको दैनिक कार्य सञ्चालनमा परिरहेको छ । श्रम, रोजगार तथा सामाजिक सुरक्षा मन्त्रालय तीन महिनायता मन्त्रीविहीन हुँदा योजना र काम प्रभावित भएको छ ।

मन्त्री नभएकाले मन्त्रालयको महत्त्वपूर्ण निर्णय रोकिएको श्रम मन्त्रालयका कर्मचारीहरू बताउँछन् । यस्तै आर्थिक वर्षका योजनामा छलफल गर्न समेत समस्या भएको र वैदेशिक रोजगारीमा काम पठाउन विषयमा समस्या र अन्य योजनामा काम नै प्रभावित हुने गरेको ती कर्मचारीको भनाइ छ ।

कोरोनाका कारण विदेशमा समस्या परेका कामदारको उद्धार, रोजगारदाता मुलुकसँगको छलफल रोकिएको, वैदेशिक रोजगारीमा जाने कतिपय देशका कामदारका निर्णय गर्न समेत समस्या परिरहेको मन्त्रालयका कर्मचारी बताउँछन् । यस्तै सामाजिक सुरक्षा कोष र प्रधानमन्त्री रोजगार कार्यक्रमजस्ता महत्त्वपूर्ण विषय समेत श्रम मन्त्री नहुँदा ओझेलमा परेको उनीहरूको भनाई छ ।

सरकारले अहिले इजरायलमा कामदार पठाउनको लागि आवेदन माग गरेको छ । जसमा साढे ९ हजारले आवेदन दिएका छन् । उनीहरूको परीक्षा सञ्चालनमा श्रम मन्त्री नहुँदा केही प्रभाव पर्ने वैदेशिक रोजगार विभागले जनाएको छ । यस्तै, दक्षिण कोरिया कामदार पठाउने विषयमा श्रम मन्त्री हुँदा निर्णय गर्न समस्या भैरहेको छ ।

नेतृत्व हुँदा केही योजनामा तत्काल छलफल गरेर अगाडि बढ्न सजिलो हुने श्रम, रोजगार तथा सामाजिक सुरक्षा मन्त्रालयका प्रवक्ता दिपक काफ्ले बताउँछन् । सबै काम भएर अन्तिम निर्णयका लागि रोकिएका योजना कार्यान्वयनमा प्रभाव परिरहेको उनको भनाई छ ।

श्रमजस्तै कृषि तथा पशुपन्छी विकास मन्त्रालय समेत यतिबेला मन्त्रीविहीन छ । मन्त्रालय मन्त्रीविहीन भएपछि महत्त्वपूर्ण काम रोकिएको कर्मचारीहरूले बताइरहेका छन् ।

अनुदानको मल खरिद, मल वितरणमा समस्या, कृषि कोल्डस्टोर निर्माण, माटो परीक्षण, चौपायाका योजना, कृषि बजारीकरण, बिउबिजन वितरण, चालु आर्थिक वर्षका कृषिका महत्त्वपूर्ण योजना, यो वर्षको बजेट विनियोजनमा छलफल र कुषि अनुदानजस्ता महत्त्वपूर्ण काम नै प्रभावित भएको कृषि मन्त्रालयका कर्मचारीले जानकारी दिए ।

कृषिमन्त्री नहुँदा प्रधानमन्त्री आधुनिक कृषि परियोजनाका काम समेत प्रभावित भएको मन्त्रालयले जनाएको छ । प्रशासनिक काम भैरहेपनि केही महत्त्वपूर्ण योजना र काम गर्ने नेतृत्व नहुँदा समस्या हुने कृषि तथा पशुपन्छी मन्त्रालयका सूचना अधिकारी डा. प्रदीपचन्द्र भट्टराईले जानकारी दिए ।

प्रकाशित मिति: बुधबार, भदौ २, २०७८ १९:४४