अफगानिस्तानबाट फर्किएका नेपाली भन्छन्- हामी त बाँच्यौँ, बाँकी नेपालीहरूको जीवन रक्षा होस्

अफगानिस्तानबाट फर्किएका नेपाली भन्छन्- हामी त बाँच्यौँ, बाँकी नेपालीहरूको जीवन रक्षा होस्

अफगानिस्तानबाट कुवेत हुँदै काठमाडौं आइपुगेका नेपाली त्रिभुवन अन्तर्राष्ट्रिय विमानस्थलमा । तस्वीर : सुशील श्रेष्ठ/शिलापत्र

A+ A A-

तालिबानले धमाधम अफगानिस्तानका मुख्य शहर कब्जा गर्दा थियो । राजधानी काबुल पनि कब्जा गरेपछि विदेशी नागरिकलाई देश छोड्न सूचना जारी गर्‍यो । विभिन्न देशले चार्टर्ड उडानमार्फत नागरिक उद्दार गर्दा नेपालीहरूको उद्दारमा ढिलाइ भइरहेको थियो ।

अफगानिस्तानका विभिन्न कूटनीतिक नियोगमा अधिकांश नेपालीहरू सुरक्षागार्डका रूपमा कार्यरत छन् । अमेरिकी नियोगमा विगत दुई वर्षदेखि कार्यरत थिए मोरङका छिङरु लिम्बु । उद्दारमा ढिलाइ हुँदा जीवनप्रतिको भरोसा टुटिसकेको थियो । अमेरिकाले अफगानिस्तानबाट उद्दार गर्दा उनी पनि स्वेदश फर्किन सफल भए ।

आइतबार दोहाबाट नेपाल आउने १ सय २७ जनामध्ये उनी पनि थिए । स्वदेश फर्किएपछि छिङरुले त्रिभुवन विमानस्थलमा भने, 'आँखैअघि धेरैको बम हमलामा ज्यान गएको थियो । तालिबानले अफगानिस्तान कब्जा गरेपछि धेरै डर लागेको थियो । अब त ज्यान जोगियो,' स्वदेश टेकेसँगै उनको उत्साह थियो ।

त्यही टोलीमा थिए चितवनका सन्तोष अधिकारी । तालिबानले काबुल कब्जा गरेसँगै स्थानीय बासिन्दा नै त्रसित भएको देख्दा आफू पनि निकै डराएको अनुभव उनी सुनाउँछन् । स्थानीयहरू अल्ला-हु-अकबरको आर्तनाद गरिरहँदा आफूले पनि जीवन भगवान भरोसमा छोडेको उनी बताउँछन् । आफू कार्यरत नियोगले तालिबानले आक्रमण गर्न सक्छ सुरक्षित हुनु भन्ने सन्देश दिएको थियो । त्यो सन्देश दिएको दिनदेखिको एक सातासम्म काबुल सञ्चारविच्छेदझैँ थियो ।

‘एक सातायता काबुलमा राम्रो गरी नेटवर्क चलेको थिएन । जसका कारण कहाँ के हुँदै छ भने कसैलाई थाहा भएन । कति बेला काबुलमा बमको वर्षात् हुन्छ भन्ने त्रास मात्र थियो,' उनले भने, ‘अमेरिकी र क्यानडाको नियोग भएका आसपासमा तालिबान लडाकुले आफ्ना जासुस खटाएका थिए । तालिबानले कतिबेला बम पड्काएर मार्छन् भन्ने ठूलो त्रास थियो । जीवन भगवान भरोसामै थियो ।'

तालिबानले हमला गर्न सक्ने सर्कुलर प्राप्त भएसँगै सचेत र भयवित हुँदै बसेको अधिकारी बताउँछन् । त्रासकाबीच आफ्नो मुलुक टेक्न पाएकोमा उनी खुशी छन् । 'काबुलमा ठूलो कालबाट बाँचेर आइयो । आफ्नो भूमि टेक्न पाउँदै धेरै खुशी छु,' उनले खुशी साटे ।

भोजपुरका दीपक राई अमेरिकी नियोगमा पानी सप्लाइ गर्ने काम गर्थे । नेपाल फर्किएसँगै उनले यद्धग्रस्त देशमा नजाने प्रण गरेका छन् । 'अफगानिस्तानबाट नयाँ जीवन पाएर फर्किएँ । अब युद्धग्रस्त देशमा काम गर्न जादिनँ । हामी त स्वदेश फर्किन सफल भयौँ । थुप्रै नेपाली दाजुभाइहरू हुनुहुन्छ उहाँहरूको पनि जीवन रक्षा होस्,' उनले भने ।

अफगानिस्तानबाट अमेरिकाले उद्धार गरेका १ सय २७ जना नेपाली कामदार मंगलबार बिहान स्वदेश फर्किएका छन् । परराष्ट्र मन्त्रालयका अनुसार कुवेतबाट जजिरा एयरवेजको चार्टर्ड जहाजमार्फत उनीहरूलाई काठमाडौं ल्याइएको हो । अमेरिकाले आफ्नो खर्चमा उद्दार उडानमार्फत नेपाली कामदारलाई स्वदेश पठाएको हो ।

अफगानिस्तानमा करिब १ हजार ५ सय नेपाली विभिन्न देशको नियोगमा काम गर्दै आएका छन् । उनीहरूलाई सम्बन्धित देशकै नियोगहरूले उद्धार गरेर नेपाल पठाउन थालेका छन् । अफगानिस्तान करिब १५ हजार नेपाली रहेको तथ्याङ्क छ ।