अफगानिस्तानमा युद्ध : आफ्ना नागरिकको उद्धार गर्न अमेरिकाले सेना पठायो, १५ सय नेपालीबारे सरकार माैन

अफगानिस्तानमा युद्ध : आफ्ना नागरिकको उद्धार गर्न अमेरिकाले सेना पठायो, १५ सय नेपालीबारे सरकार माैन

A+ A A-

गत सातादेखि अफगानिस्तानमा सरकार र तालिबान लडाकुबीच भीषण युद्व भइरहेको छ । अघिल्लो महिना अमेरिकी सेनाले अफगानिस्तान छाडेपछि उत्तरी गढ मजर-इ-सरिफमा तालिबान लडाकुले आक्रमण सुरु गरेका थिए ।

आइतबार जलालबादलाई भीडन्तबिना नै तालिबानले आफ्नो नियन्त्रणमा लिएको जनाइएको छ । याेसँगै अफगानिस्तानका ३४ मध्ये २३ वटा प्रान्तीय राजधानी तालिबानकाे कब्जामा छन् ।

अफगानिस्तानमा द्वन्द बढ्दै गएपछि पश्चिममा देशहरूले आफ्ना नागरिक फिर्ता लैजान थालेका छन् । नेपालले चाहिँ यो विषयमा अहिलेसम्म आधिकारिक निर्णय गरेको छैन ।

के भन्छ परराष्ट्र मन्त्रालय ?

तालकुदार नियोगहरूसँग त्यहाँ कार्यरत नेपाली श्रमिकहरूकाे उद्धारका लागि सहयोग मागिरहेको परराष्ट्र मन्त्रालयले जनाएको छ । मन्त्रालयकी प्रवक्ता सेवा लम्सालका अनुसार अहिले अफगानिस्तानमा करिब १ हजार ५ सय नेपाली कामदार रहेको अनुमान छ । तर, रोजगारीका लागि श्रम स्वीकृति लिएर अफगानिस्तान जानेकाे संख्या ४ हजारभन्दा धैरै रहेकाे वैदेशिक रोजगार विभागकाे तथ्यांकले देखाउँछ । १५ सयबाहेकका नेपालीबारे सरकारी रेकर्ड छैन ।

जलालबाद र राजधानी काबुलमा धेरै नेपाली कार्यरत छन् । काबुललाई तालिबान लडाकुले घेरा हालिरहेको बीबीसीले उल्लेख गरेकाे छ । काबुलभन्दा ११ किलोमिटर आसपास लडाकु आइपुगेकाे बताइन्छ ।

अफगानिस्तानको राजधानीमै धेरै नेपाली काम गरिरहेका भारतस्थित नेपाली दूतावासले जनाएको छ । अफगानिस्तानका ७ वटा शहरमा नेपाली कामदारहरू कार्यरत रहेकाे दूतावासको अनुमान छ ।

अफगानिस्तानमा कायरत करिब ७० प्रतिशत नेपाली कामदारलाई रोजगारदाताले नै फिर्ता लैजाने र सुरक्षित राख्ने भनिसकेको नयाँ दिल्लीस्थित नेपाली दूतावासका उपप्रमुख (डीसीएम) रामप्रसाद सुवेदीले बताए । दिल्लीस्थित दूतावासका अनुसार काबुलमा रहेका नेपाली अहिलेसम्म सुरक्षित नै छन् ।

यद्यपि, भाेलिका दिनमा जे पनि हुनसक्ने भएकाले सरकारले त्यहाँ रहेका नेपालीहरूको उद्धार गर्न छलफल गरिरहेको मन्त्रालयकी प्रवक्ता लम्सालले बताइन् । अफगानिस्तानमा तनाव चुलिँदै गएकाले अमेरिकाले आफ्ना नागरिकको उद्धारका लागि ५ हजार सैनिक पठाउन लागेकाे बीबीसीले लेखेकाे छ ।

उद्धारमा ढिलाइ नगर्न विज्ञकाे अपिल

सरकारले अफगानिस्तानमा रहेका नेपालीहरूकाे उद्धारमा चासो नदेखाएको परराष्ट्रविज्ञ डा.राजन भट्टराईकाे आरोप छ ।

अरू देशले त्यहाँबाट आफ्ना नागरिककाे उद्धार गरिरहँदा नेपाल सरकारले चासो नदेखाउनु बिडम्वनापूर्ण भएकाे उनले बताए । ‘सरकारकाे कम्जोरीका कारण अफगानिस्तानमा नेपालीहरूले कुनै क्षति बेहाेर्न नपराेस् । कति बेला के हुन्छ थाहा छैन । त्यसैले सरकारले तत्काल उद्धार गर्नुपर्छ’, उनले शिलापत्रसँग भने, 'रोजीरोटीका लागि पुगेका नेपालीको अवस्था कस्तो छ भनेर सरकारले चासो दिएको छैन । समस्या सिर्जना हुनुअघि समाधान गरियाेस् ।’

२०७३ सालमा राजधानी काबुलको ग्रीन जोनमा कार्यरत १२ नेपालीको बम हमलामा ज्यान गएपछि सरकारले केही समय अफगानिस्तान रोजगारीमा कामदार पठाउन कडाइ गरेको थियो । हाल भारत र युएई हुँदै नेपाली कामदार अफगानिस्तान रोजगारीमा पुग्ने गरेका छन् ।

याे पनि..

वैदेशिक रोजगारीको कालो दिन : १६ वर्षमा आंतककारी आक्रमणबाट २७ नेपाली मारिए

अफगानिस्तानको राजधानी काबुलबाहेकका सबै प्रमुख सहर तालिबानद्वारा कब्जा

प्रकाशित मिति: आइतबार, साउन ३१, २०७८ १४:१६