कर्णालीमा यात्रुसँग मनपरी भाडा असुल्दै यातायात व्यवसायी

A+ A A-

कोरोनाको जोखिम रहेको भन्दै कर्णालीका यातायात व्यवसायीहरूले यात्रुसँग मनपरी भाडा असुल्न थालेका छन् । कर्णाली राजमार्गमा चल्ने सवारीसाधनले यात्रुसँग मनपरी भाडा असुल्न थालेका हुन् ।

कालिकोटबाट सुर्खेतको भाडादर ८ सय रुपैयाँ भए पनि सुर्खेत आउन एक जनाको १ हजार ५ सयदेखि ३ हजार रुपैयाँसम्म भाडा असुल्ने गरेका छन् ।

कालिकोटबाट सुर्खेत आउन कालिकोट नरहरिनाथ गाउँपालिका–९ का अनिल रावलले गाडी नम्बर १०५० ले दुई जनाको भाडा ३ हजार रुपैयाँ असुल गरेको बताए । ‘२८ प्रतिशत बढेको भाडा जोड्दा जिपले १ हजार २५ रुपैयाँ लिनुपर्ने हो । तर यातायात व्यवसायीले मनपरी भाडा लिइरहेका छन्,’ उनले भने ।

ट्राफिक कार्यालय कालिकोटका दलवहादुर बसेलले अहिलेसम्म प्रहरी कार्यालयमा कुनै गुनासो नआएको र सोधपुछ गर्दा पनि यात्रुले ठीकै भाडा लिएको बताउने गरेको बताए ।

कर्णाली करिडोरको ३० किलोमिटर यात्रा गर्दा ८ सय भाडा

कर्णाली करिडोरअन्तर्गत कालिकोटको जितेगडादेखि घाटपारी चौरसम्म जम्मा ३० किलोमिटर सडकखण्डमा लकडाउनअघिसम्म ३ सय रुपैयाँ भाडादर कायम रहे पनि यातायात व्यवसायीले यस वर्ष ८ सय रुपैयाँ भाडा पुर्‍याएका छन् ।

सेनाले निर्माण गरेर गत ३१ असारमा सडक विभागलाई हस्तान्तरण गरिएको कर्णाली करिडोरमा यात्रुबाहक गाडीले मात्र नभएर मालबाहक मिनी टाटा र ट्याक्टरले पनि मनपरी ढुवानी भाडा असुल्ने गरेको पचालझरना व्यापारी रामबहादुर बोगटीले बताए ।

यातायात व्यवसायीले मनपरी भाडा उठाएको भन्ने गुनासो सुनिए पनि आधिकारिक जानकारी नआएको कालिकोटका प्रमुख जिल्ला अधिकारी कृष्णप्रसाद आचार्यले बताए । ‘अनौपचारिक रुपमा भाडा बढी लिएको गुनासो आउने गरेको छ,’ उनले भने, ‘औपचारिक जानकारी आए कारबाही गर्छाैं ।’

मुगुमा ७ किलोमिटरको ५ सय भाडा

मुगुमा पनि यातायात व्यवसायीहरूले चर्को भाडा असुल्ने गरेको गुनासो स्थानीयले गर्ने गरेका छन् । गमगढीदेखि बालै हुँदै पिनासम्मको ७ किलोमिटर सडकमा चल्ने जिपले ५ सय रुपैयाँ भाडा लिने गरेको सोरु गाउँपालिका–६ का रामबहादुर शाहीले जानकारी दिए ।

त्यस्तै, गमगढीदेखि रारा विमानस्थलसम्मको दूरी ९ किलोमिटरमा यात्रुबाट ५ सय रुपैयाँ भाडा असुलिरहेका स्थानीयको भनाइ छ । त्यस्तै गमगढीदेखि तारापानीसम्मको २१ किलोमिटर सडकमा पनि प्रतिव्यक्ति ५ सय रुपैयाँ भाडा लिने गरिएको छ ।

प्रकाशित मिति: शुक्रबार, साउन २९, २०७८ १५:५३