सूर्य चिह्नबाट निर्वाचित अजय शाही : मन्त्रीकै लागि विपक्षी गठबन्धनमा जोडिए

सूर्य चिह्नबाट निर्वाचित अजय शाही : मन्त्रीकै लागि विपक्षी गठबन्धनमा जोडिए

A+ A A-

नवलपरासी पश्चिम १ 'ख' बाट सूर्य चिह्न लिएर निर्वाचित लुम्बिनी प्रदेशका सांसद अजय शाही अन्ततः विपक्षी गठबन्धनमा लागेर बिनाविभागीय मन्त्री बनेका छन् । उनलाई आज प्रदेश प्रमुख अमिक शेरचनले पद तथा गोपनीयताको शपथ खुवाएका छन् ।

सूर्य चिह्न लिएर स्वतन्त्र सांसदका रूपमा निर्वाचित भएका शाही प्रदेशसभामा एमाले सांसदको हैसियतमा उपस्थित हुने गरेका थिए । तर, अन्तिम समयमा एमाले त्याग्दै उनले विपक्षी गठबन्धनलाई रोजे, त्यो पनि मन्त्री पदको बार्गेनिङसहित ।

त्यसो त उनी तत्कालीन मुख्यमन्त्री शंकर पोखरेल नेतृत्वको सरकारमा पनि मन्त्रीको बार्गेनिङ गरेर गएका थिए । तर, पोखरेलले उनको कुरा सुनेनन् । त्यही कारण पोखरेलले १९ वैशाखमा राजीनामा दिएर नयाँ सरकारका लागि दाबी प्रस्तुत गर्दैगर्दा एमालेबाट अलग भएको उनले बताएका थिए । उनले दुर्गानारायण पाण्डे र धर्मलालबहादुर श्रीवास्तवसँगै एमालेबाट अलग भएको घोषणा गरेका थिए ।

शाही र श्रीवास्तवले एमालेबाट अलगिएको घोषणा गरेपछि तत्कालीन केपी ओली नेतृत्वको सरकारका स्वास्थ्य तथा जनसंख्या मन्त्री रहेका हृदेयस त्रिपाठीमार्फत फकाएर श्रीवास्तवलाई तत्काल मन्त्री बनाउने र शाहीलाई अनुकूल समयमा मन्त्री बनाउने आश्वासन एमालेले दिएको थियो ।

तर, अन्तिम समयसम्म पनि पोखरेलले मन्त्री नबनाएपछि चिडिएका शाही बुधबार प्रदेशसभामा एमालेले बैठक बहिष्कार गर्दा सत्तापक्षका रोहमा थिए । बिनाविभागीय मन्त्री बनेका उनमाथि एमालेले के कारबाही गर्छ त्यो हेर्न बाँकी नै छ । एक पटक एमाले दल रोजिसकेकाले शाहीमाथि कारबाही हुने एमाले प्रमुख सचेतक भूमिश्वर ढकालले बताए ।

शाही एमालेका सबै संसदीय दलको बैठकमा सहभागी भएको र आफ्नो नामको पछाडिको रोहमा एमाले सांसद लेख्दै आएको ढकालले बताए । प्रदेशसभा सचिवालयले प्रकाशन गरेको पुस्तकमा समेत शाहीको दलीय हैसियत नेकपा एमाले उल्लेख छ । यद्यपि १९ वैशाखपछिको बैठकमा कैफियतमा उनले स्वतन्त्र सांसदमा हस्ताक्षर गरेको एमालेका एक नेताले बताए ।

प्रकाशित मिति: बिहीबार, साउन २८, २०७८ २०:४२