लुम्बिनीमा कृषि अनुदानमा बेतिथि : दुरुपयोग भएको रकम फर्काउन छानबिन समितिको निर्देशन

लुम्बिनीमा कृषि अनुदानमा बेतिथि : दुरुपयोग भएको रकम फर्काउन छानबिन समितिको निर्देशन

A+ A A-

मृतकका नाममा समेत अनुदान रकम सिफारिस गरेको समाचार सार्वजनिक भएपछि लुम्बिनी सांस्कृतिक नगरपालिकामा गठित छानबिन समितिले नगरपालिकाबाट अनुदान रकम दुरुपयोग भएको ठहर गरेको छ । नगरपालिकाकी शिक्षा शाखा अधिकृत लक्ष्मी पराजुलीको संयोजकत्वमा गठित ६ सदस्यीय छानबिन समितिले दुरुपयोग गरिएको रकम फिर्ता गर्न नगरपालिकालाई निर्देशनसमेत दिएको छ ।

छानबिन समितिको प्रतिवेदनअनुसार नगरपालिकाले तीन दिनभित्र रकम फिर्ता गर्न निर्देशन दिएको प्रमुख प्रशासकीय अधिकृत भूपेन्द्र पाण्डेयले बताए । नगरपालिका- २, लम्तिहवा र भरथापुरका किसानलाई आएको अनुदान रकम एउटै लालपुर्जा भएका एकै परिवारका दुई जना र खेती नै नगरेका गैरकिसानलाई दिइएको भन्दै शिलापत्र डट्कममा समाचार प्रकाशित भएको थियो ।

छानबिन समितिले अशोक लोध, राजु मल्लाह, मुरलीधर लोध र साधुसरन मल्लाहले अनुदानवापत पाएको रकम फिर्ता गर्नुपर्ने निष्कर्ष निकालेको थियो । उनीहरू चारै जनालाई पत्र काटेर तीन दिनभित्र नगरपालिकाको बैंक खातामा रकम जम्मा गर्न निर्देशन दिइएको छ । वडाअध्यक्ष रमेशप्रसाद निषाद र कृषि शाखाका कर्मचारी करिश्मा क्षेत्री र अमिन चौधरीलाई सचेत गराइएको प्रशासकीय अधिकृत पाण्डेयले बताए ।

कोरोना विशेष कृषि कार्यक्रम अन्तर्गत ‘एक स्थानीय तह, एक उत्पादन कार्यक्रम’ मार्फत लुम्बिनी प्रदेश सरकारले नगरपालिकालाई १७ लाख रुपैयाँ बजेट उपलब्ध गराएको थियो । मापदण्डमा कम्तिमा तीन कठ्ठामा तरकारी खेती गर्ने र एउटै लालपुर्जाबाट एक जना किसानलाई मात्रै २० हजार रुपैयाँका दरले अनुदान दिने प्रावधान राखिएको थियो । जसअनुसार नगरपालिकाले २०७७ चैत १२ मा सूचना प्रकाशित गरी अनुदान माग गरेका ६९ जना किसानलाई अनुदान रकम बाँडेको थियो ।

नगरपालिकाका अनुसार छानबिनका क्रममा राजु मल्लाहले मृतक आफ्ना बुवाको नाममा सिफारिस गराएर सबै कागजी प्रक्रिया पूरा गरी आफ्ना नाममा भुक्तानी लिएको, साधुसरन मल्लाहले ठूलो बुवा सोमनाथ मल्लाहको नाममा रहेको जग्गाधनी पुर्जा प्रयोग गरी आफ्नो नाममा सिफारिस गराएर अनुदान रकम खाएको, मुरलीधर लोध र परशुराम लोध बाबु छोरा भएको र एउटै पुर्जाबाट अनुदान लिएको पाइएको थियो ।

यस्तै, रामबकश लोध र अशोक लोध बाबुछोरा भएको र उनीहरू बाबुछोराले नै एउटै पुर्जाबाट अनुदान रकम लिएको छानबिन समितिले जनाएको छ । अनुदान दुरुपयोग गर्ने चारै जनाले तरकारी खेती गरेको भन्दै २०–२० हजार रुपैयाँ पाएका थिए ।

सम्बन्धित समाचार