प्रि–स्याट प्रकरण: तीन जना बर्खास्त, दुई एसपी र दुई डीएसपीसहित ११ जनामाथि विभागीय कारबाही

प्रि–स्याट प्रकरण: तीन जना बर्खास्त, दुई एसपी र दुई डीएसपीसहित ११ जनामाथि विभागीय कारबाही

A+ A A-

संयुक्त राष्ट्रसंघको शान्ति मिसन (यूनएन मिसन) मा जान प्रहरीले लिने आन्तरिक परीक्षा (प्रि–स्याट) को प्रश्नपत्र ‘लिक’ भएको बारे छानबिन गर्न बनेको समितिको प्रतिवेदन प्रहरी प्रमुख (आईजीपी) शैलेश थापा क्षेत्रीले बुझेका छन् ।

आईजीपी सचिवालयकै प्रहरी नायब महानिरीक्षक (डीआईजी) वसन्त लामा नेतृत्वको समितिले छानबिन सकेर बुधबार क्षेत्रीलाई प्रतिवेदन बुझाएको प्रहरी प्रवक्ता एसएसपी वसन्तबहादुर कुँवरले जानकारी दिए ।

प्रतिवेदन ५ सय ५० पृष्ठको छ ।

समितिले प्रहरी प्रधान कार्यालयको यूनएन शाखामा कार्यरत तीन जना प्रहरी नायब निरीक्षक जनकबहादुर थापा, कार्यालय सहयोगी सुरेश बमला र प्रहरीको साइबर ब्युरोमा कार्यरत हवल्दार कुमार शाहलाई जागिरबाट हटाउन सिफारिस गरेको छ ।

उनीहरूबाहेक ११ जना प्रहरीलाई कसुरअनुसारको कारबाहीको सिफारिस भएको छ । ११ जनामध्ये यूएन शाखाकै प्रमुख प्रहरी उपरीक्षक (एसपी) अनुपम शमशेर जबरा, परीक्षा सञ्चालको जिम्मा पाएका अर्का एसपी वेद विष्ट र प्रहरी निरीक्षक ईश्वरी भण्डारीलाई प्रश्नपत्रको सुरक्षा गर्न नसकेको कसुर तथा अन्य आठ जना प्रहरी अधिकारीलाई विभागीय कारबाहीको सिफारिस गरिएको छ ।

आठ जनामध्ये दुई जना रुपेश खड्का र सुगन्ध श्रेष्ठ डीएसपी हुन् । खड्का प्रहरी तालिम केन्द्र महाराजगञ्ज अपराध अनुसन्धान विद्यालयमा कार्यरत छन् भने श्रेष्ठ ट्राफिक महाशाखामा कार्यरत छन् । कारबाहीमा पर्ने अन्य प्रहरीमा प्रहरी निरीक्षक दिलीप क्षत्री, सईहरू केदार तिमल्सिना, सुनील भण्डारी, केशव कार्की, असई अशोक कार्की र प्रहरी जवान सुनिता नेपाललाई विभागीय कारबाहीको सिफरिस गरिएको छ

प्रश्नपत्र एसपी जबराको टेबुलको घर्राबाट कार्यालय सहयोगी बमले चोरेर हवल्दार कुमार शाहमार्फत लिक गराएको पुष्टि भएको छ ।

प्रि–स्याट परीक्षा लिक भएको बारे पहिलो पटक शिलापत्रले समाचार प्रकाशित गरेको थियो । प्रहरी प्रधान कार्यालयले साउन १५ र १६ मा चार सेटको प्रश्न तयार गरेर सातवटै प्रहरी प्रदेश कार्यालय तथा प्रहरी प्रधान कार्यायमा परीक्षा सञ्चालन गरेको थियो । चारवटै सेटको प्रश्नपत्र लिक भएको समितिको निष्कर्ष छ ।

समितिले प्रश्नपत्र लिक भएको पुष्टि गरेसँगै प्रि–स्याट परीक्षा पुनः हुने भएको छ । १५ र १६ गते भएका सबै परीक्षा रद्द गरिएको र पुन: परीक्षा गरिने प्रवक्ता कुवँरले बताए ।

प्रकाशित मिति: बुधबार, साउन २७, २०७८ १२:२४