नझुक्किनुहोला यो कक्षाकोठामा वडा कार्यालय छ

A+ A A-

माथि तस्बिर देखिएको दृश्य वडा कार्यालयकाे हो । दुई वर्षअघि यो कोठामा विद्यार्थी हुन्थे ।

गाउँमा सिंहदरबार पुगेपछि ‘सिंहदरबार राख्ने ठाउँ’ भेटिएनछ । त्यसैले सप्तरीको महादेवा गाउँपालिका–५ स्थित भगवती राष्ट्रिय प्राथमिक विद्यालयको कक्षाकोठा वडा कार्यालय बन्यो । त्यसपछि विद्यार्थी कक्षाकोठाबाट आउट भए, अहिलेसम्म सडकमै ।

विगत एक वर्षदेखि यो सरकारी विद्यालयको कक्षाकोठामा वडा कार्यालय चल्दै छ, अर्काे सकरारी विद्यालयको कक्षाकोठमा स्वास्थ्य क्लिनिक ।

सोही गाँउपालिकाको वडा नम्रब ६ स्थित बजरंगवली आधारभूत विद्यालयको एउटा कक्षाकोठामा सहरी स्वास्थ्य क्लिनिक सञ्चालन हुँदै आएको छ । दुवै विद्यालयको कक्षाकोठामा रहेको डेस्कबेन्च झिकिएको छ । छेवैको कोठामा अटाइ नअटाइ राखिएका छन्, विद्यार्थी बस्ने बेन्च ।

जनप्रतिनिधिले नै कक्षाकोठा हडपेर बसेपछि शिक्षकले हट्नुहोस् भन्न सकेका छैनन् ।

‘निजी विद्यालयमा पढ्ने विद्यार्थीलाई कमिलाले मात्र टोके पनि अभिभावकले गुनासो गर्न आउँछन् तर यो सरकारी विद्यालयमा कोचाकोच गरेर विद्यार्थी पढाउनुपर्ने बाध्यता छ, जनप्रतिनिधिका डरले कोही बोल्दैनन्,’ प्राविका एक शिक्षक गुनासो गर्छ ।

बजरंगवली आधारभूत विद्यालयमा २ सय ७० र भगवती राप्राविमा १ सय ६० गरी कुल ४ सय ३० विद्यार्थी छन् । भगवती राष्ट्रिय प्राथमिक विद्यालयका प्रधानाध्यापक रामकृष्ण पण्डित र बजंरगवली आधारभूत विद्यालयका प्रधानाध्यापक कृष्णदेव मण्डल दुवै कक्षाकोठामा वडा कार्यालय र स्वास्थ्य क्लिनकका कारण पठनपाठनमा समस्या भएको बताउँछन् ।

वडा नम्रब ५ का वडाध्यक्ष मनोजप्रसाद मण्डल र वडा नम्बर ६ का वडाअध्यक्ष उमेश यादव भने भवन अभावमा तत्काल विद्यालयको कक्षाकोठा प्रयोग गरिएको बताउँछन् ।

शिक्षा समन्वय इकाइ समितिका प्रमुख फणीन्द्र खत्री विद्यालयको कक्षाकोठामा लामो समयदेखि वडा कार्यालय र स्वास्थ्य क्लिनिक सञ्चालन हुनु दुःखद भएकाे बताउँछन् । तर, उनी पनि यो कार्यविरुद्ध खुलेर बोल्न सकिरहेका छैनन् ।

जनप्रतिनिधिकै कारण विद्यालयको पठनपाठनमा असर परिरहे पनि शिक्षा कार्यालय र सरोकारवाला मात्र होइन, गाउँपालिका नेतृत्वसमेत समस्या समाधानको पहलमा जुटेका छैनन् ।

प्रकाशित मिति: सोमबार, जेठ २०, २०७६ ०२:५२