निजी अस्पताल सञ्चालकलाई लुम्बिनी प्रादेशिक अस्पतालको मेसु बनाउन मन्त्रिपरिषद‍्मा प्रस्ताव

निजी अस्पताल सञ्चालकलाई लुम्बिनी प्रादेशिक अस्पतालको मेसु बनाउन मन्त्रिपरिषद‍्मा प्रस्ताव

A+ A A-

लुम्बिनी प्रादेशिक अस्पताल बुटवलको प्रमुख मेडिकल सुपेरिटेण्डेन्ट (मेसु) मा निजी अस्पतालका सञ्चालकलाई ल्याउने प्रस्ताव मन्त्रिपरिषदमा पुगेको छ । हालका सुपरिटेण्डेन्ट डा. राजेन्द्र खनाललाई हटाएर अस्पतालमा कार्यरत डा. ईन्द्र ढकाललाई प्रमुख मेडिकल सुपेरिटेण्डेण्ट बनाउने प्रस्ताव प्रदेशको स्वास्थ्य तथा जनसंख्या मन्त्रालयले मुख्यमन्त्रीको कार्यालयमा लगेको हो ।

स्वास्थ्यमन्त्री भोजप्रसाद श्रेष्ठको प्रस्तावमा निजी अस्पतालका सञ्चालकसमेत रहेका हाडजोर्नाी विशेषज्ञ डा. ईन्द्र ढकाललाई लुम्बिनी प्रादेशिक अस्पतालको प्रमुख बनाउन मन्त्रिपरिषदमा प्रस्ताव लगिएको हो । मन्त्री श्रेष्ठ र एमाले प्रमुख सचेतक भूमिश्वर ढकालको योजनामा श्रवणपथमा रहेको साझा अस्पतालका सञ्चालक ढकाललाई सुपेरिटेण्डेन्टमा प्रस्ताव गरेको स्रोतको भनाइ छ ।

मंसिर २०७६ देखि तत्कालीन मेडिकल सुपेरिटेण्डेन्ट डा. कृष्ण खनालले अवकाश लिएपछि डा. राजेन्द्र खनाल अस्पतालमा प्रमुख भएका थिए । गएको २६ वैशाखमा मन्त्री पदको शपथ लिएदेखि नै श्रेष्ठले डा. राजेन्द्र खनाललाई हटाएर ढकाललाई मेडिकल सुपेरिटेण्डेन्ट बनाउन चाहन्थे तर परिस्थित अनुकूल नभएपछि पछि हटेका थिए ।

जीर्ण अवस्थामा रहेको अस्पतालको सुधार र चिकित्सक तथा कर्मचारीहरूको सेवा प्रवाहमा परिवर्तन ल्याउन जोखिम मोलेका खनाललाई अस्पतालको प्रमुख हटाउदा गलत सन्देश जान सक्ने देखेपछि पछि हटेका मन्त्री श्रेष्ठले पुनः गत बुधबार मन्त्रालयको प्रस्ताव मुख्यमन्त्री कार्यालय पठाएका हुन् । कोभिड महामारीको समयमा डा. खनालले अक्सिजन प्राप्त नगर्दा सरकारको आलोचना गरेका थिए ।

सरकारको आलोचना गरेको र स्वास्थ्य मन्त्रालयसँग समन्वय नगरी काम गरेको भन्दै उनलाई हटाउन लागिएको बताइएको छ । विभिन्न समयमा राजीनामा दिन दबाब दिए पनि डा. खनालले राजीनामा दिन आनकानी गरेपछि मन्त्रिपरिषद्को निर्णयबाट उनलाई हटाउन थालिएको स्रोतको भनाइछ ।