प्रदेश २ सरकारको भित्ते पत्रिका तालिम : ५ दिन तालिम, ८ लाख खर्च, दिइएन पूरा सूचना

प्रदेश २ सरकारको भित्ते पत्रिका तालिम : ५ दिन तालिम, ८ लाख खर्च, दिइएन पूरा सूचना

A+ A A-

प्रदेश २ को आन्तरिक मामिला तथा सञ्चार मन्त्रालयले गत आर्थिक वर्षको १७ असारदेखि २१ सम्म पाँचदिवसीय भित्ते पत्रिका लेखनसम्बन्धी तालिम सञ्चालन गर्‍यो । भित्ते पत्रिकासम्बन्धी तालिम खासगरी बालबालिकालाई दिइने तालिम हो ।

तर, यो तालिममा भने बालबालिकालाई प्राथमिकता नदिएको देखिएपछि सामाजिक सञ्जालमा व्यापक टिकाटिप्पणी भयो । अर्को, वर्षभरि नगरेर असार मसान्तको अन्तिमतिर बजेट मात्रै खर्च गर्ने उद्देश्यले तालिम सञ्चालन गरिएको भन्दै यसको पनि आलोचना भयो ।

त्यसैगरी, अर्को उठिरहेको विषय थियो, अनियमितताको । अनियमितताको विषयले चर्चा पाएपछि तालिमको हरहिसाब माग गर्दै युवाहरूको एउटा समूहले सूचनाको हकसम्बन्धी ऐन २०६४ को दफा ३ बमोजिम गत २४ असारमा मन्त्रालयमा निवेदन दिए । निवेदन दिनेहरूमा सिरहाका गुरुशरण सिंह (आभाष), महोत्तरीका अशोक कुमार यादव, सिरहाका शत्रुधन यादव र धनुषाका कुलदिप साह छन् ।

उनीहरूले निवेदनमार्फत कार्यक्रमको उद्देश्यसम्बन्धी जानकारी, कार्यक्रमको जम्मा बजेट र शीर्षकगत रूपमा खर्च विवरणको प्रमाणित प्रतिलिपि माग गरेका थिए । निवेदन दर्ता गराएपछि सूचना अधिकारी नाजो राम भगतले साउनको पहिलो साताभित्र विवरण उपलब्ध गराइदिने आश्वासन दिएका थिए । तर, मन्त्रालयले १७ साउनमा मात्रै सूचना उपलब्ध गराएको छ ।

सूचना माग गर्दै दिएको निवेदन ।

सूचना उपलब्ध गराइए पनि अधुरै सूचना दिइएको छ । निवेदकहरूले शीर्षकगत रूपमा खर्च विवरण माग गरेका थिए । तर, सूचनामा एकमुष्ट खर्च देखाइएको छ । मन्त्रालयले उपलब्ध गराएको सूचनामा कार्यक्रमको एकमुस्ट खर्च ८ लाख ३ सय ३ रुपैयाँ देखाइएको छ ।

सूचनामा विवरण नखुलाई प्रदेश खर्च मापदण्ड निर्देशिका, २०७७ अनुसारका शीर्षकमा खर्च भएको उल्लेख छ । तालिममा जम्मा सहभागी संख्या ४९ रहेको सूचनामा लेखिएको छ । यस हिसाबले एक जना सहभागीका लागि पाँच दिनमै १६ हजार ३ सय ३२ रुपैयाँ ७१ पैसा खर्च भएको देखिन्छ ।

पाँच दिनको कार्यक्रममा जम्मा ३४ वटा कक्षा सञ्चालन भएको र सोबापत प्रशिक्षकहरूलाई पारिश्रमिक उपलब्ध गराइएको सूचनामा जनाइएको छ । कार्यक्रममा सहभागी, प्रशिक्षक, कर्मचारीहरूलाई पाँच दिनसम्म बास, खाजा र खानाको व्यवस्था गरिएको पनि सूचनामा उल्लेख छ । यस्तै, सबै सहभागीहरूलाई आतेजाते खर्च दिइएको उल्लेख गरिएको छ ।

तर, आतेजातेबापत कति रुपैयाँ दिइयो भन्ने कुरा भने सूचनामा उल्लेख गरिएको छैन । यद्यपि, एक सहभागीका अनुसार, हरेक सहभागीलाई एक–एक हजारको दरले आतेजाते उपलब्ध गराइएको थियो भने एउटा–एउटा गरी ब्याग पनि दिइएको थियो ।

मन्त्रालयले उपलब्ध गराएको सूचना ।

कार्यक्रमको पहिलो दिन सूचनामा भनिएजति सहभागी भए पनि त्यसपछिका दिनमा भने सहभागीहरू क्रमशः घर फर्किंदा संख्या घट्दै गएको ती सहभागीले नाम उल्लेख नगर्ने सर्तमा बताए । ‘पहिलो दिन त्यति थियो होला,’ उनले भने, ‘तर, त्यसपछि हरेक दिन सहभागी घट्दै गयो ।’

कार्यक्रमको यत्तिको खर्च देखेर आफूलाई आश्चर्य लागेको उनले बताए । ‘त्यस्तो खासै सेवा सुविधा पनि थिएन,’ उनले भने, ‘सामान्य रूपमा तालिम सञ्चालन भयो । यत्तिको खर्च देखेर आश्चर्य लागेको छ ।’

मन्त्रालयले पूरा सूचना नदिँदा थप आशंका उब्चिएको सूचना माग गर्दै निवेदन दिएका सिरहाका आभाष बताउँछन् । ‘हामीले शीर्षकगत रूपमा खर्चको विवरण मागेका थियौँ,’ उनले भने, ‘तर, यसमा एकमुस्ट लेखिएको छ । यसले अनियमितताको थप आशंका उब्जाएको छ ।’

सूचना पारदर्शी रूपमा नदिएपछि उनीहरूले फेरि मन्त्रालयमा निवेदन दिने बताएका छन् । ‘सूचना अधुरै छ,’ निवेदन कुलदिपले भने, ‘हामी फेरि पनि सूचनाका लागि निवेदन दिन्छौँ ।’

प्रकाशित मिति: मंगलबार, साउन १९, २०७८ १६:१०