राति खोप लगाइरहेको ठाउँमा जब स्थानीय पुगे...

A+ A A-

धनुषाको मिथिला नगरपालिकाको ढल्केबरस्थित स्वास्थ्य चौकीमा शुक्रबार कोरोनाविरुद्धको खोप लगाइँदै थियो । त्यहाँ अमेरिकाले उपलब्ध गराएको जोन्सन एन्ड जोन्सन खोप लगाउने अभियान सञ्चालन गरिएको थियो ।

ढल्केबरका स्थानीय युवा राकेश सिंह खोप लगाउन शुक्रबार बिहान पौने ११ बजेतिर त्यहाँ पुगे । खोप लगाउन सयौँ त्यहाँ पुगेका थिए । स्वास्थ्यकर्मीले सबैको नागरिकता लिँदै लाइनमा लगाए । पालो आउनेहरूले खोप लगाउँदै गए । राकेशभन्दा पहिले आएकाहरूमध्ये केहीले खोप लगाए ।

राकेश तथा उनीभन्दा केही समय पहिला पुगेकाहरू खोपको प्रतिक्षामा कुरिरहे । खोप लगाएरै जाने निधो गरेका उनीहरूले कुर्दाकुर्दै बेलुकीको ७ बज्यो । ७ बजेपछि स्वास्थ्यकर्मीहरूले सबैलाई सूचना दिए- बाँकी रहेकाहरूलाई शनिबार बिहान खोप लगाउँछौँ, आजलाई खोप कार्यक्रम बन्द हुन्छ ।

यस्तो सूचना पाएपछि खोप लगाउने लाइनमा बसेकाहरू घर फर्किए । ‘दिनभरि खोप पाउने आशामा कुरिरहेँ,’ खोप लगाउन नपाएका सुरज साहले भने, ‘तर, बाँकी रहेकालाई भोलि लगाउने भनेर सूचना दिएपछि निराश भएर फर्किएँ ।’

खोप लगाउन बन्द भएको सूचना सुनाएको १ घण्टापछि फेरि त्यहाँ खोप लगाउन थालियो । सर्वसाधारणहरू गइसकेपछि केही सीमित पहुँचवाला तथा आसेपासेलाई कोठा बन्द गरेर खोप लगाउन थालिएको स्थानीयले थाहा पाए । राति खोप लगाइरहेको सुइको पाएपछि स्थानीय र सञ्चारकर्मीहरू त्यहाँ पुगे । त्यसपछि कर्मचारी र खोप लगाउनेहरूको भागाभाग भयो । स्वाथ्यकर्मी पनि खोप त्यतिकै छाडेर भागे । त्यहाँ एकछिन कर्मचारी र युवाहरूको एक समूहबीच विवाद पनि भयो ।

ढल्केबर स्वास्थ्य चौकीका इन्चार्ज रामप्रवोध साह भने आफू साँझ ७ बजे नै खोप कार्यक्रम स्थगित गरी बाहिर निस्किएको बताउँछन् । यो घटनाको जिम्मेवार खोप लगाउने स्वास्थ्यकर्मी नै रहेको उनको भनाइ छ ।

मिथिला नगरपालिकाका मेयर हरिनारायण महतोले आफू काठमाडौंमा रहेको र यसबारेमा जानकारी नभएको बताए । ‘मलाई यस विषयमा केही पनि जानकारी छैन,’ उनले भने, ‘म काठमाडौं छु ।’

धनुषाका निमित्त प्रमुख जिल्ला अधिकारी दीपक कुमार कर्णले पनि अनभिज्ञता प्रकट गरे । यसबारेमा बुझ्ने उनको भनाइ थियो । ‘सीडीओ साब बिदामा हुनुहुन्छ,’ उनले भने, ‘मलाई जानकारी छैन । बुझ्छु ।’

मिथिला नगरपालिकाका स्वास्थ्य शाखा संयोजक अशोक भण्डारीले नगरपालिकामा बिहीबार र शुक्रबार गरी दुईदिन खोप लगाउने कार्यक्रम तोकिएको जानकारी दिए ।

मानव अधिकारकर्मी विनोद महरा घटना दु:खद भएको बताउँछन् । ‘महामारीबाट बच्नका लागि राज्यले दिइरहेको खोप पाउने अधिकार सबै नागरिकको सामान हो,’ उनले भने, ‘यसरी खोपमा भेदभाव गरिनु दुःखद र निन्दनीय छ । यो मानव अधिकारको उल्लंघन हो ।’

प्रकाशित मिति: शनिबार, साउन १६, २०७८ १२:०१