अमिक शेरचनको कार्यभार ग्रहण : सरकारको राजनीतिक असंस्कार

A+ A A-

राष्ट्रपति विद्यादेवी भण्डारीबाट पद तथा गोपनीयताको शपथ लिएको दुई दिनपछि गौतमबुद्ध विमानस्थलहुँदै लुम्बिनी प्रदेशका नवनियुक्त प्रदेश प्रमुख अमिक शेरचन बुटवल पौने १२ बजेतिर आइपुगे ।

सवा ११ बजे प्रदेश प्रमुख शेरचन कार्यालयमा आइपुग्ने सूचना पाएसँगै उनी नआउँदै पत्रकारको घुइँचो थियो । नेता कार्यकर्ता पनि प्रदेश प्रमुख कार्यालयमा आइसकेका थिए ।

कडा सुरक्षाको बाबजुद प्रदेश कार्यालयमा आएका शेरचनलाई कार्यालयका सचिव, कर्मचारी र केही नेताहरूले फूल दिएर स्वागत गरे ।

कार्यालयका कर्मचारी लामबद्ध भएर नवनियुक्त प्रदेश प्रमुख शेरचनलाई स्वागत भइरहँदा लुम्बिनी प्रदेश सरकारका मुख्यमन्त्री शंकर पोखरेल मात्र होइन, उनको नेतृत्वको मन्त्रीमण्डलका कुनै पनि मन्त्री स्वागतमा देखिएनन् । फूल, अबिर र खादाबाट कर्मचारीले स्वागत गरेपछि पत्रकारहरूलाई हात हल्लाउँदै शेरचनले सेनाको सलामी खाए । अनि अमिक शेरचनले कार्यभार सम्हाले ।

राष्ट्रको उच्च ओहोदाका व्यक्तिमा सरकार पक्षको उपस्थित नहुँदा कार्यक्रम खल्लो भएको नेता कार्यकर्ताले गुनासो गर्दै थिए । ‘नयाँ नियुक्त भएर आउनुभएका शेरचनको स्वागतमा सरकारका प्रतिनिधि नआउँदा कार्यक्रम नै खल्लो भयो,’ उनीहरू भन्दै थिए ।

त्यसो त यसअघिका प्रदेश प्रमुख धर्मनाथ यादवको बिदाइ मुख्यमन्त्री पोखरेल स्वयम् उपस्थित थिए । यादव प्रदेश प्रमुख भएर आउँदा तत्कालीन नेकपाबाट आन्तरिक मामिला तथा कानुनमन्त्री बनेका कुलप्रसाद केसी स्वागतमा गएका थिए ।

मुख्यमन्त्री कार्यालयमा मुख्यमन्त्रीसहित सबै मन्त्रीहरू भए पनि १ सय मिटरनजिकैको प्रदेश प्रमुख कार्यालयमा नवनियुक्त प्रदेश प्रमुख शेरचनको स्वागतमा नजानुलाई अधिवक्ता महेन्द्र पाण्डे ‘राजनीतिमा संस्कार’ नभएको टिप्पणी गर्छन् । ‘उच्च ओहोदाका व्यक्ति नियुक्त भएर आउँदा त्यहाँ नेतृत्वको सहभागिता हुनुपर्थ्यो । तर, यहाँ पार्टी हेरियो । नेताहरूले राजनीतिक आस्था हेरे । यो शोभनीय भएन ।’

लुम्बिनी सरकारका पूर्वमन्त्री सुदर्शन बरालले सामान्य शिष्टाचारको हिसाबले पनि प्रदेश सरकारको उपस्थिति हुनुपर्ने भए पनि शिष्टाचार नै सरकारको नभएकाले प्रदेश प्रमुखको स्वागतमा नगएको हुन सक्ने बताए । लुम्बिनी प्रदेशसभामा प्रमुख विपक्षी नेपाली कांग्रेसका प्रमुख सचेतक फकरुद्दिन खानले राजनीतिक संस्कार सरकारले देखाउन नसकेको बताउँदै सरकारले दम्भ र अहंकार देखाउँदै प्रदेश प्रमुखको पदबहाली कार्यक्रम बहिष्कार गरेको बताए ।

लुम्बिनी सरकारका प्रवक्ता बैजनाथ चौधरीले आफूहरू बैठकमा भएकाले प्रदेश प्रमुखको स्वागतमा नगएको बताउँदै पदबहालीको औपचारिक जानकारीसमेत सरकारलाई नआएको बताए ।

प्रदेश प्रमुख कार्यालयका प्रवक्ता चिरन्जीवी पौडेलले प्रदेश सरकार, मुख्यमन्त्री तथा मन्त्रिपरिषद् कार्यालयमा बिहीबार नै कार्यक्रमको जानकारी दिएको र आज बिहान विमानस्थल जाने बेलामा पनि मुख्यमन्त्रीलाई जानकारी दिएको बताए ।

प्रकाशित मिति: शुक्रबार, साउन १५, २०७८ १९:३४