जसपाका तीन सांसदलाई निष्कासन गरेको पत्र लुम्बिनी प्रदेशसभा सचिवालयमा

A+ A A-

जनता समाजवादी पार्टी (जसपा)को आधिकारिक टुंगो लागेपछि कारबाहीमा परेमा जसपाका ३ सांसदलाई पार्टीले निष्कासन गरेको जानकारी लुम्बिनी प्रदेशसभा सचिवालयमा गराएको छ । मुख्यमन्त्री शंकर पोखरेल नेतृत्वको सरकारमा मन्त्री बनेका सन्तोष पाण्डेय, विजयबहादुर यादव र कल्पना पाण्डेलाई पार्टीबाट निष्काशन गरेको जानकारी सचिवालयलाई गराइएको जसपा संसदीय दलका नेता सहर्षराम यादवले बताए ।

३० जेठमा पार्टी ह्वीप विपरीत लागेको भन्दै स्पष्टीकरण सोधिएको र चित्तबुझ्दो जवाफ नदिएकाले उनीहरूलाई कारबाही गरिएको उनले बताए । निष्काशन गरेको पत्रमा राजनीतिक दलसम्बन्धी ऐन २०७३ को दफा २८ (१) ख को निर्देशन (ह्वीप) उल्लंघन गरेको र जसपा नेपालको अन्तरिम विधान ०७७ को धारा ४९ को १,२,३ र ७ विरुद्ध कार्य गरेका कारबाही गरेको उल्लेख छ ।

जसपाले ५ असारमा सरकारमा सहभागी भएका सांसद सुमन शर्मा रायमाझीसहित पाण्डे, यादव र कल्पना पाण्डेलाई स्पष्टीकरण सोधे पनि रायमाझीले आत्मआलोचनासहित पार्टीको नियम विपरीत नलाग्ने लिखित सम्झौता गरेकाले कारबाही नगरेको पत्रमा उल्लेख छ ।

कारबाहीमा परेका जसपाबाट मन्त्री बनेका पाण्डेले एउटा मान्छेलाई पटक– पटक एउटै कारबाही नहुने बताए । उनले आफूहरूलाई पार्टीबाट हटाइसकेकाले त्यहि पार्टीले फेरि कारबाही गर्न नमिल्ने बताए । उनले आफूहरू अब अदालतले बनाएको सांसद मात्रै रहेकोले पार्टीको कारबाही मान्य नहुने तर्क गरे ।

कारबाहीमा परेका अर्का मन्त्री यादव पनि कारबाही गरेर हटाएको पार्टीले फेरि हटाउँछु भन्नु हास्यास्पद रहेको बताए । उनले अदालतको फैसला नआउँदासम्म हामीहरू सांसद रहने दाबी गरे । आवश्यक पर्दा कानूनी रूपमा अगाडि बढ्ने बताए । कारबाहीमा परेकी अर्की मन्त्री कल्पना पाण्डे भने उपचारको क्रममा काठमाडौंमा रहेकी छन् ।