पुराना गीतलाई पुनर्जन्म दिँदै सर्जक, चर्चासँगै उत्तिकै व्यापार

A+ A A-

२० वर्षअगाडि गायक यश कुमारले 'तिम्रो मन बदलिएछ..' बोलको गीतलाई बजारमा ल्याए । मोनोलग शैलीमा तयार भएको यो गीतले क्यासेटको त्यो जमानामा तहल्का नै पिट्यो ।

प्रेमिकासँग प्रेम सम्बन्ध टुटेपछि यश कुमारले यो गीतको रचना गरेका थिए । आफ्नै मनको बहलाई शब्दमा उतारेर संगीत भरेका थिए, यशले ।

आफ्नो पीडा बोलेको गीत स्रोताले रुचाएको देख्दा यशलाई लाग्थ्यो- 'सायद, विछोडको पीडा सबैको उस्तै हुने रै'छ ।' यश संगीतसँगै फिल्ममा पनि व्यस्त बने । नयाँ-नयाँ गीत । नयाँ-नयाँ फिल्म । केही समय निकै व्यस्त बनेका यस अहिले भने केही फुर्सदिला छन् । नयाँ गीत-संगीतको काम गरेका छैनन् । फिल्मको काम पनि खासै छैन । फुर्सदको समय उनले आफ्नो पुरानो प्रेम र गीत सम्झिए । उनले सोचे, 'यसलाई डिजिटलाइज गर्नुपर्‍यो ।'

यश भन्छन्, 'अहिले धेरै कुरा डिजिटलाइज भइसकेको छ । मैले पनि पुरानो गीतलाई नयाँ रूप दिने सोच बनाएँ । केही नयाँ बाजा थपेर गीतलाई रि-रेकर्ड गर्ने रहर लाग्यो । पहिला भिडियो थिएन, भिडियो पनि बनाउन मन लाग्यो ।'

यशले गायनमा मिलन नेवारको साथ मागे । मिलनले उनलाई साथ दिइन् । भिडियोमा सागर लम्साल र प्रिन्सी-प्रिज्मा खेलेका छन् । अन्तत: म्‍युजिक भिडियो बनेर आएको 'तिम्रो मन बदलिएछ' लाई दर्शक-स्रोताले धेरै रुचाए ।

युट्युबमा रिलिज भएको १० दिनमै भिडियोले ३० लाख भ्युज पार गरेको छ । १ लाख ३० हजारले लाइक गरेका छन्, साढे ६ हजारले प्रतिक्रिया दिएका छन् ।

यशलाई शंका थियो- कतै नयाँ पुस्ताले नरुचाउने पो हो कि !

तर, म्युजिक भिडियो सार्वजनिक भएपछि उनले जुन चर्चा पाएका छन् त्यसमा उनी दंग छन् । यश भन्छन्, 'गीतसँगै मैले पनि पुनर्जन्म पाए । नयाँ पुस्तामाझ मेरो गीत मात्र होइन, म पनि परिचित हुन सकेँ । खुसी छु ।'

आफ्नो गीतलाई अहिलेको पुस्ताले पनि किन रुचायो ? यशले बुझ्न खोजे । र, निष्कर्ष निकाले, ‘अहिले प्रेम गर्ने शैली फेरिएछ, तर मन दुख्ने/टुक्रिने शैली फेरिएको रहेनछ ।’

प्रेमिल गीत पुस्तौँ-पुस्तासम्म पनि कालजयी हुने यशको बुझाइ छ । उनी भन्छन्, ‘पुस्ता सकिएला, तर प्रेम सकिन्न । त्यसैले प्रेमिल गीत पनि सधैँ अमर रहन्छन् ।’

पुरानो गीतलाई रि-रेकर्ड गरेर सफलता पाएका यशले मात्र होइन । सर्जक नारायण रायमाझीले पनि आफ्ना पुराना गीत-संगीतलाई पुनर्जन्म दिएका छन् । जुन गीत लोकप्रिय बनेका छन् ।

१० महिनाअगाडि नारायणले 'उनको प्रीति पहिले हो कि मेरो प्रीति पहिले' गीतलाई रि-रेकर्ड गरेर बजारमा ल्याए । रेडियो नेपालमा रेकर्ड भएको यो गीत अहिलेको पुस्ताले सुन्न पाएका थिएनन् । कतै खोज्दा भेटिन्नथ्यो ।

पहिला गीत सुनेका स्रोताहरूले पनि नारायणलाई बारम्बार भन्ने गर्थे, 'तपाईंका पुराना गीत अहिले सुन्नै पाएनौँ ।' यी विभिन्न गुनासोलाई नारायणले मनन गर्दै आएका थिए । अहिलेको डिजिटल मार्केटमा आफ्ना पुराना गीतलाई ब्युँत्याउनुपर्छ भन्ने सोच उनीमा थियो । सोही अनुरुप उनले गीतलाई रि-रेकर्ड गरेर बजारमा ल्याए ।

नयाँ पुस्ताका गायक प्रविण बेडवाल र गायिका रचना रिमालले यो गीतमा आवाज दिए । जुन गीतको भिडियोले युट्युबमा १ करोड १६ लाखभन्दा बढी भ्युज कमाइसकेको छ ।

रि-रेकर्ड भएर आएको गीतलाई नारायण रायमाझीका पुराना स्रोताले मात्र होइन, नयाँ पुस्ताले पनि उत्तिकै रुचाए । गीत रिलिज हुँदै गर्दा टिकटकमा यो गीतले टेन्डिङमै परेको थियो । यो गीतमा हजारौँ युवा-युवतीले टिकटक बनाएका थिए ।

गीतले पाएको चर्चा नारायणले सोचेभन्दा फरक थियो । उनले यो चर्चा सोचेका थिएनन् । उनी भन्छन्, 'हराइसकेको सिर्जनालाई पुनर्जीवित गरौँ न त भन्ने लागेर मात्र मैले गीतलाई रि-रेकर्ड गरेको थिएँ । सफलता वा असफलताबारे केही सोचेकै थिइनँ ।'

डिजिटल दुनियाँमा आफ्ना लोप हुन लागेका पुराना सिर्जनालाई राख्न सकियो भने आगामी पुस्ताले पनि सुन्न सक्ने नारायणको बुझाइ थियो । 'डिजिटजल प्लेटफर्ममा रहेको गीत सधैँ अमर रहन्छ । मन लागेको बेला हेर्न वा सुन्न पाइन्छ', नारायण भन्छन्, 'आफ्नो गीतलाई आगामी पुस्ताले पनि सुन्न सकून् भनेर नै रि-रेकर्ड गरेका हौँ ।'

युट्युबमा करोडमाथि भ्युज कटाउँदै गर्दा गीतले राम्रो कमाइ पनि गरेको छ । नारायणको इच्छा व्यापारीकरण गर्ने होइन, तर आएको आम्दानीबाट उनी खुसी नै छन् । उनी भन्छन्, 'लगानी अनुसार आम्दानी पनि भएको छ ।'

'कुनै समय हामी गीत-संगीतलाई व्यापारिक रूपमा सोच्न पनि सक्दैन थियौँ । अहिले आफैँ व्यापारिक भएको छ । यो खुसीको कुरा हो', नारायणले थपे ।

नारायणले अन्य केही पुराना सिर्जनालाई डिजिटलाइज गरेका छन् । कुनै समयको चर्चित गीत 'नमुछे आमा दहीमा टीका', 'आगो पिएर बाच्ने' जस्ता गीतलाई पनि रि-रेकर्ड गरेर बजारमा ल्याएका छन् ।

'फूलबुट्टे सारी' बोलको गीत पनि रि-रेकर्ड भएर चर्चामा आएको गीतहो । टिकटकमा १२ वर्ष पुरानो यो गीतले गत वर्ष तहल्का नै पिट्यो । टिकटकमा सानो टुक्‍का हिट भएपछि संगीतकार तथा गीतकार राजनराज सिवाकोटीले गीतलाई रि-रेकर्ड गरेर सार्वजनिक गरेका थिए ।

राजनराज र 'फूलबुट्टे सारी'का गायक मार्मिक लामाले १२ वर्षअघि गीतको भिडियो बनाउने आँट गरेनन् । त्यो समय अडियो खासै हिट नभएपछि उनीहरूले भिडियो बनाउने आँट गरेका थिएनन् । तर, टिकटकले अडियोलाई हिट बनाइदिएपछि उनीहरूले विभिन्न भर्सनमा गीत र भिडियो बनाएर सार्वजनिक गरेका छन् ।

अहिले युट्युबमा 'फूलबुट्टे सारी'को मेल, फिमेल, चाइल्ड र लिजेन्ड भर्सन सुन्न सकिन्छ । यी सम्पूर्ण भर्सनलाई निर्माण टिमले रि-रेकर्ड नै गरेर बजारमा ल्याएको हो । यो गीतलाई विदेशी गायक-गायिकाले पनि कभर गाएका छन् ।

राजनराजले यो गीतबाट यत्तिको सफलता सोचेका थिएनन् । राजनराज भन्छन्, 'सायद यो गीतको समय नै अहिले थियो । अहिलेको पुस्ताले खोजेको मेलोडी फूलबुट्टे सारीमा भेटियो । त्यसैले पनि धेरैले रुचाउनुभयो होला ।'

विभिन्न भर्सनमा सार्वजनिक भएको यो गीतले युट्युबमा करोडमाथिको भ्युज पाएको छ । यसबाट व्यापार पनि राम्रै भएको छ । राजनराज भन्छन्, 'हामीले व्यापार नै सोचेरचाहिँ विभिन्न भर्सनमा बनाएका होइनौँ । तर, लगानीअनुसार आम्दानी पनि राम्रै छ ।'

अहिले धेरै जना सर्जकहरू आफ्ना पुराना र लोप हुन लागेका कृतिलाई पुनर्जीवन दिन लागिपरेका छन् ।

प्रकाशित मिति: बिहीबार, साउन १४, २०७८ १७:४८