मध्यपश्चिमाञ्चल विश्वविद्यालयमा सधैँ भाँडभैलो : प्रशासन, प्राध्यापक र विद्यार्थीबीच त्रिपक्षीय संघर्ष

मध्यपश्चिमाञ्चल विश्वविद्यालयमा सधैँ भाँडभैलो : प्रशासन, प्राध्यापक र विद्यार्थीबीच त्रिपक्षीय संघर्ष

A+ A A-

विद्यार्थी, प्राध्यापक र विश्वविद्यालय प्रशासनबीच समझदारी नहुँदा मध्यपश्चिमाञ्चल विश्वविद्यालयमा तनाव बढेको छ ।

२०६९ सालमा स्थापना भएको विश्वविद्यालयमा तीन जना उपकुलपति फेरिए पनि प्रशासन, प्राध्यापक तथा विद्यार्थीहरूबीच विवाद रहँदै आएको छ । मौका परीक्षाको माग गर्दै आन्दोलनरत विद्यार्थी र विश्वविद्यालय प्रशासनबीच असमझदारी छ ।

विश्वविद्यालयलाई एकेडेमिक क्षेत्रका रूपमा भन्दा आम्दानीको रूपमा लिने गरेका केही प्राध्यापक र विद्यार्थीहरू अहिले आन्दोलनमा उत्रिएको उपकुलपति प्रा.डा. नन्दबहादुर सिंहको आरोप छ । ‘मैले विश्वविद्यालयलाई एक एकेडेमिक क्षेत्रको अब्बल शैक्षिक संस्था बनाउन खोजेको हुँ,’ उनले भने, ‘त्यसमा लाग्दा मलाई असफल बनाउन विभिन्न संघ संस्था तथा विद्यार्थी र प्राध्यापकहरू लागेका छन् ।’

विद्यार्थीहरूले अनलाइन परीक्षाको माग गरेको उनले बताए । कोरोनाको जटिलताका कारण यसअघि अनलाइन परीक्षा लिइएको भए पनि अहिले भौतिक रूपमा नै परीक्षा लिन खोज्दा आफूमाथि आई लागेको सिंहले बताए ।

‘विश्वविद्यालय सर्टिफिकेट मात्रै बाँड्ने थलो होइन । यही अवस्थामा हामीहरू अगाडि बढ्यौँ भने भोलि मध्यपश्चिमाञ्चल विश्वविद्यालयको शिक्षाको गुणस्तर कहाँ पुग्छ ? हामीमाथि नै प्रश्न उठ्न सक्छ,’ उनले भने, ‘त्यसैले मैले नेपालमा मात्रै होइन विश्वमा नै एमयूका विद्यार्थीले प्रतिस्पर्धा गर्न सकून र अब्बल बनुन् भनेरै शैक्षिक गुणस्तर सुधारको काम थालेको छु । शैक्षिक सुधारका सवालमा जुनसुकै अवस्थामा पनि सम्झौता गर्दिनँ ।’

प्रा.डा. नन्दबहादुर सिंह

विश्वविद्यालयको परीक्षा प्रणालीसँगै गुणस्तर सुधारका लागि आफूले काम गरिरहेको र विद्यार्थीहरूले नाजायज माग राखेर आन्दोलन गरिरहेको सिंहको दाबी छ । ‘हिजो विश्वविद्यालयलाई दुहुनो गाई बनाएर खानेहरूले नै आज राजनीतिक चलखेल गर्दैछन् । उनीहरूकै उक्साहटमा विद्यार्थीले आन्दोलन गरिरहेका छन्,’ उनले भने, ‘इन्जिनियरिङ्ग संकायको चार वर्षे अवधिमा आठौँ सेमेष्टरमा विद्यार्थीले ४० वटा विषय अध्ययन गर्नुपर्छ । जसमा ३२ वटासम्म विषय लागेका विद्यार्थीहरू यो आन्दोलनमा सहभागी छन् । उनीहरू परीक्षा नदिएर नै पास गरी पाउँ भनेर आन्दोलन गरिरहेका छन् ।’

वार्ताबाट समस्या समधान गर्न खोज्दा आन्दोलनरत प्राध्यापक र विद्यार्थीले नमानेको सिंहको दाबी छ । ‘वार्ताबाहेक समस्या समधानको अर्को विकल्प छैन,’ उनले भने, ‘आन्दोलन गर्नेलाई वार्ता गरौँ भन्दा उनीहरूले वास्ता गरेका छैनन् ।’

तर, राष्ट्रिय प्राध्यापक संगठन मध्यपश्चिमाञ्चल विश्वविद्यालयका अध्यक्ष सिंहराज गुरुङले आफूहरूले वार्ताबाट समस्याको समाधान गरौँ भन्दा उपकुलपति त्यसका लागि तयार नभएको बताउँछन् ।

अनिश्चितकालका लागि तालाबन्दी

नेपाल राष्ट्रिय प्राध्यापक संगठनले १५ बुँदे माग राख्दै विश्वविद्यालयमा अनिश्चित कालका लागि तालाबन्दी गरेको छ । विश्वविद्यालयमा नयाँ पदाधिकारी नियुक्त भएदेखि नै आफन्तको भर्ती केन्द्र बनाउने काम गरेकाले तालाबन्दी गरिएको संगठनको भनाइ छ ।

राष्ट्रिय प्राध्यापक संगठनले १४ वैशाखमा विश्वविद्यालय सुधारका लागि १९ बुँदे मागपत्र बुझाएको र त्यसको बेवास्ता गरिएकाले थप मागसहित तालाबन्दी गरिएको राष्ट्रिय प्राध्यापक संगठन मध्यपश्चिमाञ्चल विश्वविद्यालयका सचिव कमल सिंहले बताए ।

‘उपकुलपति सिंह आएपछि विश्वविद्यालयको सुधार होला भन्ने सोच बनाएका थियौँ,’ उनले भने, ‘तर विभिन्न नियुक्तिदेखि सबै ढंगले एकलौटी गर्न खोजियो । विश्वविद्यालयको साख जोगाउनका लागि आन्दोलन गरेका हौँ ।’

संगठनले बर्खास्त गरिएका इन्जिनियरिङ संकायका एम.ई. कार्यक्रम निर्देशक उपप्राध्यापक विश्वनाथ प्रसाद शाहको बर्खास्ती फिर्ता गर्नुपर्ने, विश्वविद्यालयमा राजनीतिक पूर्वाग्रह राखेका एक पक्षीय ढंगले गरिएका राजनीतिक नियुक्ति खारेज गरिनुपर्ने, इन्जिनियरिङ संकायमा ल्याबको स्थापना गरिनुपर्ने, करार विज्ञापनमार्फत प्राध्यापक, सह–प्राध्यापक, उपप्राध्यापक, तथा कर्मचारी गरि ३६ जना आफूनिकटका छनौट गर्ने गरी गरिएको विज्ञापन खारेज गर्नुपर्नेलगाएतका माग राख्दै तालाबन्दी गरिएको सिंहराज गुरुङ्गले बताए ।

मध्यपश्चिमाञ्चल विश्वविद्यालय

संगठनले आफ्ना माग पूरा नभए विश्वविद्यालयका सबै कार्यक्रम बहिष्कार गर्ने, उपकुलपतिविरुद्ध दुई दिन दुई घण्टा केन्द्रीय क्याम्पसको मुल गेटका धर्ना दिने, विश्वविद्यालयको केन्द्रीय क्याम्पसदेखि केन्द्रीय कार्यालयसम्म प्लेटकार्ड तथा र्‍याली गर्ने जनाएको छ ।

मौका परीक्षा स्थगित

आन्दोलनकै कारण गत शुक्रबारदेखि हुने भनिएका विभिन्न संकायका परीक्षा स्थगित गरिएका छन् । संयुक्त विद्यार्थी संगठनले विभिन्न माग राख्दै निरन्तर आन्दोलन गरेपछि परीक्षा स्थगित भएको हो ।

परीक्षा व्यवस्थापन प्रमुख डा. आनन्दप्रसाद सुवेदीले मानविकी र सामाजिकशास्त्र संकाय व्यवस्थापन संकाय, विज्ञान तथा प्रविधि संकाय र शिक्षाशास्त्र संकाय अन्तर्गतका स्नातक तह आठौँ सेमेष्टरको मौका परीक्षा शुक्रबारदेखि प्रारम्भ हुनुपर्नेमा प्रतिकूल परिस्थितिका कारण सञ्चालन हुन नसकेको बताए ।

विद्यार्थीहरू आन्दोलनमा

विश्वविद्यालयमा संयुक्त विद्यार्थी संगठनले गत आइतबारदेखि विभिन्न १८ बुँदे माग राख्दै आन्दोलन गरिरहेको छ ।

विश्वविद्यालयले वार्तामा आएर विद्यार्थीको समस्या समाधान गर्न नसकेको अनेरास्ववियुका (क्रान्तिकारी) का केन्द्रीय सदस्य तथा प्रदेश सह–संयोजक तिर्सना हमालले बताइन् । ‘वार्तामा किन आउन सकिरहेको छैन ? जबसम्म हामीले उठाएका माग सम्बोधन हुँदैनन् तबसम्म निरन्तर आन्दोलनमै रहने छौँ,’ उनले भनिन्, ‘विश्वविद्यालयले विद्यार्थीका मागहरूलाई नजरअन्दाज गरेको छ ।’

प्रकाशित मिति: बुधबार, साउन १३, २०७८ १०:४०