मुख्यमन्त्री पोखरेलले दोस्रो पटक शिलान्यास गरेको बधशाला निर्माणले लिएन गति

मुख्यमन्त्री पोखरेलले दोस्रो पटक शिलान्यास गरेको बधशाला निर्माणले लिएन गति

A+ A A-

रूपन्देहीको रामनगरमा दोस्रो पटक शिलान्यास गरिएकोे पशु बधशाला निर्माणको काम निर्धारित समयमा नसकिने भएको छ ।

३१ असार २०७७ मा लुम्बिनी प्रदेश सरकारका मुख्यमन्त्री शंकर पोखरेलले दोस्रो पटक शिलान्यास गरेको बधशाला निर्माणको काम सुरु भएको एक वर्ष वितिसक्दा पनि ४० प्रतिशतमात्रै भौतिक प्रगति भएको छ ।

१६ महिनामा निर्माण सम्पन्न गर्ने गरी दोस्रो पटक बधशालाको शिलान्यास भएको थियो । पशुपंक्षी बजार प्रवद्र्धन निर्देशनालय हरिहरपुर काठमाडौं र तत्कालीन बुटवल नगरपालिकाको संयुक्त लगानीमा २०६५ सालमै बधशाला निर्माण गरिए पनि मापदण्ड अनुरुपको काम नभएको ३१ असार ०७७ मा बधशाला निर्माणको लुम्बिनी प्रदेशका मुख्यमन्त्री पोखरेलले दोस्रो पटक शिलान्यास गरेका थिए ।

बुटवलवासीलाई स्वच्छ मासु उपभोग गराउने र व्यवस्थित पशु बध गर्न भन्दै तत्कालीन बुटवल नगरपालिकाले २० वर्षअघि पशु बधशालाको योजना अगाडि सारेको थियो । तर, लामो समय मासु व्यवसायीको असहमतिका कारण बधशालाको योजना अगाडि बढ्न सकेको थिएन । सुरुवातमा मासु व्यवसायीको असहमतिका कारण अगाडि बढ्न नसकेको बधशाला पछि भने बधशालास्थलको टुंगो लाग्न नसक्दा झनै पछाडि धकेलिएको थियो ।

बुटवल नगरपालिकाले साविक वडा नम्बर १३ देवीनगरमा बधशाला निर्माणको लागि जग्गा छुट्याए पनि स्थानीयवाशीको चर्को विरोधका कारण रामनगरमा जग्गा छनोट गरिएको हो । अहिले बुटवल औद्योगिक क्षेत्र अन्तर्गत पर्ने बुटवल धागो कारखानादेखि पूर्वतर्फको २८ रोपनी जग्गामा पशु बधशाला निर्माण भइरहेको छ ।

शिवशक्ति कन्ट्रक्सन प्रालिले कुल २२ करोडको लागतमा १६ महिनामा निर्माण पूरा गर्ने गरी शिलान्यास भएको निर्माण सम्पन्न हुन करिब ४ महिना मात्र बाँकी रहेकाले समयमै निर्माणको काम सम्पन्न नहुने निश्चित भएको छ । बधशालाको भौतिक संरचनाको ४० प्रतिशत काम सम्पन्न भइसक्दा करिब ७ करोड रुपैयाँ लगानी भइसकेको बुटवल उपमहानगरपालिकाका इन्जिनियर गौतम रौनियारले बताए ।

बधशाला निर्माणका लागि बुटवल उपमहानगरपालिकाको २५ प्रतिशत र लुम्बिनी प्रदेश सरकारको ७५ प्रतिशत लगानी रहेको छ । कुल २२ करोड १३ लाख ३५ हजार ९ सय ९६ रुपैयाँको लागतमा १६ महिनामा निर्माण सक्ने गरी निर्माण सम्झौता गरिएको थियो । अहिले निर्माण भइरहेको बधशालामा पहिलो चरणमा खसी र बोका मात्रै बध गर्न मिल्ने बनाइनेछ ।

प्रदेश सरकार, बुटवलका मासु व्यवसायी, पशुपालक किसान र सहकारीको सहकार्यमा निर्माण भइरहेको बधशालामा प्राविधिक तहको साझेदारी हेफर इन्टरनेसनलले गरिरहेको छ । निर्माण भइरहेको बधशालामा दैनिक एक हजार खसी बोका बध गर्न सकिने छ ।

बुटवल उपमहानगरपालिकाका नगरप्रमुख शिवराज सुवेदीले बधशाला निर्माण कम्पनीले समयमै सम्पन्न गरेर हस्तान्तरण गर्ने गरी काम गरेको बताए । बधशाला निर्माणपछि बुटवलमा पशु बध व्यवस्थित हुने र उपभोक्ताले स्वच्छ र सफा मासुको उपयोग गर्न पाउने उनले बताए ।

बधशालामा बाख्राको चरण, होल्डिङ, पशु स्वास्थ्य चेकजाँच तथा उपचार कक्ष, बधशालामा खटिनेहरुका लागि प्राथिमक उपचार कक्ष, सुरक्षा कक्ष, फोहोर प्रशोधन केन्द्र, हरियाली उद्यान र बगैँचा समेत निर्माण गर्ने योजना बनाइएको छ ।

प्रकाशित मिति: शनिबार, साउन ९, २०७८ १५:३८