जोन्सन खोप लगाएको केहीबेरमै ७८ वर्षीय नरबहादुरको मृत्यु, कारण खाेज्न शव काठमाडाैं ल्याइयाे

जोन्सन खोप लगाएको केहीबेरमै ७८ वर्षीय नरबहादुरको मृत्यु, कारण खाेज्न शव काठमाडाैं ल्याइयाे

A+ A A-

धादिङ नीलकण्ठ नगरपालिका–६ का ७८ वर्षीय नरबहादुर श्रेष्ठ शुक्रबार दिउँसो जोन्सन एन्ड जोन्सन खोप लगाउन ‘खोप केन्द्र’मा पुगे । घरदेखि खोप केन्द्रनजिकै भएकाले उनी हिँडेरै गएका थिए । तर, खोप लगाएको केहीबेरमै उनी बेहोस भए ।

नगरपालिका प्रमुख भीमप्रसाद ढुंगानाको टिमले उनलाई तत्कालै उपचारका लागि एम्बुलेन्समार्फत जिल्ला अस्पताल धादिङ पुर्‍यायो । तर, अस्पतालले उनलाई बचाउन सकेन । ‘उहाँ खोप लगाएपछि बेहोस हुनुभयो । त्यसपछि हामीले अस्पताल पुर्‍याएका थियौँ । उपचारका क्रममा मृत्यु भयो,’ नगरपालिका प्रमुख ढुंगानाले भने ।

मृत्युकाे कारण खुलेपछि मात्र उनकाे अन्त्येष्टि गर्ने निष्कर्षमा नगरप्रमुख ढुंगानासहितको टोली पुगेकाे छ । ‘उहाँ सुगरको बिरामी हुनुहुँदोरहेछ । औषधि खान छोड्नु भएको कुरा आएको छ । पुरानो रोगले मृत्यु भएको हो वा खोपका कारण हो पत्ता लगाएपछि मात्र अन्तिम संस्कार गर्ने निर्णयमा हामी पुगेका हौँ,’ उनले भने ।

मृत्युकाे कारण यकिन गर्न श्रेष्ठको शवलाई काठमाडौं पठाइएको नगरप्रमुख ढुंगानाले जानकारी दिए । ‘जिल्लामा विज्ञ नभएपछि काठमाडौं पठाएका छौँ । के कारणले मृत्यु भएको हो पत्ता लगाएपछि मात्र दाहसंस्कार हुन्छ,’ उनले भने ।

खोपले मृत्यु भएको हो त ?

खोपकै कारण केहीलाई सिकिस्त एलर्जी हुने बताउँछन्, स्वास्थ्य मन्त्रालयका खोप विज्ञ डा. श्यामराज उप्रेती । ‘सिकिस्त एलर्जी भएमा आधा घण्टामै मृत्यु हुनसक्छ,’ उनले भने, ‘खोप लगाएपछि अवाञ्छित घटना भएमा अध्ययन गर्न निष्पक्ष समिति छ । उसले छानविन गरेर कारण पत्ता लगाउँछ ।’

खोप लगाएपछि एन्टिबडी बन्ने भएकाले केही रियाक्सन गर्ने उनले बताए । ‘खोप लगाएपछि शरीर दुख्ने, सुन्निने, ज्वरो आउने हुन्छ,’ उनले भने, ‘कोभिसिल्ड खोप लगाउँदा पनि सामान्य असर देखिएको थियो । एन्टिबडी बन्ने प्रक्रियामा केही रियाक्सन देखिन्छ । जाेन्सन एन्ड जाेन्सन खाेप अमेरिकामा १ करोड बढीले लगाए तर गुनासो आएको छैन ।’

खोपबाट मृत्यु भएमा क्षतिपूर्ति

खोपकै कारण मृत्यु भएमा क्षतिपूर्तिको व्यवस्था ऐनमै गरिएको छ । ‘मृत्यु भएमा क्षतिपूर्ति दिने र बिरामी भएमा उपचार सरकारले नै गर्छ,’ डा. उप्रेतीले भने, ‘कति क्षतिपूर्ति पाउने भन्ने ऐनमा उल्लेख छैन । तर, सरकारले दिने हो ।’

जोन्सन खोपको प्रभावकारिता कति ?

डा. उप्रेतीका अनुसार जोन्सन खोपले कोभिडबाट हुने मृत्यु ९० प्रतिशत, सिकिस्त बिरामी ८५ प्रतिशत, सामान्य बिरामी ६७ प्रतिशत घटाउँछ ।

एक डोज लगाए पुग्ने जोन्सन खोप कडा हो ?

एक डोज लगाएका कारण खोप कडा भएको तर्क गर्न नमिल्ने बताउँछन्, डा. उप्रेती । ‘एकै डोज लगाउने भएकाले कडा भएको होइन । एक डोज लगाउँदा यति प्रभाकारिता देखियो । अर्को डोज पनि लगाउनुपर्छ भन्ने पछि आउन सक्ला । एक डोज नै पूरा हो भन्ने होइन,’ उनले भने, ‘यो अध्ययन भइरहेको विषय हो ।’

प्रकाशित मिति: शुक्रबार, साउन ८, २०७८ २०:१२