बिदा बसेका सैनिक जवानको हातमा कसरी पुग्यो स्वचालित हतियार एसएमजी ?

A+ A A-

चितवनको शारदानगरस्थित सिमलडाँडा नहरमा प्रहरीले ७ साउनमा शव भेट्यो । टाउकोमा गोली हानेर हत्या गरेर शव झाडीमा फालिएको थियो । शव भेटेको भोलिपल्ट प्रहरीले हत्याका अभियुक्तलाई सार्वजनिक गरेको छ । मार्ने गंगाधर ढकाल र मारिने भरत गुरुङ दुवै सैनिक रहेको प्रहरीले जनाएको छ ।

प्रहरीले घटनामा प्रयोग भएको एसएमजी (सट मेसिन गन) र त्यसमा लाग्ने गोली (म्याग्जिन) समेत बरामद गरेको छ । अभियुक्त ढकाल सैनिक जवान र मृतक गुरुङ हुद्दा पदमा काठमाडौंको शिवपुरीस्थित दि फेमस महिन्द्रदल गणमा कार्यरत हुन् ।

आर्थिक लेनदेनका कारण गोली हानिएको प्रहरीको भनाइ छ । भरतपुरका ढकाल र धादिङ निलकण्ड नगरपालिका–१३ का गुरुङ मिल्ने साथी थिए । दुईबीच कतिसम्म अन्तरंग थियो भने गुरुङले आफ्नो बैंकको चेक नै ढकाललाई दिएका थिए । गुरुङको चेकमा आफ्नो हस्ताक्षर गरेर ढकालले रकम निकालेकाले उक्त भेद खुल्ने डरले हत्या भएको प्रहरीको प्रारम्भिक अनुसन्धानबाट खुलेको छ । गुरुङ बैना गरेको जग्गा पास गर्न ढकालसँगै चितवन पुगेका थिए ।

चितवन प्रहरी प्रमुख प्रहरी उपरीक्षक (एसपी) ओम अधिकारीका अनुसार गुरुङले ग्लोबल आईएमई बैंकमा जग्गा किन्न रकम राखेका थिए । तर, ढकालले ८ लाख रुपैयाँ सुटुक्क झिकेका थिए । यही रकमका लागि ढकालले आफ्नै साथीको हत्या गरेको प्रहरीको दाबी छ । प्रहरीले उक्त ८ लाख रुपैयाँ नगद पनि बरामद गरेको छ ।

एसएमजी सेना, सशस्त्र प्रहरी र नेपाल प्रहरी तीनवटै सुरक्षा अंगले प्रयोग गर्ने हतियार हो । सेनासँग यो हतियार सबैभन्दा बढी छ । यसबाहेक द्वन्द्वकालमा माओवादीले समेत यो हतियार सुरक्षा निकायबाट कब्जा गरेका थिए । शान्ति प्रक्रियापछि माओवादीले सबै हतियार राज्यलाई बुझाएनन्, आफैँसँग लुकाइछिपाइ राखेका थिए ।

चितवन प्रहरी स्रोतका अनुसार, यो हतियार भने सेनाको व्यारेकबाटै निकालिएको हो । यो कुरा ढकालले प्रहरीसँग बताए पनि कुन व्यारेकबाट निकालिएको भन्ने स्रोतले खुलाउन चाहेन । ढकालले दिएको बयानमा बरामद गोलीको लट नम्बरबाट परीक्षण भइरहेको प्रहरी स्रोतले जनायो ।

जंगी अड्डाका एक उच्च सैनिक अधिकारीले प्रहरीले चितवनमा बरामद गरेको हतियार सेनाको भएको जानकारी दिए । ती सैनिक अधिकारीका अनुसार, केही वर्षअघि सैनिक व्यारेकबाट हराएको हतियार र बरामद हतियारबीच प्रारम्भिक ‘कनेक्सन’ देखिएको छ । तर, कहिले र कुन व्यारेकबाट हतियार हराएको भन्ने सेनाले औपचारिक रूपमा खुलाउन मानेन ।

चितवनका एसपी अधिकारीले चाहिँ अनुसन्धानकै क्रममा भएकाले हतियारबारे अहिले केही खुलाउन नसकिने बताए । प्रहरीका अनुसार, ढकाल र गुरुङ दुवै बिदामा थिए । तर, उक्त हतियार उनीहरू कार्यरत दि फेमस महिन्द्रदल गणबाट नभई अन्यत्रको सैनिक व्यारेकबाट ढकालसम्म पुगेको प्रहरी स्रोतले दाबी गरेको छ । ‘यो हतियार सेनाले चलाउने नै हो,’ चितवन प्रहरी स्रोतले शिलापत्रसँग भन्यो, ‘तर उनीहरू कार्यरत गणको होइन, अन्यत्रको भन्ने खुल्न आएको छ ।’

बिदामा रहेका सैनिकको हातमा स्वचालित हतियार पुगेको भए त्यो गम्भीर सुरक्षा त्रुटि हो । ड्युटी सकिएपछि सैनिकहरूले बोक्ने हतियार व्यारेकको कोतघरमा बुझाबुझारथ गर्नुपर्छ ।

सुरक्षा निकायमा हतियार हराउनु, चोरी हुनुलाई ठूलो कसुर मानिन्छ । कोर्ट अफ इन्क्वायरी गठन गरेर लापरबाहीमा संलग्नलाई कारबाही हुन्छ । सैनिक प्रवक्ता सहायक रथी सन्तोषबल्लभ पौडेलले नेपाल प्रहरीले गर्ने अनुसन्धानमा सहयोगमा सेनाले पूर्ण सहयोग गर्ने बताए । ‘हतियारको विषयमा हामीले पनि आन्तरिक रूपमा अनुसन्धान थालेका छौँ,’ पौडेलले शिलापत्रसँग भने ।

प्रकाशित मिति: शुक्रबार, साउन ८, २०७८ १९:३३