सैनिक 'कु' पछिको म्यानमार : गोली छलेर अस्पताल चहार्छन् कोरोना संक्रमित

A+ A A-

कोरोना संक्रमणका कारण म्यानमारको मोगोक शहरमा लामो समयदेखि रुवीको व्यापार गर्दै आएका पदमबहादुर खड्का गत साता बिते । म्यानमारको दोस्रो ठूलो मानडेल शहरमा उपचारका लागि अस्पताल चहार्दा–चहार्दै उनकाे मृत्यु भएको परिवारले बताएकाे छ ।

खड्कालाई मोगोकदेखि ७ घण्टा लगाएर उपचारका लागि मानडेल शहर पुर्‍याइएको थियो । तर, समयमै अक्सिजन र अस्पतालमा बेड नपाएपछि उनकाे भाैँतारिदा भाैँतारिदै मृत्यु भएको हाे ।

खड्काजस्तै उपचारका अस्पताल खोज्दा–खोज्दै मोगोक शहरका छत्रबहादुर कटुवालको पनि बाटोमै मृत्यु भएको थियो । कटुवाल पनि समाजसेवासँगै व्यापार गर्दै आएका थिए । उनको पनि मोगोकमा उपचार नपाएपछि मानडेल शहरमा लैजाँदै गर्दा मृत्यु भएको कटुवाल परिवारले जानकारी दिएका छन् ।

उनीहरूजस्ता म्यानमारका हजाराैँ नागरिकले कोरोना संक्रमण भए पनि उपचार गर्न नपाएर ज्यान गुमाइरहेको म्यानमार देशीय गोर्खा संघले जनाएकाे छ । कोरोनाका कारण म्यानमारमा दैनिक एक हजारभन्दा धेरै नागरिकले ज्यान गुमाइरहेको त्यहाँको स्वास्थ्य मन्त्रालयको तथ्यांकमा उल्लेख छ ।

संक्रमितले उपचारका लागि अस्पतालमा बेड र अक्सिजन नपाएर बाटो मर्नुपरेकाे छ । म्यानमारका मुख्य शहरका अस्पतालआसपास कोरोनाका कारण मृत्यु भएका मानिसको शव थुप्रो लागेको संघले जानकारी दिएको छ ।

गोली छलेर अस्पताल पुग्छन् संक्रमित

गत वर्ष सन् २०२० को नोभेम्बरमा भएका निर्वाचनमा व्यापक धाँधली गरी म्यानमारको सेनाले १ फेब्रुअरीमा सत्ता नियन्त्रणमा लिएको थियो । सैनिक 'कु'विरुद्ध निरन्तर आन्दोलन चलिरहेकाे छ ।

एकातिर सैनिकले गोली चलाइरहेका छन् भने अर्कोतिर गोली छलेर कोरोना संक्रमित उपचारका लागि अस्पताल पुग्नुपर्ने बाध्यता रहेको म्यानमार देशीय गोर्खा संघले जनाएको छ । आन्दोलन दबाउन सैनिकले गोली चलाइरहेका छन् । सैनिकले चलाएको गोली छलेर कैयौँ कोरोना संक्रमित बिरामी उपचारका लागि अस्पताल पुग्छन् ।

घरमा उपचार गर्ने नसक्ने अवस्थाका कोरोना संक्रमित सैनिकले चलाएको गोली छलेर बिरामी उपचारका लागि अस्पताल जाने गरेको म्यानमार देशीय गोर्खा संघका पूर्वमहासचिव लक्ष्मण न्यौपाने बताउँछन् ।

'म्यानमारमा यो वर्ष सवैभन्दा ठूलो संकट आयो । सैनिकको गोलीबाट बाँचेका मानिस पनि कोरोनाबाट मरिरहेका छन्,' न्यौपानेले भने, ‘कोरोनाको भय एकातिर, अर्कोतिर सैनिकले गोली चलाइरहेका छन् । बर्मेलीहरूको जीवनमा त्रासैत्रास छ । कोरोना लागेर कति बेला मरिन्छ भन्ने भय थपियो । कोरोना लागे उपचार गर्न अस्पताल पाइँदैन ।’

म्यानमारका म्यान्टा, कलेनगर, म्यानछाङ, मानडेललगायतका शहरमा सैनिकले दिनैपिच्छे गोली चलाइरहेका छन् । म्यानमारमा घरैपिच्छे कोरोना संक्रमित भए पनि उपचारका लागि बाहिर जान सक्ने अवस्था नभएको उनी बताउँछन् ।

कोरोनाका कारण मृत्यु हुनेकाे शव गाड्न चिहानसमेत पाउन मुस्किल पर्न थालेकाे संघले जनाएकाे छ । कोरोनाका कारण मृत्यु भएकाकाे शव अस्पतालआसपासमै कुहिन थालेका छन् । शव जलाउने व्यवस्थापन नहुँदा समस्या जटिल बन्दै गएकाे छ ।

कोरोनाका कारण अस्पतालमा मरेका मान्छेको शव उठाउन आफन्त अस्पताल जान सक्ने अवस्था छैन । कहाँ लगेर शव गाड्ने कि जलाउन हो निश्चित नहुँदा धेरै शव अस्पतालमा आसपासमा थुपारिएको संघले जनाएकाे छ ।

म्यानमारका ३६ वटा नगरमा नेपालीभाषी नागरिककाे बसोबास गर्छन् । म्यानमारमा नेपाली मूलकाे जनसंख्या १ लाख ५० हजारभन्दा धेरै रहेको संघले जानकारी दिएको छ ।

प्रकाशित मिति: सोमबार, साउन ४, २०७८ १६:४८