दक्षिण कोरियाका यी तीन सर्त, जसको सम्बोधन नहुँदा कामदार पठाउन ढिलाइ भइरहेको छ

दक्षिण कोरियाका यी तीन सर्त, जसको सम्बोधन नहुँदा कामदार पठाउन ढिलाइ भइरहेको छ

A+ A A-

दक्षिण कोरियाले कोरोना महामारीका कारण रोजगार अनुमति प्रणाली (ईपीएस) अन्तर्गत कोरियन भाषा उत्तीर्ण गरी रोकिएका कामदार लैजान तीन सर्त राखेको छ ।

दक्षिण कोरियाले नेपालबाट लैजाने कामदारको कोभिड बीमा अनिवार्य हुनुपर्ने, सिधा हवाई उडान हुनुपर्ने र १४ दिन होटल क्वारेन्टाइन बसेको खर्च कामदार स्वयंले व्यहोर्नुपर्ने सर्त राखेको वैदेशिक रोजगार विभागमातहतको रोजगार अनुमति प्रणाली (ईपीएस) कोरिया शाखाले जानकारी दिएको छ । ईपीएस शाखाका अनुसार दक्षिण कोरियाले राखेका यी सर्त अनिवार्यजस्तै छन् ।

कोरियाले कोरोना महामारीमा कामदार लिन दुई महिनाअघि नै तीन सर्त राखेर श्रम, रोजगार तथा सामाजिक सुरक्षा मन्त्रालयलाई पत्रचार गरेको ईपीएस शाखाले जनाएको छ । तर, कोरियाले राखेका सर्तका विषयमा नेपालका तर्फबाट अहिलेसम्म आधिकारिक निर्णय भएको छैन ।

ती सर्तका विषयमा छलफल र सोहीअनुसार कामदार पठाउने तयारी भइरहेको ईपीएस शाखाका प्रमुख ईन्द्र गौतमले जानकारी दिए । कामदार कोरिया पठाउने प्रक्रिया चाँडै सुरु हुने गौतमले बताए ।

कोरियाका रोजगारदाताले कामदारको माग गरिरहेको गौतमले बताए । 'रोजगारीमा कामदार लिँदै आएका देशको कोरोना अवस्था हेरी श्रमिक आपूर्ति गर्ने नीति कोरियाको छ,’ उनले भने, ‘हाल, नेपालबाट कोरियासँग एउटा मात्र सिधा उडान छ । उडानका विषयमा पनि छलफल भइरहेको छ । कोरोना बीमा गर्नका लागि शाखाले बीमा कम्पनीको आवेदन आह्वान गरिसकेको छ ।’

दक्षिण कोरियाले नेपालसहित १६ वटा देशबाट कामदार आपूर्ति गर्दै आएको छ । पछिल्लो समयमा कोरोना संक्रमण जोखिम कम भएको देशबाट कामदार आपूर्ति गर्ने तयारी गरिरहेको पाइएको गौतमको भनाइ छ ।

ईपीएस कोरिया शाखाले ५ हजार डलरको कोभिड– १९ को बीमा गर्न इच्छुक बीमा कम्पनीलाई दर्ता हुन गत साता नै सूचनामार्फत आग्रह गरेको गौतमले बताए । कोरोना बीमा गर्ने कम्पनीको छनोत आगामी साताभित्र हुने उनले बताए ।

ईपीएस सञ्चालन तथा व्यवस्थापन निर्देशिका २०७३ को दफा २० बमोजिम दक्षिण कोरिया जाने श्रमिकको कोरिया पुगेको मितिले १४ दिनभित्र उक्त रकम बारबरको बीमा गराउनुपर्ने व्यवस्था छ । तर, अब भने कोरिया जाने कामदारले नेपालमै कोरोना बीमा गराए जानुपर्ने शाखाले जानकारी दिएको छ ।

कोरियाका सर्तमा सरकार मौन

सरकारले कोरिया कामदार पठाउने विषयमा तत्काल निर्णय नगर्दा श्रमिक पठाउने विषय अन्योलमा परेको शाखाले जनाएको छ । कोरियाले राखेका सर्तका विषयमा श्रम मन्त्रालय र अन्य सम्बन्धित निकायमा पत्रचार गरी जानकारी गराएको शाखाले जनाएको छ ।

श्रम मन्त्रालयका सहसचिव एवं प्रवक्ता दीपक काफ्लेले दक्षिण कोरियामा श्रमिक पठाउने प्रक्रिया तथा उसका सर्तका विषयमा छलफल भइरहेको जानकारी दिए । यस विषयमा चाँडै आवश्यक निर्णय हुने काफ्लेको भनाइ छ ।

कोरोनाको पहिलो लहर सुरु भएपछि २१ फागुन २०७६ देखि कोरियाले नेपाली कामदार लिएको छैन । शाखाका अनुसार पहिलोपटक जान खोजेका (नियमिततर्फ) ८ हजार र प्रतिबद्धतर्फ ३ हजार गरी झण्डै ११ हजार नेपाली कामदार कोरिया जानबाट वञ्चित भएका छन् । उनीहरू सबै ईपीएसमार्फत कोरियन भाषा परीक्षा उत्तीर्ण गरेका कामदार हुन् ।

सन् २०१८ सालदेखि कोरियन भाषा परीक्षा उत्तीर्ण गरेका कामदार रोकिएका छन् । नेपालले सन् २००८ मा सरकारीस्तरमा श्रम सम्झौता गरी दक्षिण कोरिया कामदार पठाउन थालेको हो । हाल, कोरियामा ५० हजारभन्दा धेरै नेपाली कार्यरत छन् ।

हवाई र क्वारेन्टाइन थपिने

कोरोनाका कारण कोरिया जाने कामदारलाई लाग्ने खर्च थप हुने भएको छ । ईपीएस शाखाका अनुसार सामान्य अवस्थामा कोरिया जाने कामदारको लागत खर्च ८ सय १६ डलर (करिब ९० हजार रुपैयाँ) रहेको थियो । अब कोरिया जाने कामदारलाई कोरोना बीमा र क्वारेन्टाइन खर्च बढ्ने छ । १४ दिनको क्वारेन्टाइन र सिधा हवाई उडान भएपछि झण्डै २ हजार डलर खर्च लाग्ने शाखाको अनुमान छ ।

कोरियाको थ्रीस्टार होटलको प्रतिदिन खर्च ६५ डलर छ । साथै, सिधै उडानको पनि केही भाडा बढी लाग्ने शाखाको अनुमान छ । कोरिया जाने कामदारले नेपालमै कोरोना बीमासमेत गराउनु पर्नेछ ।

कोरियाले गैरश्रमिकलाई स्वास्थ्य मापदण्ड पालन गरी आगमन र प्रस्थान अनुमति दिए पनि श्रमिकको सम्बन्धमा भने कडाइ गरिरहेको छ । कोरियाले विदेशी श्रमिकलाई कडाइ गरेपछि बिदामा नेपाल आउन चाहने र भिसा लिएर कोरिया जाने तयारीमा रहेका हजारौँ नेपाली दुवै देशमा रोकिएका छन् ।

प्रकाशित मिति: सोमबार, साउन ४, २०७८ ०७:३९