डब्लुएचओको चेतावनी- खोप लाएकाहरू संक्रमित भइहाले पनि लक्षण देखिँदैन तर नलाएकालाई साह्रो पार्न सक्छ

डब्लुएचओको चेतावनी- खोप लाएकाहरू संक्रमित भइहाले पनि लक्षण देखिँदैन तर नलाएकालाई साह्रो पार्न सक्छ

A+ A A-

कोरोनाको तेस्रो लहरको त्रास जनमानसमा छ । यसैबीच विश्व स्वास्थ्य संगठन (डब्लुएचओ)ले खोप लगाइसकेकाहरू पनि डेल्टा भेरियन्टबाट संक्रमित हुन सक्ने बताएको छ । खोप नलगाएकाहरू त झन् ठूलै समस्यामा पर्नसक्ने डब्लुएचओको चेतावनी छ । अमेरिका, बेलायतसहित कैयौं देशमा यस्तो भएको छ ।

डब्लुएचओकी वैज्ञानिक डा. मारिया वेन केरखोवेका अनुसार संसारमा डेल्टा भेरियन्टको प्रसार पहिलेको तुलनामा झन् तीव्र बनेको छ । लकडाउन, निषेधाज्ञा खुलेपछि मानिसहरू भीडभाड गर्न थालेका छन् । यसै कारण डेल्टा तीव्र गतिमा फैलिने खतरा छ ।

‘खोप लगाइसकेका मानिस पनि डेल्टाबाट संक्रमित भइरहेका छन् । कतिपयमा संक्रमणको लक्षण नै देखिइरहेको छैन तर टेस्ट गर्दा पोजिटिभ देखाइरहेको छ’, उनले भनिन्, ‘खोप नलगाएकाहरूलाई खोप लगाइसकेकाबाट संक्रमण हुँदा खोप नलगाएकाहरू गम्भीर रूपले बिरामी भएको पाइएको छ ।’

डब्लुएचओका अनुुसार संसारभर २४.७ प्रतिशत जनसंख्यालाई खोपको कम्तिमा एक डोज दिइएको छ । अहिलेसम्म खोपको तीन सय करोड मात्रा लगाइएको छ । पिछडिएका, गरिब र कम आय भएका देशमध्ये कतिले आफ्ना नागरिकलाई खोप दिन थालेकै छैनन् । सुरु गरेकाले पनि अत्यन्तै कम जनसंख्यालाई मात्र दिन सकेका छन् ।

यस्तोमा यी देश कुनै पनि बेला महामारीबाट ठूलै संकटमा पर्न सक्ने देखिन्छ । संसारका १ सय ४ देशमा घातक मानिएको डेल्टा भेरियन्टले चुनौती दिइरहेको छ ।

सावधान हुनुहोस्

खोप लगाइसकेका मानिस पनि कोरोना संक्रमित हुन सक्ने चेतावनी डब्लुएचओले दिएको छ । यस्तोमा कोरोनाजस्तो लाग्ने लक्षणहरू देखिएमा आफूलाई आइसोलेट गर्न पनि डब्लुएचओले आग्रह गरेको छ । ‘आरटी–पीसीआर रिपोर्ट नेगेटिभ आएपछि मात्र बाहिर निस्कनुहोस् । किनकि, खाेप लगाइसकेका मानिसमा संक्रमणको गम्भीर लक्षण नदेखिन सक्छ, तर खोप नलगाएकाहरूका लागि यो ठूलै संकट बन्न पुग्छ’, डा. मारियाले भनिन् ।

प्रकाशित मिति: बिहीबार, असार ३१, २०७८ ०९:३८