लट्री परेको भन्दै लाखौँ ठगी गर्ने गिरोह सक्रिय, पीडितले गुहारे प्रहरी

A+ A A-

आफन्तको सन्देश हेर्न इमो खोल्दा धनुषाधाम नगरपालिका–४ का शम्भु कुमार यादवलाई पत्यारै नलाग्ने गजबको अफर आयो- ‘तपाईंलाई २५ लाख रुपैयाँ लट्री परेको छ ।’

अपरिचित व्यक्तिले कल्पनै नगरेका कुरा सुनाउँदा सुरुमा उनलाई मजाकै लाग्यो । तर, पटक-पटक फोन गरेर ती व्यक्तिले शम्भुलाई लट्री परेकै छ भनी यसरी विश्वास दिलाए कि उनले दुःखका दिन बिर्सिंदै हप्ता दिनमै धनी बन्ने सोचेर अनेकौं सपना बुन्न थाले ।

तर महिना दिन नबित्दै उनको सपना बर्बादीमै बदलियो । ती अपरिचित व्यक्तिले शम्भुबाट पटक-पटक गरी १३ लाख रुपैयाँ ठगे । त्यति धेरै पैसा पठाउँदासम्म पनि उनले आफू ठगिएको पत्तै पाएनन् । २०७७ माघमा ००३६१२१८२५६८६ इमो नम्बरबाट फोन गरेका ती अपरिचित व्यक्तिले लट्रीको रकमबापत केही रकम सरकारलाई कर तिर्नुपर्ने भन्दै शम्भुसँग पटक-पटक गरी १३ लाख रुपैयाँ ठगे । तर, लट्रीको पैसा पाउनु त परै जाओस् आफूले पठाएको पैसासमेत डुबेपछि उनले प्रहरीलाई गुहारे ।

शम्भुले ठगिएको रकम फिर्ता गरी ठग्ने व्यक्तिलाई कारबाही गरी पाउँ भन्दै जिल्ला प्रहरी कार्यालय धनुषामा उजुरी दिएका छन् । यद्यपि अहिलेसम्म न आरोपी पक्राउ पर्न सकेका छन् न पीडितले पैसा फिर्ता पाउन सकेका छन् । घटनाबारे अनुसन्धान जारी रहेको धनुषाका प्रहरी नायब उपरीक्षक मकेन्द्र मिश्र बताउँछन् ।

तर, यसरी भाग्यको चिट्ठा परेको लोभमा फसेर ठगिने शम्भु एक्लो व्यक्तिमात्रै भने होइनन् । जिल्ला प्रहरी कार्यालय धनुषाका अनुसार २१ जेठमा धनुषाकै मैथली यादवलाई समेत २५ लाख रुपैयाँ लट्री परेको म्यासेज आयो । ह्वाट्स एप नम्बरमा पटक-पटक फोन गरी लट्रीबापतको रकम भुक्तानी लिन भन्दै अपरिचित व्यक्तिलाई बारम्बार फोन गरे । पैसा आइसकेको विश्वास दिलाउँदै ती व्यक्तिलाई भुक्तानी लिन आग्रह गरे । जसका लागि सरकारलाई पहिले कर तिर्नुपर्ने शर्त उनले राखे । त्यसमा मैथिली नराम्ररी फसिन् ।

बैंक मार्फत ती व्यक्तिलाई मैथिलीले पटक-पटक गरी १० लाख रुपैयाँ पठाइन् । तर, लट्री परेको पैसा मात्र नभई आफूले सरकारलाई कर बुझाएको नाममा समेत तिरेको पैसा उनले फिर्ता नपाएपछि मात्र ठगको जालमा फसेको पत्तो पाइन् । त्यसपछि उनले आफू ठगिएको भन्दै जिल्ला प्रहरी कार्यालयमा उजुरी दिइन् । यद्यपि अहिलेसम्म ठगी गर्ने व्यक्ति पक्राउ पर्न सकेका छैनन् ।

लट्री परेकै प्रलोभन देखाएर अपरिचित गिरोहले जनकपुरधाम उपमहानगरपालिका–३ का बैजननाथ गिरीलाई समेत ठगेका छन् । प्रहरीका अनुसार १० असारमा उनलाई समेत २५ लाख रुपैयाँ लट्री परेको भन्दै ह्वाट्स एपमा फोन आएको थियो । सोही रकम भुक्तानी गर्न सरकारलाई कर तिर्नुपर्ने भन्दै गिरीबाट गिरोहले दुई पटकमा १ लाख ३५ हजार रुपैयाँ ठगी गरेको खुलेको छ ।

प्रहरीले गरेको अनुसन्धान तथा कारबाही पश्चात ठगले ६० हजार रुपैयाँ फिर्ता गरिसकेको र थप अनुसन्धान जारी रहेको प्रहरी नायब उपरीक्षक मिश्रले बताए । उनका अनुसार ठगिएका गिरी जनकपुरस्थित राजदेवी मन्दिरका पुजारी हुन् । पछिल्लो समय समाजिक सञ्जालसँगै विभिन्न माध्यमबाट चिट्ठा परेको भन्दै ठगी गर्ने गिरोह सक्रिय छन् । उनीहरूले गाउँघरका अशिक्षित मानिसलाई लक्षित गरी त्यस्ता सन्देश पठाएर ठगी गर्ने गरेको प्रहरी नायब उपरीक्षक मिश्रले बताए ।

जिल्ला प्रहरी कार्यालय धनुषाका अनुसार आर्थिक वर्ष २०७७-७८ मा मात्र समाजिक सञ्जालमार्फत ठगी गरेका १० वटा उजुरी परेका छन् । यद्यपि यसरी ठगिएकामध्ये थोरै व्यक्तिले मात्र प्रहरीमा उजुरी दिएका छन् । जिल्ला प्रहरी कार्यालय धनुषाका अनुसार प्रहरीमा आएका उजुरीमध्ये दुईवटा घटनामा मात्र अनुसन्धान तथा कारबाही हुन सकेको छ । बाँकी आठवटा मुद्दाका सम्बन्धमा हालसम्म अनुसन्धान जारी रहेको प्रहरी नायब उपरीक्षक मिश्रले बताए ।

लोभमा फसेर मानिसहरू आफ्नै गल्तीले ठगीको शिकार हुने गरेको उनले बताए । चिट्ठा परेको भनेर आउने म्यासेजका पछि नलागेर ठगबाट सतर्क रहन सबैलाई मिश्रले आग्रह गरे ।

प्रकाशित मिति: बिहीबार, असार ३१, २०७८ १३:५८