रोजगारदाता देशमा प्रयोग भएको छैन नेपालमा उपलब्ध कोरोना खोप, विदेशिन चाहनेहरू मर्कामा

रोजगारदाता देशमा प्रयोग भएको छैन नेपालमा उपलब्ध कोरोना खोप, विदेशिन चाहनेहरू मर्कामा

A+ A A-

सरकारले वैदेशिक रोजगारीमा जाने कामदारलाई प्रथामिकमा राखेर बुधबारदेखि भेरोसेल खोप लगाउन सुरु गरेको छ । तर, नेपाली कामदार जाने मुख्य रोजगारदाता देशमा यो खोपले मान्यता नपाएकाले वैदेशिक रोजगारीमा जान लागेकाहरू दुविधामा छन् ।

असार २८ गते खोप अनिवार्य गरिएका देशमा वैदेशिक रोजगारीमा जाने श्रमिकलाई भेरोसेल खोप लगाउने निर्णय भएको थियो । साथै शरणार्थीका लागि जोन्सनको खोप दिने सरकारी निर्णय छ । नेपाली श्रमिकको मुख्य रोजगार गन्तव्य कतार, कुवेत, ओमान, बहराइन साउदी अरब र यूएईमा भेरोसेल खोप प्रयोग गरिएको छैन । ती देशमा कोभिडविरुद्धका एस्ट्राजेनिका, मोडेर्ना, फाइजर र जोन्सन एन्ड जोन्सनको खोप प्रयोगमा छन् ।

विश्व स्वास्थ्य संगठन (डब्लूएचओ) ले फरक-फरक कम्पनीको खोप नलगाउन आग्रह गरेको छ । श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने कामदारका हकमा जोन्सन एन्ड जोन्सनको खोप लगाउन स्वास्थ्य तथा जनसंख्या मन्त्रालयलाई पत्रचार गरेको छ ।

श्रम, रोजगार तथा सामाजिक सुरक्षा मन्त्रालय

रोजगारीका लागि युरोपका देश जान लागेका कामदारको समस्या पनि उस्तै छ । हाल नेपालले लगाउँदै आएको कोभिड खोप युरोपका देशमा पनि प्रयोगमा आएको छैन । रोजागरीको गन्तव्य देशमा कुन खोपले मान्यता पाएको छ भनेर सरकार गम्भीर नभएको आरोप लाग्दै आएको छ ।

नेपालमा भेरोसेल र कोभिसिल्ड खोप लगाइँदै आएकामा बुधबारदेखि जोन्सन एन्ड जोन्सन खोप लगाउन थालिएको छ । खाडी र युरोपका देशले नेपालमा उपलब्ध जोन्सन एन्ड जोन्सनको खोपबाहेकका अरू दुई खोप प्रयोग गरेका छैनन् ।

कतारले भेरोसेललाई मान्यता नदिएकाले उक्त खोप लगाएर आएकाले कतारको स्वास्थ्य मापदण्डअनुसार क्वारेन्टाइनमा बस्नुपर्ने कतारका लागि नेपाली राजदूत डा. नारदनाथ भारद्वाजले जानकारी दिए । कतारमा मोडर्ना, फाइजर, एस्ट्राजेनिका र जोन्सन एन्ड जोन्सन खोप लगाइँदै आएको छ । कतार प्रवेश गर्ने विदेशी नागरिकले पनि यीनै खोप लगाउनुपर्ने मान्यता राखेको भारद्वाजले बताए । नेपालमा भेरोसेल खोप लगाएर आए पनि १४ दिन क्वारेन्टाइनमा बस्नुपर्ने उनको भनाइ छ ।

साउदी अरबमा पनि भेरोसेल खोप प्रयोग नगरिएको साउदीस्थित नेपाली दूतावासले जानकारी दिएको छ । साउदीले पनि एस्ट्राजेनेका, मोडर्ना, फाइजर र जोनसन एन्ड जोनसनको खोप प्रयोग गरिरहेको छ ।

स्वास्थ्य तथा जनसंख्या मन्त्रालय

यसैगरी, खाडीका अन्य देश ओमान, कुवेत र बहराइनले पनि एस्ट्राजेनेका, मोडर्ना, फाइजर र जोनसन एन्ड जोनसनको खोपलाई मात्र मान्यता दिएका छन् ।

जोन्सन एन्ड जोन्सनको खोप एक डोज लगाए पुग्छ । यो खोप लगाएपछि श्रमिक तुरुन्तै काम गर्ने देशमा जान पाउँछन् । भेरोसेल खोप भने दुई मात्रा लगाउनु पर्छ । पहिलो डोज लगाएपछि भेरोसेलको अर्को डोज लगाउन कम्तिमा तीन साता कुर्नुपर्ने हुन्छ । खोप कुर्दा रोजगारी गुम्ने सम्भावना हुने कामदारको गुनासो छ ।

यता, तत्कालका लागि वैदेशिक रोजगारीमा जाने कामदारका हकमा भेरोसेल खोपको विकल्प नभएको स्वास्थ्य तथा जनसङ्ख्या मन्त्रालयको खोप शाखा प्रमुख डा. झलक शर्मा गौतमले जानकारी दिए । सरकारले तत्काल छानी–छानी अन्य देशले मान्यता दिएका खोप लगाउन सक्ने अवस्था नभएको गौमतले बताए ।

हाल अमेरिकाले दिएको जोन्सन एन्ड जोन्सन सीमित मात्र भएकाले तत्काल सबैलाई पुर्‍याउन नसकिने उनको भनाइ छ । युरोपका देशले तत्काल फाइजर, मोर्डना, एस्ट्रोजेनेका र जोनसन एन्ड जोनसन गरी चारवटा खोपलाई मान्यता दिएर प्रयोगमा गरिरहेका छन् ।

वैदेशिक रोजागरीमा जाने कामदारलाई जोन्सन एन्ड जोन्सनको खोप उपलब्ध गराउन स्वास्थ्य मन्त्रालयलाई पत्राचार गरिएको श्रम मन्त्रालयका प्रवक्ता दीपक काफ्लेले जानकारी दिए । वैदेशिक रोजगारीमा जाने कामदारलाई जोन्सन एन्ड जोन्सन खोप उपलब्ध गराइने उनको भनाइ छ ।

नेपालले मान्यता दिएको र रोजगारदाता देशमा लगाइँने खोपमा फरक पर्दा घर बिदामा आएका कामदारलाई रोजगारीमा फर्किन समस्या भइरहेको गुनासो आउन थालेको वैदेशिक रोजगार विभागले जनाएको छ । विभिन्न देशबाट घरबिदामा आएका करिब ४० हजारले पुनः श्रम स्वीकृति लिएको विभागले जनाएको छ ।

प्रकाशित मिति: शुक्रबार, साउन १, २०७८ १३:०२