गुल्मी कांग्रेसमा आगामी नेतृत्व : पौडेल समूहका आकाङ्क्षी धेरै, माैका हेर्दै देउवा

गुल्मी कांग्रेसमा आगामी नेतृत्व : पौडेल समूहका आकाङ्क्षी धेरै, माैका हेर्दै देउवा

A+ A A-

कांग्रेस नेता चन्द्र भण्डारीको गृह जिल्ला गुल्मीमा नेपाली कांग्रेसको नेतृत्व कसले गर्ने भन्नेबारेमा चर्चा सुरु भएकाे छ । राष्ट्रिय राजनीतिमा प्रभाव राख्ने नेता भण्डारीले नेतृत्वमा कसलाई अघि सार्छन् भन्ने विषयलाई महत्त्वका साथ हेरिएको छ । जिल्लामा रामचन्द्र पौडेल र शेरबहादुर देउवाका छुट्टाछुट्टै समूह छन् । यी दुईमध्ये पौडेल समूह बलियो छ ।

त्यसो त, पौडेल समूहभित्रै नेतृत्वका आकाङ्क्षी धेरै भएकाले व्यवस्थापनमा चुनौती रहेको कांग्रेस कार्यकर्ताहरू नै बताउँछन् । अहिलेका जिल्ला सभापति भुवन श्रेष्ठ, पौडेल पक्षका मानिन्छन् । उनी नेतृत्वमा पुनः दोहोरिने चर्चा कार्यकर्तामाझ छ । पौडेल समूहभित्रैका हालका जिल्ला सचिव खिलध्वज पन्थी पनि सभापतिका आकाङ्क्षी हुन् ।

सभापति श्रेष्ठ र पन्थी दुवैले नेतृत्वमा आकाङ्क्षी देखिएपछि पौडेल समूहले कसलाई नेतृत्व सुम्पने हो, धेरैमा जिज्ञासा छ । श्रेष्ठलाई प्रदेश वा केन्द्रमा व्यवस्थापन गर्न सके अहिलेका सचिव खिलध्वज पन्थीलाई सभापति बनाउन सकिने कतिपय कांग्रेस नेताहरूको तर्क छ । केन्द्रीय नेताहरूलाई रिझाउन माहिर पन्थी श्रेष्ठलाई जसरी पनि पछाडि सारेर नेतृत्व आफूले लिन चाहिरहेका छन् ।

सभापति श्रेष्ठ नेपाली कांग्रेसको सबैभन्दा गढ मानिने रेसुङ्गा नगरपालिकाको नगरप्रमुखमा पराजित भएका व्यक्ति हुन् । कांग्रेसको किल्ला रेसुङ्गा नगरपालिकामा एमालेका डिल्ली भुसालसँग हारेका उनलाई त्यसपछि कार्यकर्ता व्यवस्थापन गर्न नसकेको, आफ्नै मत जोगाउन नसकेको आरोप लाग्दै आएको छ । ०५४ सालमा उनै डिल्लीराज भुसाललाई पराजित गर्दै भुवन श्रेष्ठ तम्घास गाविस अध्यक्ष भएका थिए ।

त्यस्तै, पार्टीका जिल्ला उपसभापति विष्णु बलाल पनि सभापतिका आकाङ्क्षी हुन् । अधिवक्तासमेत रहेका बलाल उपसभापति भएकाले स्वत: आफ्नो दाबेदारी सभापतिमा भएको कार्यकर्तामाझ बताउँदै आएका छन् ।

यता देउवा समूह भने पर्ख र हेरको अवस्थामा छ । जिल्लामा कमजोर रहेको देउवा पक्ष पार्टीभित्र आपसमा नलड्ने बरु सकेसम्म मिलेर जाने बताउँदै छ । देउवा समूहका छन्द पहराई, चन्द्र केसीले प्रदेश वा केन्द्रमा व्यवस्थापन हुने इच्छा देखाएपछि देउवा समूह अहिले कसलाई नेतृत्वमा उठाउने भन्ने अन्योलमा छ । छन्द पहराई गएको निर्वाचनमा गुल्मी क्षेत्र नं. २, ख मा नेकपाका उम्मेदवार दिनेश पन्थीसँग पराजित भएका थिए । त्यस्तै, चन्द्र केसी गुल्मी क्षेत्र नं. २ बाट प्रतिनिधिसभा सदस्यमा उठेका थिए । पूर्वजिल्ला विकास समिति सभापतिसमेत रहेका चन्द्र केसी गएको निर्वाचनमा गोकर्ण विष्टसँग पराजित भएका थिए ।

छन्द र चन्द्रले प्रदेश वा केन्द्रमा जाने इच्छा व्यक्त गरिरहेकाले देउवा समूहबाट महाधिवेशन प्रतिनिधि महेन्द्र भण्डारी सभापति दाबेदारका रूपमा देखिएका छन् । नेविसंघ केन्द्रीय उपाध्यक्षसमेत भइसकेका भण्डारी अहिलेका कांग्रेस जिल्ला सचिव खिलध्वज पन्थीसँग गएको जिल्ला अधिवेशनमा पराजित भएका थिए ।

त्यस्तै, देउवा समूहबाट सभापतिमा चर्चामा आएको नाम हो, वेदबहादुर थापा । हाल कालीगण्डकी गाउँपालिकाका अध्यक्षसमेत रहेका थापा सकेसम्म सहमतिमै नेतृत्व चयन हुनुपर्ने पक्षमा छन् । त्यसो नभए आफ्नो पनि उम्मेदवारी हुने कुरा उनले कार्यकर्तासामु राखेका छन् ।

त्यस्तै, अर्का नेता दामोदर भुसाल जिल्ला सभापतिमा दाबेदारको रूपमा चर्चामा छन । छन्द र चन्द्र दुवैलाई प्रदेश वा केन्द्रमा पठाउँदा जिल्ला नेतृत्वमा कमजोर उम्मेदवार हुने भएकाले देउवा समूहले छन्द वा चन्द्रमध्ये एकलाई नेतृत्व लिन अनुरोध गर्ने पनि कतिपय कांग्रेस नेताहरूकाे अनुमान छ । देउवा समूहबाट जिल्लामा यी दुवैको माहौल अरुको तुलनामा केही राम्रो छ ।

यीबाहेक कांग्रेस नेताहरू शालिक पन्थी, रविलाल ज्ञवाली, महिला नेतृ विष्णु सापकोटाले पनि जिल्ला नेतृत्वमा आकाङ्क्षा देखाएका छन् ।

के भन्छन् जिल्लाका नेता ?

नेपाली कांग्रेसका गुल्मी जिल्ला सभापति भुवन श्रेष्ठले नेतृत्व सर्वसम्मत बनाउने गरी छलफल अगाडि बढाइने बताए ।

जिल्लाको अधिवेशनमा निर्वाचन भएमा अब हुने स्थानीय, प्रदेश र संघको निर्वाचनमा त्यसको प्रत्यक्ष प्रभाव हुने भएकाले सकेसम्म नेतृत्वलाई सर्वसम्मत बनाउने प्रयास गरिने उनकाे भनाइ छ । साथै, उनले अहिले आफू सभापतिमा पुनः दोहोरिनेबारे भने केही भन्न नसकिने बताए । ‘सर्वसम्मतीको प्रयास हुन्छ । भर्खर म आफैँ हो जिल्ला सभापतिको आकाङ्क्षीभन्दा अप्ठ्यारो हुन्छ । सर्वसम्मत भएर अरु साथीहरू नेतृत्वमा आए मलाई स्वीकार्य छ’, उनले भने ।

त्यस्तै, जिल्ला सचिव खिलज्वज पन्थीले राजनीति गरेपछि नेतृत्वसम्म पुग्ने इच्छा सबैमा भएको बताउँदै आफू सभापतिको आकाङ्क्षी रहेको बताए । उनले सबै पार्टी नेताहरूसँग छलफल गरेर सबैको सहमतिमा नेतृत्वमा जाने उनकाे भनाइ छ ।

नेता वेदबहादुर थापाले सबैको सल्लाह सुझावबाट नेतृत्व लिनुपर्छ भन्ने अनुरोध आए आफू तयार रहेको बताए । आफू पनि सभापतिको आकाङ्क्षी रहेको तर सहमति, सहकार्यबाट अघि बढ्ने उनले सुनाए । पार्टीभित्र गुटउपगुट भएको आरोपसमेत कांग्रेसमा रहेको भन्दै गुल्मीबाट गुटगत समूह अन्त्य गरी नेतृत्व हस्तान्तरण गनुपर्नेमा उनकाे जाेड छ । त्यस्तै, कांग्रेस नेता महेन्द्र भण्डारीले सभापतिमा आफ्नो प्रबल दाबेदारी रहेको बताए ।

प्रकाशित मिति: बिहीबार, असार ३१, २०७८ ०६:४०