रघुजी पन्त भन्छन्- संसद् बचाउन देउवा सरकारमा एमाले जानुपर्छ (भिडियाे)

A+ A A-

एमाले नेता रघुजी पन्तले संसद् बचाउन एमालेले शेरबहादुर देउवा नेतृत्वकाे सरकारमा सहभागिता जनाउनुपर्ने बताएका छन् । शिलापत्रसँगकाे संवादमा उनले भने, 'हाम्राे (माधव नेपाल समूहकाे) उद्देश्य देउवालाई प्रधानमन्त्री बनाउनु मात्र हाेइन । संसद् र लोकतन्त्रको रक्षा गर्नु पनि हाे । त्यसैले देउवा सरकारमा एमाले पनि सहभागी हुनुपर्छ ।'

एमालेसहितको सहमतीय सरकार बनाउँदा स्थायित्व कायम हुने उनकाे तर्क छ । अर्को बाटो भनेको, सरकारमा नगई पनि देउवालाई गुण र दोषका आधारमा समर्थन गर्न सकिने उनकाे भनाइ छ । देउवाले विश्वासको मत लिने समय एक महिना बाँकी नै रहेकाले एमालेले त्यसबेलासम्म संस्थागत निर्णय गरिसक्ने उनले बताए ।

दुईतिहाइको सरकार आफ्नै कारण गएकाले अदालत वा अरु कसैलाई दोष दिनुभन्दा गल्ती गर्नेले आफूलाई सच्याउनुपर्नेमा उनकाे जाेड छ ।

नेता पन्तले संसद् विघटनलाई दुईदुई पटक अदालतले असंवैधानिक भनेको अवस्थामा प्रधानमन्त्रीदेखि राष्ट्रपतिमाथि पनि नैतिक प्रश्न उठेको बताए । संसद् विघटन गर्ने प्रधानमन्त्रीको कदम र त्यसलाई प्रतिगमन भनेर संघर्ष गरेको विषयमा पनि एमालेका कमिटीमा छलफल हुनुपर्ने उनकाे भनाइ छ ।

संसद् बचाउनको आफूहरूको समूहले विपक्षी गठबन्धनसँग सहकार्य गरेको बताउँदै उनले मुद्दाका आधारमा आगामी दिनमा पनि सहकार्य हुने बताए । संविधान र गणतन्त्रका लागि प्रचण्ड, माधव नेपाल, बाबुराम भट्टराई, शेरबहादुर देउवालगायतको सहकार्य पछिसम्मै आवश्यक रहेको पन्तकाे भनाइ छ ।