विद्यार्थीको चिन्ता- परीक्षा हलमा त्रिविले कसरी पालना गराउला स्वास्थ्य मापदण्ड ?

विद्यार्थीको चिन्ता- परीक्षा हलमा त्रिविले कसरी पालना गराउला स्वास्थ्य मापदण्ड ?

A+ A A-

त्रिभुवन विश्वविद्यालयले १० साउनदेखि सञ्चालन हुने गरी स्नातक प्रथम वर्षको कार्यतालिका सार्वजनिक गरेको छ । त्रिविले स्वास्थ्य मापदण्ड अपनाएर परीक्षा लिने भनेको छ । तर, विद्यार्थी भने विश्वस्त छैनन् ।

पशुपति बहुमुखी क्याम्पसमा स्नातक प्रथम वर्षमा अध्यनरत प्रनिशा पौडेल परीक्षा दिन कसरी जाने भन्ने अन्योलमा छिन् । त्रिविले स्वास्थ्य मापदण्ड अपनाएर परीक्षा सञ्चालन गर्ने भने पनि उनलाई विश्वास छैन । ‘कोरोना संक्रमण फेरि बढ्ने सम्भावना छ । खोप पनि लगाएको छैन,' उनले भनिन्, ‘घरबाट पनि यस्तोमा बरु परीक्षा नदिनु भन्नुहुन्छ । तर, मेरो पढाइ... ?' प्रनिशा पढाइ बचाउँदा जीवन नबाँच्ने पो हो कि भन्ने चिन्तामा छन् ।

प्रनिशाकै जस्तो चिन्ता छ सेन्ट लरेन्स कलेजमा ११ कक्षामा पढ्ने कामना काफ्लेको । परीक्षा भए कसरी दिने भन्ने उनको चिन्ता छ । कलेजले साउनमा भौतिक उपस्थितिमै परीक्षा सञ्चालन गर्ने संकेत दिइसकेको बताउँछिन् उनी ।

त्रिविले भने स्वास्थ्य मापदण्ड पूरा गरेर परीक्षा सञ्चालन गर्ने जनाएको छ । त्रिविले परीक्षा केन्द्रहरूको सङ्ख्या पनि बढाएको छ ।स्वास्थ्य मापदण्ड पूरा गरी परीक्षा सञ्चालनका लागि केन्द्रको संख्या बढाइएको त्रिविको भनाइ छ ।

तर, विद्यार्थीहरूमा भने भय कायमै छ । ‘पहिला खोपको व्यवस्था गर, अनि परीक्षा !' भन्दै कतिपय विद्यार्थीले विरोधसमेत जनाइरहेका छन् । परीक्षा हलमा त्रिविले स्वास्थ्य मापदण्डको पालना गराउन सक्नेमा विद्यार्थीहरूले शंका गरेका छन् ।

तस्वीर : सामाजिक सञ्जाल ।

निषेधाज्ञा खुकुलो हुँदै गएको र तेस्रो लहरले बालबालिकालाई असर गर्ने जनस्वास्थ्यविद्ले बताइरहँदा तत्काल विद्यालय खोल्न नहुने सरोकारवालाको मत छ ।

अभिभावक संघका अध्यक्ष सुप्रभात भण्डारी तत्काल विद्यालय खोल्ने वातावरण नरहेको बताउँछन् । फेरि संक्रमण बढ्न थालेको र नयाँ भेरिएन्ट भेटिन थालेकोले खोपको व्यवस्था नभइ विद्यालय खोल्नु नहुने उनको मत छ । ‘सबैतिर खुल्दा पठनपाठनको कार्य पनि गराउन हतार भइसकेको अवस्था छ,' उनले भने, ‘त्यसो भन्दैमा लापरबाही गरेर मनलाग्दी खोलिहाल्न मिल्दैन ।'

उनका अनुसार पहिला उमेर पुगेका विद्यार्थी, शिक्षक दुवैलाई खोप उपलब्ध गराउनुपर्छ । र, स्वास्थ्य मापदण्ड पूरा गरेर पठनपाठन सञ्चालन गर्ने तयारी गर्नुपर्छ । अहिलेको परीस्थितिमा निर्धक्क भएर पठनपाठन गर्ने स्थिति नरहेको उनी बताउँछन् । ‘फेरि यही बाहनामा पठनपाठन रोकिबस्ने कुरा पनि जायज हुँदैन,' उनले भने ।

शिक्षकहरुले पनि खोप उपलब्ध नभए भौतिक उपस्थितिमा हुने शिक्षण सिकाइमा सक्रियता नदेखाउने चेतावनी दिएका छन् । नेपाल शिक्षक महासंघका अध्यक्ष बाबुराम थापाले आफ्नो स्वास्थ्य संकटमा राखेर शिक्षकहरु कक्षाकोठामा गएर पढाउने काममा संलग्न हुन नसक्ने बताए ।

‘शिक्षक/विद्यार्थी सबैलाई खोप लगाएको अवस्थामा मात्र हामी कक्षाकोठामा उपस्थित भएर पढाउँछौँ,’ उनले भने, ‘हामी आफैँ त्रासपूर्ण वातावरणमा रहेर कसरी पढ्न/पढाउन सक्छौँ ?’

प्याब्सनका अध्यक्ष टीका पुरी तत्काल खोप पर्याप्त रूपमा आउने स्थिति नरहेकोले वैकल्पिक विधि नै उत्तम हुने तर्क गर्छन् । भौतिक उपस्थितिमै पढाउनु भन्ने हो भने खोपको व्यवस्था गर्नु आवश्यक रहेको उनको भनाइ छ । ‘अनलाइन कक्षामा निजी विद्यालयबाट करीब ५० प्रतिशत विद्यार्थी र सरकारीबाट जम्मा २० प्रतिशत उपस्थित हुन्छन्,' उनी भन्छन्, ‘त्यसैले भौतिक रूपमा पढाउन त हतारो भइसक्यो । तर, खोप नलगाइ कसरी पढाउने ?'

स्कुल कलेज खोल्ने हतारो नगरौँ : जनस्वास्थ्यविद् केदार बराल

विद्यालय र कलेज खोल्न हतार गर्न नहुने जनस्वास्थ्यविद केदार बरालको भनाइ छ । उनका अनुसार अहिले पनि सोचेजस्तो गरी संक्रमण घटेको छैन । समुदायमा गहिरोसँग भइरस फैलिएको उनी बताउँछन् । यो कुरालाई मध्यनजर गर्दै विस्तारै खोल्दै जानुपर्ने उनको भनाइ छ ।

‘सक्दाखेरी पहिला त सबैलाई खोपको व्यवस्था गर्नुपर्छ,' उनले भने, ‘अनि मात्र भाइरस केही हदसम्म नियन्त्रण होला । नत्र फेरि फैलने डर हुन्छ ।' खोप लगाएकाहरूले पनि जनस्वास्थ्यका मापदण्ड पालना गर्नुपर्ने उनी बताउँछन् ।

प्रकाशित मिति: सोमबार, असार २८, २०७८ १२:२१