रूपन्देही कांग्रेस : देउवा समूहका दुई गुट नमिले पौडेल पक्ष बलियो

A+ A A-

नेपाली कांग्रेसको १४औँ महाधिवेशन यही भदौ १६ देखि १९ सम्म काठमाडौंमा हुँदै छ । त्यसअघि १२ साउन २०७८ बाट तल्लो तहको अधिवेशन हुने निर्णय भएसँगै जिल्ला तहमा उम्मेदवार छनोटको विषयमा अहिले चर्चा सुरु भइरहेको छ । नेपाली कांग्रेसका प्रभावशाली नेता बालकृष्ण खाँडको गृहजिल्ला रूपन्देहीमा पनि नेतृत्व कसको हुने भन्ने बहस सुरु भएको छ । अहिलेका जिल्ला अध्यक्ष अब्दुल रज्जाक लगातार दोस्रो पटक जिल्ला नेतृत्वको जिम्मेवारी लिइसकेका कारण विधानतः उनी उम्मेदवार हुने छैनन् ।

त्यसैले जिल्लामा सभापति को हुने हो ? कुन पक्षले टिकट पाउला ? कसले जित्ला ? भन्ने विषयले चर्चा पाएको छ । लगातार दुई पटकसम्म जिल्लाको नेतृत्व रज्जाकले लिएकाले अहिले जिल्ला नेतृत्वमै कांग्रेसभित्र आधा दर्जनभन्दा व्यक्ति आकांक्षी देखिएका छन् । आकांक्षी हुनेहरू स्थानीय तह, प्रदेश र संघीय निर्वाचनमा पराजित भएका उम्मेदवारहरू छन् ।

त्यसो त, जिल्ला नेतृत्वमा देउवा र पौडल समूहबीच मुख्य प्रतिस्पर्धा छ । कृष्णप्रसाद सिटौलानिकट केही कार्यकर्ता पनि जिल्लामा छन् । त्यसैले सिटौला समूहका केही नेता पनि जिल्लाको नेतृत्वमा आकांक्षी देखिएका छन् । सिटौला समूहको दाबी ‘बार्गेनिङ’का लागि रहेको कतिपय कांग्रेस नेताहरू नै बताउँछन् ।

शेरबहादुर देउवाका विश्वासपात्र बालकृष्ण खाँडले जिल्लामा जसरी पनि आफ्नो पक्षले नेतृत्व गरोस् भन्ने चाहन्छन् । हालका सभापति रज्जाक देउवा पक्षका हुन् । त्यसैले अहिलेको जिल्ला नेतृत्वमा खाँडका भाइ रामकृष्णको पनि चर्चा छ । उनी अहिले जिल्ला सचिव छन् । दुई पटक निर्वाचित सचिव रामकृष्ण खाँडलाई सभापतिमा मुख्य दाबेदारको रूपमा लिइएको छ । उनी गएको स्थानीय तहको निर्वाचनमा तिलोत्तमा नगरपालिकाको नगरप्रमुखमा पराजित भएका थिए ।

यता देउवा समूहभित्रै जिल्लामा दुई पक्ष सक्रिय रहेको कांग्रेस कार्यकर्ताहरू बताउँछन् । देउवा समूहका बालकृष्ण खाँड र भरत शाह आफूनिकट नेतालाई सभापतिमा निर्वाचित गराउन चाहन्छन् । खाँडले सहोदर भाइ रामकृष्ण खाँडलाई मुख्य दाबेदारको रूपमा प्रस्तुत गर्दा भरत शाहनिकट मानिने फणिन्द्र शर्मा पनि जिल्ला नेतृत्वका आकांक्षी छन् । शर्मा अहिले जिल्ला उपसभापति छन् । तरुण दलका पूर्वजिल्ला अध्यक्षसमेत रहेका शर्मा गत निर्वाचनमा सैनामैना नगरपालिकाको नगरप्रमुखमा पराजित भएका थिए । त्यस्तै, नेपाल पत्रकार महासंघ रूपन्देहीका पूर्वअध्यक्षसमेत रहेका हरि लम्सालको पनि सभापति बन्ने आकांक्षा छ । लामो समय पत्रकारिता गरेको लम्साल हाल रूपन्देही क्षेत्र नं. २ का क्षेत्रीय सभापति हुन् ।

त्यस्तै, गत निर्वाचनमा रूपन्देही- २ बाट एमाले उपमहासचिव विष्णु पौडेलसँग पराजित भएका युवराज गिरी पनि जिल्ला अध्यक्षको आकांक्षी छन् । १९ वर्षसम्म नेपाली कांग्रेसको जिल्लाको कार्यसमितिमा रहेर काम गरेका कारण उनी सभापतिका बलिया दाबेदार हुन् ।

यता रामचन्द्र पौडेल समूहबाट जिल्ला नेतृत्वमा आकांक्षी देखिएकाहरू पनि स्थानीय तहको निर्वाचनमा पराजित भएकाहरू नै छन् । पौडेल समूहबाट रामचन्द्र ढकाल, अष्टभुजा पाठक, थानेश्वर घिमिरे र मातृका यादवको नाम चर्चामा छ ।

त्यस्तै, पूर्वजिल्ला सभापति रामचन्द्र ढकाल अहिले पुनः सभापतिमा आकांक्षी देखिएका छन् । अघिल्लो अधिवेशनमा महाधिवेशन प्रतिनिधिमा पराजित भएका ढकाल ११औँ महाधिवेशनको बेला जिल्ला सभापति भएका थिए ।

नेपाली कांग्रेसकै जिल्ला अधिवेशनमा हालका सभापति अब्दुल रज्जाकसँग पराजित भएका अष्टभुजा पाठक अहिले पनि जिल्लाको सभापतिमा आकांक्षी रहेको उनीनिकट कार्यकर्ताहरू बताउँछन् । पाठक हाल लुम्बिनी प्रदेशसभा सदस्यसमेत हुन् ।

पौडेल समूहबाटै सभापतिका आकांक्षी हुन् थानेश्वर घिमिरे । हालका जिल्ला सचिव रामकृष्ण खाँडसँग गएको जिल्ला अधिवेशनमा पराजित भएका घिमिरे सियारी गाउँपालिका अध्यक्षको उमेद्वार पनि बनेका थिए ।

त्यस्तै, पौडेल समूहबाट जिल्ला सभापतिमा चर्चामा आएको नाम हो मातृका यादव । रूपन्देही क्षेत्र नं. ३ का क्षेत्रीय सभापतिसमेत रहेका यादव अहिले जिल्ला नेतृत्वमा आकांक्षी देखिएका छन् ।

जिल्ला नेतृत्वका लागि आधा दर्जनभन्दा बढी आकांक्षी देखिएको भए पनि चर्चामा आएकाहरू भने यस विषयमा खुलेर बोल्न सकिरहेका छैनन् । नेपाली कांग्रेसको जिल्ला सभापति बन्न महाधिवेशन प्रतिनिधि चुनिनुपर्ने भएकाले पनि अहिले धेरैले यसबारे बताउन नचाहेको नेपाली कांग्रेसका नेताहरू बताउँछन् । महाधिवेशन प्रतिनिधिमा छनोट नभएको अवस्थामा जिल्ला नेतृत्वका लागि नेपाली कांग्रेसको विधानअनुसार योग्य हुँदैनन् ।

देउवा पक्ष नमिले पौडेल समूह बलियो

कृष्णप्रसाद सिटौलानिकट मानिने विद्यार्थी नेतासमेत रहेका मुक्तिराज पौडेललाई पनि जिल्ला सभापतिको दाबेदारको रूपमा चर्चा गरिएको छ ।

लामो समयदेखि नेतृत्व हस्तान्तरणको बहस चलिरहेकै बेला युवानेता पौडेललाई सभापतिको दाबेदारका रूपमा चर्चा गर्न थालिएको छ । त्यसो त देउवा समूहभित्रै दुई पक्ष (खाँड र शाह) बीच सहमति नभएमा सिटौला पक्षधरका आकांक्षीलाई पदाधिकारीमा तानेर नेतृत्व लिने रणनीतिमा छ, पौडेल पक्ष । त्यसैले देउवा पक्ष सर्वसम्मत उम्मेदवार छनोट गर्ने रणनीतिमा छ ।

के भन्छन् कांग्रेस नेताहरू ?

नेपाली कांग्रेस रूपन्देहीका सचिव रामकृष्ण खाँडले आफू जिल्लामा निर्वाचित सदस्य हुँदै दुई पटक सचिवसमेत भइसकेकाले स्वाभाविक रूपमा आफू सभापतिको दाबेदार रहेको बताए । उनले राजनीति गर्ने व्यक्ति जिल्लाको नेतृत्वमा पुग्ने इच्छा आकांक्षा हुनु स्वाभाविक रहेको भन्दै आफू पनि सभापतिको आकांक्षी रहेको बताए ।

‘दलीय व्यवस्थामा पार्टी मात्र होइन, टिम पनि हुने रहेछ । इच्छा मेरो पनि सभापतिमा छ । तर, नेतृत्व टिमले जे निर्णय गर्छ, त्यसैलाई शिरोधार्य गर्छु,’ उनले भने ।

जिल्ला उपसभापतिसमेत रहेका फणीन्द्र शर्माले महाधिवेशन प्रतिनिधि छनोट नहुँदासम्म आकांक्षीहरूको चर्चा हुनु उपयुक्त नहुने बताए । उनले उपसभापति बनिसकेकाले सभापतिमा स्वाभाविक दाबेदारी हुने भए पनि महाधिवेशन प्रतिनिधि छनोट नहुँदासम्म केही भन्न नसकिने बताए ।

‘दाबेदारी त छ, तर महाधिवेशन प्रतिनिधि नै भइएन भने त्यो चर्चाको के अर्थ ? त्यसैले हामीले वडा, नगरमा ध्यान दिएका छौँ । महाधिवेशन प्रतिनिधि भएपछि कसरी अगाडि बढ्ने भन्ने सल्लाह हुन्छ,’ उनले भने ।

नेपाली कांग्रेस रूपन्देही क्षेत्र नं. २ का क्षेत्रीय सभापति हरि लम्सालले सभापतिमा आफू पनि आकांक्षी रहेको बताए । यद्यपि उनले वडादेखि जिल्लासम्म सर्वसम्मत भएमा कांग्रेस आगामी निर्वाचनमा अझ बलियो बन्ने भएकाले सहमतिमा नेतृत्व छनोट भए टिमको निर्णयलाई स्वीकार गर्ने बताए ।

नेपाली कांग्रेस बुटवल नगरसभापति खेलराज पाण्डे क्षेत्रीय अधिवेशन भएर महाधिवेशन प्रतिनिधि नचुन्दासम्म आकांक्षीबारे केही थाहा नहुने बताए । उनले अहिलेसम्म कुनै पनि व्यक्तिका बारेमा आधिकारिक छलफल नभएको बताउँदै क्षेत्रीय अधिवेशनपछि मात्र जिल्ला नेतृत्वका लागि छलफल हुने बताए ।

युवानेता मुक्तिराज पौडेल जिल्ला सभापति लिन पौँठेजोरी खेल्ने पक्षमा नरहेको तर जिम्मेवारी आएमा जिम्मेवारीको भारी बोक्न तयार रहेको बताए । उनले पार्टीलाई एक ढिक्का बनाउन सबै मिलेर जानुपर्ने भन्दै सबैको इच्छा अनुरोध भएमा नेतृत्वमा जान तयार रहेको समेत उनले बताए ।

प्रकाशित मिति: सोमबार, असार २८, २०७८ ०७:४१