कामको खोजीमा भारत जानेको लर्को, असारयता गौरीफन्टा र गड्डाचौकीबाट २९ हजार नेपाली भारत पसे

कामको खोजीमा भारत जानेको लर्को, असारयता गौरीफन्टा र गड्डाचौकीबाट २९ हजार नेपाली भारत पसे

A+ A A-

कोरोना भाइरसको प्रकोप बढेसँगै नेपाल फर्किएकाहरू पुन: भारत जान थालेका छन् । पछिल्लो समय कोरोना भाइरसको संक्रमण केही घटेपछि सुदूरपश्चिमका नाकाबाट भारत जानेको सङ्ख्या बढ्दै गएको छ ।

धनगढीको फूलवारीका डम्बर लिसानी कोरोना संक्रमण बढेपछि नेपाल फर्किएका थिए । उनी अहिले पुन: भारत गएका छन् । शुक्रबार साँझ गौरीफन्टा नाका हुँदै उनी भारत गएका हुन् ।

‘बिहान बेलुकाको छाक टार्न समस्या भयो बालबच्चा पाल्नै भए पनि भारत नै जानुपर्ने बाध्यता छ,’ लिसानीले भने, ‘स्वदेशमै रोजगार पाए त किन जाने थिएँ र ?' नेपालमा रोजगारी नपाएपछि भारत जानु परेको उनले बताए ।

धनगढी १ का गणेश बिक पनि गौरीफन्टा नाका हुदै शुक्रबार भारतको बैङ्गलोर गए । उनी यसअघि पनि बैङ्गलोरको होटलमा काम गर्थे । भारतमा कोरोना संक्रमण बढेपछि नेपाल फर्किएका उनी पुन: भारत गएका हुन् ।

‘तीन वर्षदेखि होटलमा काम गर्थेँ । कोरोना बढेपछि नेपाल फर्किएको हुँ । अहिले सेठले बालाएको छन्,’ उनले भने । होटेल मालिकले कोरोना कम भयो भन्दै काममा बोलाएपछि जान लागेको बिकले बताए ।

धनगढीकै विनोद पार्की पनि भारत जाने तयारीमा छन् । उनी भारतको पुनामा काम गर्थे । कोरोना कहरले नेपाल फर्किएको र खर्च चलाउन गाह्रो भएपछि भारत जान लागेको पार्कीले बताए ।

जिल्ला प्रशासन कार्यालय कञ्चनपुरका अनुसार असार पहिलो सातादेखि भारत जाने नेपालीको सङ्ख्या बढेको छ । अहिले नेपाल आउनेको तुलनामा तीन गुणा बढी भारत गइरहेका छन् ।

अहिले गौरीफन्टा र गड्डाचौकी नाका भएर दैनिक करिब २ हजार नेपालीहरू भारत प्रवेश गरिरहेका छन् । कोरोना कहरमा नेपाल भित्रिनेको संख्या बढेकोमा अहिले भारत जानेको संख्या बढेको छ । यी नाका भएर अहिले दैनिक एक सयदेखि तीन सयसम्म नेपालीहरू भारतबाट स्वदेश फर्किरहेका छन् ।

शुक्रबार भारतबाट २ सय ६३ नेपाल फर्कँदा १७ सय ८७ जना भारत प्रवेश गरे ।

कञ्चनपुरस्थित प्रहरी चौकी पचगडीयाका इन्चार्ज खडकजंग शाहीका अनुसार पछिल्लो समय नेपाल भित्रिनेभन्दा बाहिरिनेको सङ्ख्या बढी छ । असार १ गतेदेखि २५ गतेसम्म भारतबाट ६ हजार ९ सय ९६ जना नेपाल फर्केकामा २९ हजार १ सय ८३ जना गौरीफन्टा र गड्डाचौकी नाकाबाट भारत पसेका छन् ।