लीलामदनको सादा बिल प्रकरण : पोलिक्लिनिकले दियो सवा लाख रुपैयाँ, पीडितसँग मिलापत्र

लीलामदनको सादा बिल प्रकरण : पोलिक्लिनिकले दियो सवा लाख रुपैयाँ, पीडितसँग मिलापत्र

A+ A A-

सादा बिल दिएर ठग्न खोजेको सिरहाको लहानस्थित लीलामदन पोलिक्लिनिक तथा प्रसूति गृहले पीडित बिरामीका आफन्तसँग मिलापत्र गरेको छ ।

क्लिनिकले पीडित परिवारलाई नै केही रकम दिएर घटना ढाकछोपको प्रयास गरेको हो । इलाका प्रहरी कार्यालय लहानमा क्लिनिकले पीडित परिवारलाई १ लाख २५ हजार रुपैयाँ दिएर मिलापत्र गरेको हो ।

दुवै पक्ष मिलेर आएपछि प्रहरीले मिलापत्र गरिदिएको लहानका डीएसपी डा. तपन दाहालले बताए । 'दुवै पक्ष बाहिरबाटै मिलेर आएपछि हामीले मिलापत्र गरिदिएका हौँ,' उनले भने, 'के-के मिलापत्र भयो, त्यो हामीलाई सबै थाहा छैन ।'

लीलामदनले दुई साता जनरल बेडमै उपचार गराएबापत सिरहा-१० का सुरेश मुखियालाई ५ लाख २१ हजारको सादा बिल दिएको थियो । सुरेशका आफन्तले उपचारकै क्रममा ३ लाख ७० हजार रुपैयाँ क्लिनिकमा बुझाएका थिए ।

क्लिनिकले बिरामी भर्ना लिन नपाउने प्रावधान भए पनि झण्डै २ सातासम्म सुरेशलाई भर्ना गरेरै राखेर असार १७ मा क्लिनिकका सञ्चालक डा. दिलीपकुमार साहले ५ लाख २१ हजारको सादा बिल दिँदै बाँकी १ लाख ५१ हजार रुपैयाँ थप तिर्न भनेका थिए ।

तर, ठूलो रकमको बिल देखेर अनौठो लागेपछि पीडित परिवारले सक्कली बिल मागेका थिए । सक्कली बिल दिन क्लिनिकले नमानेपछि पीडित परिवारले थप मागिएको पैसा दिन मानेनन् ।

पैसा नदिँदा सुरेशलाई क्लिनिकले बेडमै बन्धक बनाएर राख्यो । क्लिनिकले पीडित परिवारलाई घटनाबारे बाहिर केही भने बिरामीको अवस्था बिग्रनेसम्मको धम्की पनि दिएको थियो ।

पीडित बिरामीलाई बेडमै बन्धक बनाइएको समाचार शिलापत्रले १८ गते प्रकाशित गरेपछि प्रशासन अस्पताल पुगेर अवस्थाबारे जानकारी लिएर भोलि आउन भन्दै फर्किएको थियो । समाचार आएपछि र प्रहरी अस्पताल पुगेपछि तनावमा आएका डा. साहले बिरामीलाई भोलि बाहिरै बसेर कुरा मिलाउन भन्दै तत्कालै डिस्चार्ज दिएका थिए ।

तर, पीडित परिवार भने बाहिर नबसी इलाका प्रहरी कार्यालय लहान गएर आफूहरूमाथि अन्याय भएको भन्दै सञ्चालकलाई पक्राउ गरी सक्कली बिल दिलाइदिन र अवैध रूपमा लिइएको रकम फिर्ता पाऊँ भनी शनिबार उजुरी हालेका थिए । त्यसयता प्रहरीले दुवै पक्षलाई बसाएर साता ५-६ दिनसम्म घटना मिलाउन प्रयास गर्‍यो ।

छलफलमा प्रहरीले सक्कली बिल दिन अस्पताल सञ्चालक डा. साहलाई आग्रह त गर्थे, तर उनी मान्दै नमान्ने गर्दै आए । बरु, उनी घरि औषधि ब्ल्याकमा ल्याएको भन्दै बिल दिन नमिल्ने भन्थे, त घरि बाँकी पैसा तिरे मात्रै बिल दिने भन्दै आएका थिए ।यसरी अवैध र मनपरी रूपमा बिरामी लुट्न खोज्नेमाथि ‘क्विक एक्सन’ लिनुपर्नेमा प्रहरीले शनिबारयता दिनहुँ दुवै पक्षबीच छलफल गराउँदै आयो ।

प्रकाशित मिति: शुक्रबार, असार २५, २०७८ १२:२४