प्रदेश २ : निर्वाचन क्षेत्र विकास कोषमा सांसदलाई ४ करोड दिइने, बजेटमाथिको छलफल आजबाट

प्रदेश २ : निर्वाचन क्षेत्र विकास कोषमा सांसदलाई ४ करोड दिइने, बजेटमाथिको छलफल आजबाट

A+ A A-

आजदेखि प्रदेश २ सरकारले ल्याएको बजेटमाथि छलफल हुने भएको छ । लगातार दुई पटक स्थगित भएको प्रदेशसभा बैठक आज दिउँसो १ बजे बस्ने प्रदेशसभा सचिवालयले जनाएको छ ।

बैठकमा प्रदेश सरकारले ल्याएको अगामी आर्थिक वर्ष २०७८/०७९ को बजेटमाथि छलफल हुने कार्यसूची रहेको प्रदेशसभाका निमित्त सचिव रञ्जित यादवले जानकारी दिए ।

नेकपा एमाले र माओावादी केन्द्रका प्रदेशसभा सदस्यहरूले निर्वाचन क्षेत्र विकास कोषको रकम बढाउनुपर्ने माग गर्दै आएका थिए । माग पूरा नभएसम्म बैठक बस्न नदिने उनीहरूको अडान थियो । त्यस्तै, रातो किताब तयार नहुँदा दुई पटक बोलाइएको बैठक सूचना टाँस गरी स्थगित गरिएको थियो ।

प्रत्यक्ष निर्वाचित सांसदलाई ५ करोड र समानुपातिक सांसदलाई साढे २ करोड बजेट दिनुपर्ने एमाले र माओवादीका सांसदहरुको माग छ । एमालेका एक सांसदका अनुसार सत्ता पक्ष प्रत्यक्ष निर्वाचित सांसदलाई ४ करोड र समानुपातिक सांसदलाई डेढ करोड दिन तयार भएको छ ।

‘लिखित रूपमै सहमति त भइसकेको छैन । हाम्रा दलका नेताले प्रत्यक्ष निर्वाचितलाई ४ करोड र समानुपातिकलाई डेढ करोड दिने सरकारसँग सहमति भएको जानकारी गराउनुभएको छ । तर, मौखिक सहमतिको भर पनि छैन,’ उनले भने ।

निर्वाचन क्षेत्र विकासअन्तर्गत सांसदहरूको रकम नबढाइए प्रदेशसभा बैठक बस्न नदिने दुवै दलले अडान लिएपछि सत्ता पक्षसँग पटक-पटक छलफल भएको छ । तर, ठोस निर्णय भने भइनसकेको माओवादीका प्रमुख सचेतक दिलीप साहले जानकारी दिए ।

‘सत्ता पक्षले २५/५० लाख बढाउने कुरा गरिरहेको छ । तर, कति बढाउनेबारे हामीसित ठोस सहमति भएको छैन । छलफल चलिरहेकै छ,’ उनले भने । १ असारमा निर्वाचन क्षेत्र विकास कार्यक्रमको रकम बढाउन माग गर्दै एमाले र माओवादी केन्द्रले बजेट टेबल हुन रोकेपछि मुख्यमन्त्री लालबाबु राउतले सांसद क्षेत्र विकासका लागि रकम बढाउने आश्वासन दिएका थिए ।

राउतको आश्वासनपछि आर्थिक मामिला तथा योजनामन्त्री विजयकुमार यादवलाई बजेट टेबुल गर्न दिइएको थियो ।

प्रकाशित मिति: शुक्रबार, असार २५, २०७८ १२:१४