मेलिना र जुनु राई : ‘दंगल’ शैलीमा हुर्किएका दिदीबहिनी

A+ A A-

‘कम्मरमाथि पटुकी’, ‘शिरैमा शिरबन्दी’देखि ‘कुटुमा कुटु सुपारी दाना’सम्म । 'तिम्ले बाटो फेर्‍याै अरे,' ‘पिरिम नलाउने’देखि ‘नाच फिरिरि’सम्म । नेपाली सांगीतिक क्षेत्रका चर्चित गीत हुन् यी । जसमा स्वर छ, गायिका मेलिना राईकाे ।

युट्युबमा मेलिनाको आवाजमा रहेको गीतले १५ करोड भ्युज नघाइसकेकाे छ । लोक भाकादेखि आधुनिक गीतसम्म मेलिनाकाे आवाजमा सुन्न सकिन्छ । अझ, फिल्मको पार्श्वगायनमा त मेलिना सर्वाधिक खोजिने गायिकामा पर्छिन् ।

मेलिना हिजाेआज निकै व्यस्त छिन् । एकै दिनमा छवटा गीत रेकर्ड गरेर उनले यसको प्रमाण दिइसकेकी छन् ।

मेलिना स्टुडियोमा मात्र होइन, मेला-महोत्सवकाे समयमा उनकाे व्यस्तता ज्यादा नै हुन्छ । यसबाट अनुमान लगाउन सकिन्छ, मेलिना मनग्य कमाउने गायिका पनि हुन् ।

उनै मेलिनाको पदचाप पछ्याउँदै छिन्, बिहिनी जुनु राई पनि ।

जुनुले आधा दर्जन गीतमा आवाज भरिसकेकी छिन् । तर, गीतहरू औसत रहे ।

पछिल्लो समय मेलिना र जुनुले ‘कोही साथी’ बोलको गीतमा संयुक्त आवाज भरेका छन् । दुई महिनाअगाडि युट्युबमा सार्वजनिक भएको यो गीत नेपाली युट्युबको ट्रेण्डिङमा नै पर्‍यो । अहिले पनि सो गीतको चर्चा छ ।

युट्युबमा दर्शकले मेलिना र जुनु दुवैको तारिफ गरेका छन् । गीतबाट राम्रो प्रतिक्रिया पाउँदा दंग छन्, दुवै जना ।

उनीहरूले यो प्रशंसा त्यत्तिकै कमाएका होइनन्, त्यसका लागि निकै मिहिनेत र साधना गरेका छन् ।

‘दंगल’ शैलीमा हुर्किएका दिदीबहिनी

बलिउड अभिनेता आमिर खानको फिल्म 'दंगल' हेर्नुभएको छ ?

'दंगल'मा पहलमान बनेका आमिरले आफ्नो अतृप्त इच्छालाई पूरा गर्न आफ्ना छोरीहरूलाई कठोर संघर्ष गराउँछन् । मैदानमा उतार्नअघि भरपूर अभ्यास गराउँछन् । अन्तत: पहलमानले आफ्नो सपना पूरा गर्छन् ।

यता मेलिना र जुनुको कथा पनि दंगलका दुई छोरीहरूकै जस्तो छ । ‌दंगलमा छोरीहरू कुस्तीको मैदानमा उत्रिन्छन्, मेलिना र जुनु संगीतिक मैदानमा उत्रिएका छन् ।

दंगल फिल्मका पहलमानजस्तै छन्, मेलिना र जुनुका बुबा जीवेश राई ।

जीवेश संगीतका शिक्षक हुन् । सांगीतिक दुनियाँमा स्थापित हुने सपना उनले पूरा गर्न सकेनन् । अन्तत: आफ्नो सपना उनले छोरीहरूबाट पूरा गर्ने सोच बनाए ।

आमा, बुबा, मेलिना र जुनु । उनीहरूको चार जनाको परिवार थियो । घरको नियम निकै कडा ।

बिहानको ४ बज्नासाथ मेलिना र जुनुले ओछ्यान छोड्नुपर्थ्यो । अल्छी मानेर अलिकति ढिला गरे बुबा पानी बोकेर ओछ्यानमै आइपुग्थे । कि त ओछ्यानमा भिज्नुपर्थ्यो, कि त सिर्कनु खानुपर्थ्यो ।

जाडोमा पानीले रुझ्नुभन्दा त उनीहरूले ४ बज्नासाथ ओछ्यान छाड्थे । घामको झुल्को जमिनमा पर्नुअगावै मेलिना र जुनु 'सारेगम' गाउन थाल्थे ।

मेलिना भन्छिन्, 'साधना गर्ने भन्ने कुरा सजिलो छैन । यो उमेरमा पनि साधना गर्न गाह्रो हुन्छ । झन् त्यो बाल्यकालमा हामीलाई कति गाह्रो भयो होला ?'

घरको नियम बिहान उठेर साधना गर्ने मात्र कहाँ थियो र ? मेलिना र जुनुले बाहिर केही खानै पाउँदैनथिए । चिल्लो, अमिलो केही खानै नपाइने । चिसोका नाममा फेन्टाबाहेक उनीहरूले अन्य चीज त चाख्न पनि पाउँदैनथे ।

'साथीहरूले तितौराहरू खान्थे, चटपटे खान्थे । हामीले त्यो बेला केही चाख्नै पाएनौँ,' जुनुले बाल्यकाल सम्झिइन् ।

अहिले मेलिना स्थापित गायिका बनेकी छिन् । जुनु सांगीतिक दुनियाँमा आफ्नो प्रभाव छोड्न संघर्ष गरिरहेकी छिन् ।

उनीहरूको यो सफलतामा मेलिना र जुनुभन्दा बढी खुसी को होला ?

नि:सन्देह बुबा जीवेश राई । उनी आफ्ना छोरीहरूको कामबाट गद्‌गद नै छन् ।

जीवेशले पहिलाजस्तो अहिले छोरीहरूलाई नियममा बाँधेका छैनन् । मेलिना र जुनु आफैँ साधनामा लिप्त भइरेहका हुन्छन् । तर, बुबाले खान नदिएको तितौरा र चटपटे भने उनीहरूले मनलागेजति खान पाएका छन् ।

'अहिले त हामीले जति चटपटे खाए पनि बुबाले गाली गर्नुहुन्न,' चञ्चलता देखाउँदै बहिनी जुनुले सुनाइन् ।

मेलिनाको संघर्ष र सफलतामा साक्षी जुनु

मेलिनाले आफ्नो करिअर कोरसगायनबाट सुरु गरेकी हुन् । कोरसगायनमा लामो समय बिताएकी मेलिनाको चिनजान ताराप्रकाश लिम्बूसँग भयो । राम्रो गाउन सक्ने खुबी देखेपछि ताराप्रकाशले मेलिनालाई 'नोभेम्बर रेन'को 'पलभरमै खुसी' बोलको गीतमा गाउने अवसर दिए ।

उक्त गीतमा मेलिनाले तेस्रो पात्रका लागि आवाज दिएकी थिइन् । त्यसैले मेलिनाको भन्दा गायक युवराज चौलागाईं र रजिना रिमालको चर्चा बढी चल्यो ।

उक्त गीतपश्चात् सांगीतिक दुनियाँमा भने मेलिनाको चर्चा सुरु भयो । फलत: संगीतकार वसन्त सापकोटाले मेलिनालाई फिल्म 'नाइँ नभन्नू ल ३' को 'कम्मरमाथि पटुकी' बोलको गीत गाउने अवसर दिए । उक्त गीत निकै हिट भयो । गीतसँगै हिट भइन्, मेलिना राई पनि ।

मेलिना हिट हुँदाको साक्षी बनेकी थिइन्, बहिनी जुनु ।

२०७२ सालको भूकम्पको समय । उनीहरू बसिरहेको घर केही चर्किएपछि उनीहरू कोठा सर्न लागे । मेलिना र जुनु कोठाको सामान सार्दै थिए ।

हाउडे शैलीमा बाटोमा हिँडिरहेकी मेलिनाले छेवैमा रहेको मोबाइल पसलमा आफूले गाएको गीत 'कम्मरमाथि पटुकी' बजिरहेको सुनिन् । उत्साहित हुँदै जुनुलाई सोधिन्, 'यो गीत मैले गाएको भनेर कसले चिन्छ र है ?'

जुनुले जवाफमा भनेकी थिइन्, 'कुनै दिन पक्कै चिन्नेछन् ।'

नभन्दै त्यो दिन आयो । मेलिनाले स्वर दिएको 'तिम्ले बाटो फेर्‍यौ अरे' गीत हिट भएसँगै मेलिनालाई चिन्ने धेरै भए । कहीँ कतै निस्किँदा फोटो खिच्नेको भिड लाग्न थाल्यो । त्यसको साक्षी बनिन्, जुनु ।

जुनु भन्छिन्, 'मैले मेलिनाको साधना देखेकी छु, सफलता पनि देखेकी छु ।'

सहयोगी पनि, आलोचक पनि

मेलिना र जुनु आफूले गाउने गीतको छनोटमा एकअर्काको साथ खोज्ने गर्छन् । कस्तो गीत गाउने ? कस्तो गीत नगाउने ? दुवैले एकअर्कामा सल्लाह गर्ने गर्छन् । विशेषत: शब्दका छनोटमा उनीहरू एकअर्कालाई सहयोग गरिरहेका हुन्छन् ।

मेलिना भन्छिन्, 'मैले प्राय: गीतका शब्दहरू पाएपछि जुनुलाई सोध्ने गर्छु । उनले मलाई गीत छनोटमा धेरै सहयोग गर्छिन् । उनले पनि मलाई सोधिरहेकै हुन्छिन् ।'

सहयोग मात्र होइन, मेलिना र जुनु एकअर्काको आलोचक पनि हुन् । गीतमा मेलिनाले गरेको कमजोरीलाई जुनुले औल्याउँछिन्, जुनुको कमजोरीलाई मेलिनाले औल्याउँछिन् ।

'प्राय: मान्छेहरूले झुटो तारिफ गरिरहेका हुन्छन् । तर, आफन्तले त कहिल्यै झुटो कुरा गर्दैनन्,' जुनु भन्छिन्, 'हामीले सकेसम्म एकअर्कालाई सुधार्नका लागि नराम्रा कुराहरू पनि भनिरहेका हुन्छौँ ।'

जुनुका कुरालाई सहमति जनाउँदै मेलिनाले थपिन्, 'हामी नै हाम्रा आलोचक हौँ ।'

मेलिनालाई संगीत गर्ने रहर, जुनुको चुनौती नै मेलिना

आजसम्म मेलिनाले झण्डै २ हजारभन्दा बढी गीतमा आवाज भरेकी छिन् । ती सबै गीतहरू अरुकै शब्द तथा संगीतमा तयार भएका छन् । जसमा मेलिनाले आवाज मात्र भरेकी छिन् ।

अब भने मेलिनाको सपना फरक छ, उनी आफैँ शब्द कोर्न चाहन्छिन् । आफैँ संगीत सिर्जना गर्न चाहन्छिन् ।

'अरुले तयार पारेको शब्द/संगीतमा गीत गाउन त निकै सजिलो छ । तर, आफैँले गर्न गाह्रो कुरा हो,' मेलिना भन्छिन्, 'अब भने म आफैँ शब्द तथा संगीतको पनि काम गर्न चाहन्छु ।'

जोखिम मोलेर नै शब्द/संगीतको काम गर्ने जोसमा छिन्, मेलिना ।

यता दिदीसँगै साधना गरेर आएकी जुनुको परिचय 'मेलिना राईकी बहिनी'का रूपमा स्थापित हुँदै छ । यो जुनुका लागि चुनौती हो । उनी आफ्नै परिचय बनाउन चाहन्छिन् ।

जुनु आफू दिदीजस्तो हुन्छु भन्ने कुरामा विश्वस्त छैनन् । उनी भन्छिन्, 'मेलिनाले सांगीतिक क्षेत्रमा बनाएको क्रेजलाई भेट्छुजस्तो मलाई लाग्दैन । तर, प्रयास गर्ने हो । कुनै दिन पुगिएला कि !'

मेलिना जुनुलाई आशीर्वाद दिन्छिन्, 'मेरी बहिनी मभन्दा सफल होस् ।'

प्रकाशित मिति: बिहीबार, असार २४, २०७८ १२:१९