सुजिताकी आमाकाे बिलाैना- नआत्तिनुस् जागिर खाएर तपाईंहरूलाई हेर्छु भन्थी, आज यस्तो देख्नुपर्‍यो

सुजिताकी आमाकाे बिलाैना- नआत्तिनुस् जागिर खाएर तपाईंहरूलाई हेर्छु भन्थी, आज यस्तो देख्नुपर्‍यो

A+ A A-

शहरी इलाका भए पनि सुजिताको घर जस्तापाताले छाएको कच्ची छ । पानी नचुहियोस् भनेर जस्तापातामा ठाउँ–ठाउँमा त्रिपालले छाेपिएकाे छ । कमाउने भएपछि त्याे चुहिने घर पक्की बनाउने सुजिताकाे सपना थियाे । तर, त्याे सपना पूरा नहुँदै उनी अस्ताइन् ।

सिंगाे गाउँ शाेकमा डुबेको छ । आफन्तसँग शाेकाकुल परिवारलाई सम्झाउने कुनै शब्द छैन । स्थानीयमा आक्रोश छ ।शिलापत्रकर्मी सुजिताकाे घरमा पुग्दा स्थानीय भन्दैथिए, ‘हामीले सुजिताको अपहरण भयो भन्दा समेत खोजी भएन । अब न्याय के आशा गर्नू !’

सुजिताको मृत्युले छट्पटिएकी दिदी कविता भण्डारीका आँखा नओभाएको हप्ता दिन भयो । ‘अघिल्लो दिन नै साथीको घरमा जान्छु भनेकी थिइ । बिहान कति बेला गइछे, थाहा नै भएन,’ आँसुले टिलपिलाएको आँखा पुछ्दै कविताले भनिन् ।

No description available.

दिउँसो १२ बजे आमा अम्बिका भण्डारीलाई सुजिताले छ पटकसम्म फोन गरेकी थिइन् । मिस्डकल देखेपछि आफूले कलब्याक गर्दा बहिनीले रुँदै आफूलाई बचाउन आग्रह गरेको कविता बताउँछिन् । ‘बहिनीले रुँदै बाटोमा हिँडिरहेका बेला कारमा आएका महिला र पुरुषले सौराहा चोक जाने बाटो सोधे र टाउकोमा हानेर पट्टी बाँधेर राखेको छ । मलाई बचाउनू भनेकी थिइ,’ सुजितासँगको अन्तिम कुराकानीबारे कविताले भनिन् ।

सुजिताले १२ बजेर ४२ मिनेट र १२ बजेर ४४ मिनेटमा पूर्वपट्टि भनेर एसएमएस गरेको पनि उनी बताउँछिन् । बहिनी अपहरणमा परेको खबर इलाका प्रहरी कार्यालय भण्डारामा समयमै दिँदा पनि प्रहरीले बेवास्ता गरेको आरोप परिवारकाे छ ।

सुजिलाले सधैँ ढाडस दिने गरेकाे सम्झिँदा आमा अम्बिकाले गला अवरूद्ध भयाे । उनले भावविह्वल हुँदै भनिन्, ‘तपाईंहरू नआत्तिनुस्, म जागिर खाएर आमाबुबा र भाइलाई हेरिहाल्छु नि भन्थी । आज यस्तो देख्नु पर्‍यो ।’

छोरीको पढेर केही गरौँ भन्ने सोच रहेकाे उनी बताउँछिन् । भन्छिन्, ‘हामीले पढाइका लागि भनेर काममा पनि लगाएनौं । ऊ पनि पढाइमै मात्र व्यस्त हुन्थी । बाहिर हिँडडुल पनि कम गर्थी ।'

छोरीले आत्महत्या गरेको नभई हत्या गरिएको आरोप उनको छ ।

छिमेकी राधा तिवारीलाई सुजिता अब जिवित छैनन् भन्ने कुरा पत्याउनै हम्मेहम्मे पर्‍याे । उनी भन्छिन्, ‘राम्रो स्वभाव थियो । पढाइ पनि राम्रो थियो । गाउँकै इज्जत राख्ने केटी थिइन् । अहिले यस्तो भयो । छिटोभन्दा छिटो न्याय मिलोस् ।’

सुजिता घरनजिकैको राप्ती बुद्ध शान्ति बहुमुखी क्याम्पसमा स्नातक चौथो वर्षको परीक्षा दिएर बसेकी थिइन् । उनी चार दिदीबहिनी मध्येकी कान्छी हुन् ।

सुजिता मृत्युले अशान्त पूर्वी चितवन

शहरी इलाका चितवन पूर्वपश्चिम राजमार्ग गडौली चोकदेखि २ सय मिटरभित्र मात्रै पर्छ, राप्ती नगरपालिका–३, प्रगति टोल । सधैँ सुनसान रहने उक्त टोल केही दिनदेखि तनावग्रस्त छ । कारण हो– सुजिता भण्डारीको मृत्यु ।

११ असारदेखि बेपत्ता भएकी २३ वर्षीया भण्डारीको नौ दिनपछि आइतबार साँझ शव फेला परेको थियो । उनको हत्या गरियाे वा आत्महत्या गरिन भन्ने अझै खुल्न सकेको छैन । मंगलबार टिचिङ अस्पतालमा भएको पोस्टमार्टम रिपोर्टमा समेत उनको मृत्युको प्रस्ट कारण खुलेको छैन ।

सुजिताको मृत्युको कारण खोज्न अब भिसेरा परीक्षणको रिपोर्ट कुर्नुपर्ने भएको छ । सुजिताका आफन्तले भने उनको अपहरणपछि हत्या भएको बताउँदै गहिराे अनुसन्धानकाे माग गरिरहेका छन् ।

प्रहरीले परिवारको आक्रोशलाई इन्कार गर्न नसके पनि अहिले नै यसै हो भन्नसक्ने अवस्थामा नरहेकाे बताउँदै आएको छ । ‘मृत्युको कारण नखुल्दै हामीले अहिले नै केही भन्न सक्ने अवस्था छैन । तर, परिवारको कुरालाई पनि ध्यानमा राखेर अनुसन्धान थालेका छौँ । अन्य कारणको पनि खोजी गर्दैछौँ,’ प्रहरीको केन्द्रीय अनुसन्धान ब्युरो (सीआईबी)का प्रमुख डीआईजी धीरजप्रताप सिंहले भने ।

सुजिताको शव राप्तीकै ब्रह्मस्थली सामुदायिक वनको घना जंगलमा फेला परेको थियो । छिमेकी गाउँ धमिलीका चेपाङले जंगली च्याउ टिप्न जाँदा शव देखेपछि प्रहरीलाई खबर गरेका थिए ।

No description available.

प्रहरी टोलीले घटनास्थलनजिक धानमा लाग्ने कीरा मार्न प्रयोग हुने विषको बोत्तलसमेत फेला पारेको थियो । त्यसबाहेक मंगलबार प्रहरीले सुजिताले प्रयोग गर्दै आएको मोबाइल बिना सिमकार्ड फेला पारेको छ । जिल्ला प्रहरी कार्यालय चितवनका प्रमुख एसपी ओमप्रसाद अधिकारीले पनि हत्या वा आत्महत्याबारे अझै यकिन भइनसकेको बताए । घटना अझै अनुसन्धानकै चरणमा रहेको उल्लेख गर्दै उनले भने, ‘अहिले हामी अनुसन्धानको प्रारम्भिक चरणमा छौँ ।'

'अपहरणमा परेँ' भनेर गरिएको फोन कलका आधारमा पनि प्रहरीले अनुसन्धान अघि बढाएका छ । अहिलेसम्म भेटिएका अन्य प्रमाणका आधारमा अनुसन्धान जारी रहेकाले अहिले नै केही भन्न नसकिने एसपी अधिकारीले बताए ।

प्रकाशित मिति: बुधबार, असार २३, २०७८ १९:४६