खोप केन्द्रमा निर्देशकलाई नागरिकको प्रश्न- हाम्रा लागि खोप खोई ? (भिडियोसहित)

खोप केन्द्रमा निर्देशकलाई नागरिकको प्रश्न- हाम्रा लागि खोप खोई ? (भिडियोसहित)

A+ A A-

निजामती कर्मचारी (सिभिल) अस्पताल नयाँ बानेश्वरमा कोरोनाविरुद्धको खोप लगाउन पुगेका मानिसको लाइन अस्पताल परिसरबाट मिनभवनस्थित नापी विभागमा पुगेको थियो । मंगलबार बिहान ५ बजे नै खोपका लागि मानिस अस्पतालको गेटमा पुगेका थिए । लाइन मिलाउन प्रहरीको टोलीलाई हम्मेहम्मे परेको थियो । सामाजिक दूरी त परको कुरा ।

‘लाइनमा बस्नुहोस्, दूरी कायम गर्नुहोस्,’ प्रहरीले अस्पताल परिसमा बारम्बार माइकिङ गरिरहन्छन् । तर, थेग्नै नसक्ने लाइन र कोलाहलले प्रहरीको आवाज नै अलप हुन्छ । ‘टोकन भएका लाइनमा बस्नहोस् अरुलाई आज खोप छैन,’ प्रहरीले लाइनमा बसेकालाई भन्छन् । टोकन नभएकाहरू खोप नपाइने भएपछि आक्रोश पोख्न थाल्छन् ।

‘टोकन लिन भोलि बिहान ५ बजे आउनु भनेको छ । खोप पनि नपाइने भयो । लाइनमा बसेर झन् कोरोना सर्ने देखियो । यतिबेलासम्म जोगिएको थिएँ,’ ललितपुर चागाथलीबाट आएकी ६४ वर्षीया सरिता राणा भन्छिन्, ‘अब लाइनमा पनि नबस्ने आज खोप पनि नलगाउने ।’

टोकन नभएकाहरू खोप चाहियो भन्दै अस्पतालको प्राङ्गणमा चिच्याउँदै थिए । जनस्वास्थ्य कार्यालयका निर्देशक बद्री खड्का अस्पतालको प्राङ्गणमा आइपुगे । खोपको प्रतीक्षामा बसेका नागरिकले निर्देशक खड्कालाई घेरिहाले । पहिलो मात्रा खोप लगाएको कार्ड देखाउँदै निर्देशक खड्कालाई उनीहरूले प्रश्न गर्न थाले, ‘हाम्रो लागि खोप खोई ?’

निर्देशक खड्काले तत्कालै प्रतिवद्धता जनाए, ‘अब टोकन चाहिँदैन । पहिलो मात्रा लगाएका सबैले दोस्रो मात्रा पाउनु हुन्छ । आज भ्याइएन भने चार दिनपछिसम्म लगाउने व्यवस्था मिलाउँछु ।’ निर्देशक खड्काको प्रतिवद्धतासँगै आक्रोशित देखिएकाहरू साम्य भए र लाइनमा बसे । सिभिल अस्पतलमा मंगलबारका लागि ६ सय डोज खोप उपलब्ध गराइएको रहेछ । तर, टोकन लिएका ५ सयले १२ बजेसम्म खोप लगाइसकेका थिए । लाइन नापी विभाग पुगेको थियो । निर्देशक खड्काले थप खोप मगाएर ४ बजेसम्म लगाउने व्यवस्था मिलाएर फर्किए ।

जनस्वास्थ्य कार्यलयबाट आएकी सुपरभाइजर सिर्जना धानुक भन्दै थिइन्, ‘अब ४ बजेसम्म खोप लगाउन पाइन्छ । बिहान ल्याएको खोप सकियो । थप खोप आउँदै छ ।’ खोप आउने खबरले चर्को घाममा लाइनमा बसेकाहरू उत्साहित देखिन्थे । खोप केन्द्रमा परराष्ट्रका कर्मचारी पहिलो डोज लगाउन मन्त्रालयको पत्र बोकेर आएका थिए ।

‘दोस्रो डोज लगाउन लागिएको हो पहिलो मात्रा मिल्दैन,’ खोपको व्यवस्थापनमा खटिएका अस्पतालका माइक्रो बायोलोजिस्ट मनोज महतोले ती कर्मचारीलाई भन्दै थिए, ‘कार्ड छैन कसरी लगाउने, केमा रेकर्ड राख्ने ?’

खोप लगाउनेहरूको उत्साह

खोप लगाउनेहरूको खोप केन्द्रमा उत्साह देखिन्थ्यो । ‘पहिले डर थियो । खोप लगाएपछि कोरोना महामारी जितेझैँ भयो,’ ‘६२ वर्षीय नेत्रबहादर खड्का भन्छन्, ‘अब मनमा शान्ति भयो । अब त कोरोना नलाग्ला नि है ।’ संगम चोकबाट आएकी उर्मिला जोशी खोप लगाएसँगै अमेरिका जाने बाटो खुलेकोमा खुसी व्यक्त गर्दै थिइन् ।

‘बिहान श्रीमान टोकन लिन आउनु भएको थियो । टोकन नपाएपछि आफैँ आएकी हुँ । खोप लगाएपछि अमेरिका जानु छ,’ उनी भन्छिन् ।

०००

शुक्रराज ट्रपिकल तथा सरुवा रोग अस्पताल टेकुको दृश्य भने फरक थियो । दुई हप्ताअघिसम्म अस्पतालको प्राङ्गण कोभिडका बिरामीले भरिएका थिए । पार्किङमै बेड राखेर उपचार गरिएको थियो । बिरामी निको भएर घर फर्किएपछि त्यही ठाउँमा खोप केन्द्र बनाइएको छ । हिजो बिरामीले उपचार पाइरहेका हुन्थे, आज खोप पाइरहेका छन् । टेकुमा पनि बिहान ५ बजे नै खोपका लागि मानिस ढोका ढकढकाउन पुगेका थिए । ‘बिहान आउनै पर्दैन । खोप १० बजेपछि लगाउने हो । खाना खाएर आए हुन्छ,’ अस्पतालका निर्देशक डा. अनुप बाँस्तोला भन्छन्, ‘हामीले व्यवस्थापन गरेका छौँ, जनशक्ति पनि छ । खोप आउने प्रतिवद्धता पनि आएको छ ।’

०००

कोरोना भाइरसविरुद्धको पहिलो मात्रा भेरोसेल खोप लगाएकालाई मंगलबारदेखि दोस्रो डोज लगाउन थालिएको हो । २५ जेठदेखि २९ गतेसम्म पहिलो मात्रा लगाएका ६० देखि ६४ वर्ष उमेर समूहका नागरिकलाई दोस्रो मात्रा खोप लगाउन लागिएको हो । यद्यपि अघिल्लो चरणमा भेरोसेलको दोस्रो मात्रा लगाउन छुटेकाले पनि खोप पाउने छन् । नेपालमा अहिलेसम्म २५ लाख १९६ जनाले पहिलो मात्रा र सात लाख ३१ हजार ६५३ जनाले दोस्रो मात्रा खोप लगाएका छन् ।