सर्वाङ्ग अस्पतालको ठगी : कोरोनाको उपचार गर्दा तिरेको बिल सम्झेर झस्किरहन्छन् सुडान (भिडियो)

सर्वाङ्ग अस्पतालको ठगी : कोरोनाको उपचार गर्दा तिरेको बिल सम्झेर झस्किरहन्छन् सुडान (भिडियो)

A+ A A-

झुस्स दाह्री । टाउकोमा पहेँलो रङको पगरी । सोफासँगैको टेबुलमा तातोपानीको थर्मस र स्टिलको गिलास । सोफामै छरपस्ट छन्, औषधिका पत्ताहरू ।

एक महिनादेखिको बिरामीले गलेका ६५ वर्षीय इन्दरसिंह सुडानको शरीरमा हड्डी र छाला मात्र देखिन्छ । कोभिड जितेर अस्पतालबाट घर फर्किँदा जति खुशी हुनुपर्ने हो त्यो उनको अनुहारमा देखिँदैन । अब बाँचिन्छ भन्ने आशा त पलाएको छ । त्योभन्दा ज्यादा अस्पतालले गरेको ठगीले पिरोलिएका छन् । उनी भन्छन्, ‘अस्पतालले उपचारभन्दा ज्यादा पैसा लुटेर बेहाल बनायो ।’

श्वासप्रश्वासमा समस्या आएपछि उनी २६ वैशाखमा कुपण्डोल कोठा नजिकैको सर्वाङ्ग स्वास्थ्य सदन प्रालि अस्पतालमा भर्ना भएका थिए । एक दिन अस्पतालको इमर्जेन्सी कक्षमा राखियो । अर्को दिन आईसीयू कक्षमा सारिएको थियो । उनीसँगै भर्ना भएका कतिपय बिरामीले उनकै आँखा अगाडि ज्यान गुमाए । कतिपय निको भएर डिस्चार्ज पनि भए ।

सुडानले पनि आफ्नो स्वास्थ्यमा समस्या नभएको भन्दै अस्पतालबाट डिस्चार्ज गर्न अनुरोध गरेका थिए । तर, अस्पतालले स्वास्थ्य अवस्था गम्भीर रहेको भन्दै डिस्चार्ज गर्न मानिरहेको थिएन । आफन्तलाई आईसीयूमा राखेका बिरामीको अवस्थाले चिन्तित बनाएको थियो । कोरोना संक्रमित भएका कारण भेट्न त्यति सहज पनि थिएन । अस्पताल भर्नाको १८ दिनसम्म पनि बुबाको उपचारमा कुनै प्रगति नदेखेपछि छोरी प्रविन्द्र कौरले जर्बजस्ती उनलाई अस्पतालबाट डिस्चार्ज गराएकी थिइन् ।

तर, बिल देखेपछि भने उनी झस्किइन् । सुरुमा अक्सिजनसहित आईसीयूको १० हजारदेखि १८ हजार मात्रै भनिएको थियो । दैनिक १८ हजार नै लिए पनि तीन-चार लाख होला भन्ने सुडानले ठानेका थिएँ । १३ लाखको बिल आउँदा छाँगाबाट खसेझैँ भएको उल्लेख गर्दै उनी भन्छन्, ‘सुरुमा त पत्याउनै सकिनँ । आईसीयूभित्र बस्दासमेत अक्सिजन नभएर कहिलेकाहीँ आलोपालो नै गरेर राख्यो । न त्यो अस्पताल बसेर पूर्ण निको नै भएँ, न पैसा नै रह्यो ।’

भारतको जम्मु काश्मिरका सुडान २०३२ सालदेखि काठमाडौंमा बस्न थालेका हुन् । पेसाले ट्रक चालक सुडान त्यसयता काश्मिर फर्किएनन् । काठमाडौंमै घरजम गरेर बसे । अहिले उनी कुपण्डोलमा डेरी चलाएर बसेका छन् ।

काश्मिरको आफ्नो सबै सम्पत्ति भाइका लागि छाडेका सुडान नेपालमा ट्रक चलाएर जीवन गुजारा गरिरहेका थिए । उनी नपुगेको नेपालको मोटरबाटो, पुगेका कुनै जिल्ला सायदै होलान् । पछिल्लो समय उनी पेय पदार्थ उत्पादक कम्पनी पेप्सीको ट्रक चलाइरहेका थिए । कोरोनाको दोस्रो लहरका कारण संक्रमित हुन पुगेका उनको दैनिकी अहिले भने थलिएर एउटा कोठामा खुम्चिएको छ । उनी कोठामा एक्लै जीवनसँग संघर्ष गरिरहेका छन् ।

सुखदुःखमा साथ दिने श्रीमतीको अवस्था पनि उस्तै छ । सुडानसँगै कोरोना संक्रमित भएकी उनी पछिल्लो समय स्वास्थ्यमा फेरि समस्या देखिएपछि अस्पताल भर्ना भएकी छन् । एउटी छोरी प्रविन्द्र कौर घरि आमाको हेरचाह गर्न अस्पताल दौडिन्छिन्, घरि कोठामा आराम गरिरहेका बिरामी बुबाको हेरचाहमा खटिन्छिन् ।

कोरोनाको दोस्रो लहर फैलिएपछि सकेसम्मको सावधानी सुडानले अपनाएकै थिए । निषेधाज्ञामा उनले ट्रक पनि खासै चलाएनन् । एकचोटि मलेखुसम्म मात्रै गएका थिए । तर, कतिखेर उनलाई कोभिडले छोयो, केही पत्तो छैन । उनी भन्छन्,‘ कोरोनाको महामारीबाट बच्न त सावधानी अपनाएकै थिएँ । तर, कतिखेर संक्रमित हुन पुगेँ, थाहा नै छैन । श्रीमती र म सँगै संक्रमित भएका रहेछौँ ।’

पत्याउनै नसकिने उपचार खर्चको बिल

सुडानको कोठानजिकै छ, सर्वाङ्ग अस्पताल । त्यसैले उनी २६ वैशाखमा त्यहीँ सर्वाङ्ग अस्पतालमा भर्ना भए । अस्पताल भर्ना भएको १८ दिनसम्म पनि अस्पतालले सुडानको स्वास्थ्यमा सुधार नभएको बताउँदै आयो । सुडानको परिवारले सुरुसुरुमा अस्पतालको कुरा पत्यायो । उनीहरू चिन्तित भए तर अस्पतालको उपचारप्रति शंका गरेनन् ।

तर, १०-१५ दिनसम्म पनि बिरामीको अवस्था उस्तै छ भन्ने प्रतिक्रिया अस्पतालबाट पाएपछि भने सुडानकी छोरी प्रविन्द्र कौरले बुबालाई डिस्चार्ज गरिदिन अस्पताललाई आग्रह गर्न थालिन् । उनी भन्छिन्, ‘हामीले हाम्रो बिरामीलाई डिस्चार्ज गरिदिन पटक–पटक आग्रह गर्दा अस्पतालले खतरा छ भन्दै डिस्चार्ज गर्न मानेन । पछि डिस्चार्ज गर्दा हुने जोखिमको जिम्मा आफ्नै हुने भन्दै प्रशासनसँग चर्को कुरापछि मात्रै डिस्चार्ज गर्न सहमत भयो ।’

अस्पतालले डिस्चार्ज त गर्‍यो तर, आफूले पत्याउनै नसक्ने उपचार खर्चको बिल आएको उनको गुनासो छ । अस्पतालले सुडानको डिस्चार्ज गर्नुअघि सबै खर्च तिर्न भन्दै १२ लाख ८६ हजार ५२० रुपैयाँ रहेको बिल थमाएको कौरले बताइन् ।

‘बिरामी डिस्चार्ज हुने भयो भनेर हामी खुसी थियौँ । तर, पैसा तिर्न भन्दै लगभग १३ लाखको बिल दिएपछि हामी झस्कियौँ । ट्रक चालक बुबासँग कहाँबाट यति धेरै पैसा हुनु ?,’ उनले भनिन् । अस्पतालसँग कसरी यस्तो बिल आयो भनेर सोध्दा केही जवाफ नदिएको उनले बताइन् । उता डिस्चार्ज गर्ने भनेर सुडानको अक्सिजनसमेत निकालिसकिएको थियो ।

करिब १ घण्टापछि भने अस्पतालले २ लाख ५० हजार ५२० रुपैयाँ छुट हुने भन्ने जवाफ दियो । सुडानका परिवारलाई १३ लाखको उपचार खर्चको बिल कसरी भयो भन्ने प्रस्ट जानकारी दिइन् ।

तर, १२ लाख ८६ हजार ५२० रुपैयाँमध्ये अस्पतालले २ लाख ५० हजार ५२० रुपैयाँ छुट दिएपछि भने सुडानका परिवारले १० लाख तिर्नुपर्ने भयो । उनीहरूले आफन्तसँग ऋणधन गरेर त्यसमध्ये ८ लाख ५० हजार तिरेका छन् । आफन्तको सहयोगले उक्त रकम अस्पताललाई बुझाएर ११ जेठमा सुडानलाई सर्वाङ्ग अस्पतालबाट डिस्चार्ज गरिएको छोरी प्रविन्द्र बताउँछिन् ।

सर्वाङ्गपछि डिस्चार्ज भएर केही दिन कीर्तिपुर अस्पताल बसेका सुडान अहिले डेरामा फर्किएका छन् । रोगले त थिचेकै थियो, सर्वाङ्ग अस्पतालमा तिरेको पैसाको ऋणले पनि थिचेपछि उनी समस्यामा परेका छन् ।

डिस्चार्ज हुनुअघिसमेत सुडानका परिवारले विभिन्न शीर्षकको उपचार टेस्ट भनेर १ लाख ४६ हजार रुपैयाँ अस्पताललाई बुझाइसकेको थियो । अस्पतालको नियतमाथि त्यतिबेला बिरामीका आफन्तलाई शंका भयो, जब सुडानकी छोरीले चेकमार्फत भुक्तानी गर्न आठ लाखको चेक काट्न खोज्दा अस्पतालले अस्वीकार गर्‍यो ।

भुक्तानीका लागि अस्पताल प्रशासन प्रमुख सुशील खनालका दाइ राजन खनालको नाममा चेक काटेर दिएको छोरी प्रविन्द्रले बताइन् ।

स्वास्थ्य मन्त्रालयले भने जटिल अवस्थाका कोरोना संक्रमितको उपचार गरेबापत दैनिक १५ हजार, मध्यमखालेलाई सात हजार र सामान्य अवस्थाका बिरामीलाई साढे ३ हजार रुपैयाँ शुल्क लिन पाउने व्यवस्था गरेको छ ।

अस्पतालविरुद्ध ठगीको उजुरी

सुडानकी छोरी प्रविन्द्रले अस्पतालले महामारीका बेला स्वास्थ्य उपचारका नाममा ठगी गरेको भन्दै अस्पतालविरुद्ध उजुरी दिएकी छिन् । सुरुमा उनीहरू अस्पतालविरुद्ध ठगीको उजुरी लिएर ललितपुर प्रहरी परिसर पुगेका थिए । तर, प्रहरीले सुडानको उजुरी लिन नमानेपछि उनीहरूले जिल्ला सरकारी कार्यालय ललितपुरमार्फत उजुरी दर्ता गराएका छन् । उनीहरूले स्वास्थ्य मन्त्रालयमा समेत आफूलाई अस्पतालले ठगेको निवेदन दिएका छन् ।

सुडानको उपचार खर्चमा अस्पताल प्रशासनसँग मिलेर पुल्चोकका रवि सिंहले समेत अनावश्यक दबाब दिने गरेको पीडित परिवारको गुनासो छ । भारत विहारका रवि लामो समयदेखि पुल्चोकमा बस्दै आएका छन् । रविलाई यसअघि आफैँले सञ्चालन गरेको रेस्टुरेन्टको पार्टनरकी श्रीमतीलाई बन्धक बनाएर राखेको आरोपमा ललितपुर प्रहरीले पक्राउ समेत गरेको थियो ।

सुडानको उपचार खर्चबारेमा अस्पताल सञ्चालक सुशील खनाल भने अस्पतालले उपचार गरेबापतको रकम लिएको बताउँछन् । ‘हामीले अस्पतालमा उपचार गराउँदा लागेको पैसा लिएका हौँ । अनावश्यक बिल बढाएर लिएका होइनौँ,’ उनले शिलापत्रसँग भने, ‘हामीले ठगी गरेको भए प्रहरीले अनुसन्धान गर्दै होला । त्यहाँबाट पनि थाहा होला ।’

भिडियाे :

प्रकाशित मिति: आइतबार, असार २०, २०७८ १८:३६