कोरोना खोप ल्याइहाल्ने भनेर प्रधानमन्त्री ओलीले फेरि ढाँटे

A+ A A-

नेकपा एमालेका अध्यक्षसमेत रहेका प्रधानमन्त्री केपी ओलीले शुक्रबार केन्द्रीय कमिटी बैठकमा भनेका थिए, ‘अब खोपमा समस्या छैन । पर्सिदेखि चाहिनेजति खोप आउँछ ।’

प्रधानमन्त्री निवास बालुवाटरमा प्रधानमन्त्री ओलीले सम्बोधन गर्दै गर्दा नेपाल वायु सेवा निगमबाट अर्को सूचना आयो, ‘कोरोनाविरुद्धको खोप लिन ८ जुलाईमा जहाज चीन जाने ।’

एमाले केन्द्रीय कमिटी बैठकमा सम्बोधन गर्दै प्रधानमन्त्री केपी ओली । तस्विर : सूर्य थापाको फेसबुकबाट ।

‘८ जुलाईमा १० लाख डोज खोप ल्याउन जहाज जान्छ । सरकारले हाम्रो जहाज पठाउने भनेको छ’, नेपाल एयरलाइन्सका महाप्रबन्धक डिमप्रसाद पौडेलेले शिलापत्रसँग भने ।

केही घण्टापछि स्वास्थ्य तथा जनसंख्या मन्त्रालयले विज्ञप्ति निकालर भन्यो, ‘पछिल्लो समय खोप प्राप्ति गर्ने सन्दर्भमा नेपाल सरकारबाट चीनको बेइजिङस्थित सिनोफार्म कम्पनीसँग खोप खरिदको लागि भएको सम्झौताअनुसार २४ असारबाट खोप आपूर्ति सुरु भइ तत्पश्चात साप्ताहिक रूपमा विभिन्न चरणमार्फत खोप आपूर्ति गर्ने तयारी भएको छ ।’

योसँगै प्रधानमन्त्री ओलीले तीन दिनभित्र खोप आउने भनेर झुट बोलेको प्रष्ट भयो । किन ढाँटे त प्रधानमन्त्री ओलीले ? निवर्तमान स्वास्थ्यमन्त्रीसमेत रहेका एमाले नेता शेरबहादुर तामाङले भने, ‘खोप आउने सुनिश्चत भएपछि प्रधानमन्त्रीले त्यसैको कन्फिडेन्टमा बोल्नुभएको हो ।’

प्रधानमन्त्री ओलीले खोपमा झुट मात्र बोलेनन् केही दलका नेताले खोप नदिनू भनेर लबिङ गरेको समेत आरोप लगाए । ‘यो संकेत बुझेर नै प्रधानमन्त्रीले बोल्नुभएको हो । कतिपय सूचना पाएका छौँ । केही देशमा त्यस्तो गरेको पाइयो,’ निवर्तमान मन्त्री तामाङले भने, ‘हामी सरकारमा आएपछि खोप दिनू भनेर भन्नू अपराध हो ।’

विपक्षी दलको आपत्ति

विपक्षी दल नेपाली कांग्रेसले प्रधानमन्त्री ओलीले लगाएको आरोपप्रति आपत्ति जनाएको छ । कांग्रेस प्रवक्ता विश्वप्रकाश शर्माले शिलापत्रसँग भने, ‘प्रधानमन्त्रीज्यूलाई के बोल्न हुने, के नहुने, के आरोप लगाउने, के नलगाउने भन्ने कुराको हेक्का रहेन । नागरिकको जीवनमाथि खेलवाड गर्ने ढंगले कसैले सोच्ला भन्नु बिलकुल गलत हुन्छ ।’

खोप ल्याउन ढिला भएपछि प्रधानमन्त्री ओलीले दोष अरुलाई लगाएको तर्क गर्छन्, उनी । ‘कुनै पनि देशको सरकारसँग सरकारले नै संवाद गर्ने हो । कुनै दलले गर्ने होइन । खोप ल्याउन समयमा पहल नगर्ने अनि ढिला भएपछि त्यसको दोष अरुलाई लगाउनु दयनीय खालको अभिव्यक्ति हो’, प्रवक्ता शर्माले भने ।

चीनबाट कति आउँछ खोप ?

चीनबाट नन् डिस्क्लोज सम्झौताअनुसार खोप ल्याउन लागिएको छ । कति मात्रा र कति मूल्यमा ल्याउन लागिएको हो खुलाइएको छैन । यद्यपि, प्रधानमन्त्री ओलीले यसअघि चीनसँग ४० लाख डोज भेरोसेल खोप खरिद गर्ने निर्णय भएको बताएका थिए ।

खरिद गर्न लागिएको ४० लाख डोज भेरोसेल खोपमध्ये १० लाख डोज एक सातामा र बाँकी ५ लाखको दरले ३० लाख डोज दिन चीन तयार भएको स्वास्थ्य मन्त्रालय स्रोतको दाबी छ ।

तर, मन्त्रालयका प्रवक्ता डा. कृष्ण पौडेल कति मात्रा आउने तय नभएको बताउँछन् । ‘सिङ्गल डोज भएकाले जहाजमा कति ल्याउन सकिन्छ त्यसमा भर पर्छ । यति नै मात्रा भन्ने छैन । तर खोप अब क्रमशः आउँछ,’ उनले भने ।

यसअचि चीनले १८ लाख डोज खोप अनुदानमा नेपाललाई दिएको थियो ।

याे पनि‍‍

खोप लिन नेपाल एयरलाइन्सको जहाज २४ असारमा चीन जाने

कहाँ-कहाँबाट आउँदै छ खोप ?

प्रकाशित मिति: शनिबार, असार १९, २०७८ १५:१२