रत्ननगरको नगरसभा : बच्चा छाडेर विदेश जान खोज्ने महिललाई अनुमति नदिने

A+ A A-

चितवनको रत्ननगर नगरपालिकाको नवौं नगरसभा बजेट, नीति तथा कार्यक्रमसहित १७ वटा महत्वपूर्ण प्रस्ताव पारित गर्दै शुक्रबार समापन गरिएको छ ।

यही ६ असारमा सौराहामा उद्घाटन गरिएको नगरसभाअन्तर्गत विभिन्न चरणमा बजेट, नीति तथा कार्यक्रमसहित महत्त्वपूर्ण प्रस्तावहरूमा छलफल गरी शुक्रबार समापन गरिएको हो ।

नगरपालिकाले आर्थिक वर्ष २०७८/७९ को लागि एक अर्ब २६ करोडको बजेट पारित गरेको छ । नीति तथा कार्यक्रमअन्तर्गत १४ वटा नगरका र १३ वटा लागत साझेदारी गौरवको योजनासमेत पारित गरेको छ । सो नगरपालिकाले आफूले जन्माएको बच्चा दुई वर्ष नहुँदै आमा, बुवा, सासु आमा र ससुरालाई जिम्मा लगाएर विदेश जाने महिलालाई अनुमति नदिनेसहित १७बुँदे प्रस्ताव पारित गरेको हो ।

नगरसभाले बाल विवाहमुक्त, सडक मानवमुक्त नगरपालिका घोषणा गर्ने, जन्म, मृत्यु, विवाह, सम्बन्धविच्छेद र बसाइसराई तोकिएको समयभित्र गरी पञ्जीकरणलाई व्यवस्थित गर्ने, नगरभित्र जग्गा प्लटिङ गरी घडेरी व्यवस्थापन गर्ने व्यक्ति वा संस्थाले नगरपालिकाबाट पूर्वअनुमति दिनु पर्ने, सामुदायिक विद्यालय व्यवस्थापन समितिका पदाधिकारी र शिक्षकहरूले आफ्ना छोराछोरीलाई अनिवार्य सामुदायिक विद्यालयमा पढाउनु पर्ने, नगरसभाबाट पारित भएको बजेट शीर्षक र रकम सभाको अनुमतिमा मात्र शीर्षकान्तर गर्ने, पर्यटन प्रहरीको भवन निर्माण गर्न डेढ कठ्ठा जग्गा उपलब्ध गराउने, प्रस्ताव पारित गरिएको मेयर नारायण वनले जानकारी दिए ।

त्यसैगरी नगरपालिकाले पूर्वाधार निर्माण गर्दा भवनले चर्चेको जग्गा नगरपालिकाको नाममा ल्याउन प्रक्रिया सुरु गर्ने, नगरपालिकालाई आवश्यक ऐन, कानुन बनाइपछि अनुमोदन गराउने गरी लागू गर्ने, आगामी आर्थिक वर्षको काम गर्न कार्यपालिकालाई अधिकार प्रत्यायोजन गर्ने, बालमैत्री नगरपालिका घोषणा गर्न बाँकी रहेका वडाको कार्यप्रारम्भ गर्ने, हेरफेर भएका करका दर स्वीकृत गर्ने, आगामी आर्थिक वर्षको आर्थिक विधेयक तथा विनियोजन विधेयक पारित गर्ने, कर्मचारीको तलबी प्रतिवेदन पासा गरी तलब भत्ता खुवाउने, कर्मचारीको दरबन्दी पुनरावलोकन गर्ने, नियमित गर्नुपर्ने बेरुजु नियमित गर्नेलगायतका प्रस्ताव पारित गरिएको मेयर वनले बताए ।

नगरसभामा मेयर वनले बिहीबार आएको बाढीले राजमार्गदेखि दक्षिण तर्फको क्षेत्रमा ठूलो क्षति भएको भन्दै पर्यटन र कृषि क्षेत्र मारमा परेको बताए । सयौँ विगहा क्षेत्रमा रोपेको धान खेती बगरमा परिणत भएको भन्दै उनले सामूहिक बीउ राखेर रोपाइँ गर्न किसानलाई सहयोग गर्ने बताए ।

प्रकाशित मिति: शुक्रबार, असार १८, २०७८ २१:०७