निर्माणको अन्तिम चरणमा पुगेको कमला पुल भासियो, सीडीओ भन्छन्– छनबिनका लागि पत्र पठाएका छौँ

निर्माणको अन्तिम चरणमा पुगेको कमला पुल भासियो, सीडीओ भन्छन्– छनबिनका लागि पत्र पठाएका छौँ

A+ A A-

हुलाकी सडकखण्डअन्तर्गत सिरहा-धनुषाको सिमानामा निर्माणाधीन कमला पुल भाँसिएको छ । वर्षासँगै कमला नदीमा आएको बाढीको बहावले बिहीबार दिउँसो पुल भासिएको हो ।

१२ वटा स्पानमध्ये सिरहातर्फको दोस्रो स्पान दुई फिट मुनि भासिएको छ । झण्डै १० वर्षदेखि निर्माणाधीन कमला पुल यही १३ असारमा सम्पन्न गर्ने गरी सम्झौता भएको थियो । तर, समयमै निर्माण सम्पन्न हुन नसके पनि निर्माण कार्य अन्तिम चरणमा पुगिसकेको उक्त पुल सम्पन्न नहुँदै भासिएको हो ।

समान्य बाढीले पुल भत्काएपछि ठेकेदारले गुणस्तरहीन सामग्रीको प्रयोग गरेको स्थानीयले आरोप लगाएका छन् । स्थानीयले पुल निर्माणमा प्रयोग भएको सामग्रीको जाँच हुनुपर्ने र ठेकेदार र प्राविधिकलाई कानुनी दायरामा ल्याउनुपर्ने माग राखेका छन् ।

पुल निर्माणका लागि सुरुमा पप्पु कन्स्ट्रक्सनले २०६८ सालमा ४२ महिनाभित्र सक्ने गरी ठेक्का पाएको थियो । तर, उसले सात वर्षसम्म सुस्त गतिमा काम गरेपछि हुलाकी राजमार्ग निर्देशनालय जनकपुरधामले लुम्बिनी बिल्डर्सलाई १३ असारमा २०७८ मा काम सक्ने गरी निर्माणको जिम्मा दिएको थियो । विगत तीन वर्षदेखि लुम्बिनी बिल्डर्सले निर्माण गरिरहेको कमला पुल ४ सय ७० मिटर लम्बाइको छ ।

पुल सञ्चालनमा नआउँदै भत्किएपछि सर्वसाधारण फेरि निराश बनेका छन् । पुल भासिनुको कारण डिजाइन गलत भएको वा डिजाइनअनुसार ठेकेदारले काम नगरेको हुन सक्ने प्रमुख जिल्ला अधिकारी (सीडीओ) प्रदीपराज कँडेलले बताएका छन् । उनले यसको छानबिन तथा कारबाहीका लागि भौतिक पूर्वाधार मन्त्रालयलाई आफूले पत्र पठाइसकेको जानकारी दिए ।

वर्षायाम सुरु भएसँगै कमला नदीमा पानीको बहाव उच्च रहेकाले तटीय क्षेत्रका सर्वसाधारणलाई स्थानीय प्रशासनले सतर्क रहन आग्रह पनि गरेको छ । नदीमा २ मिटर बढी पानीको बहाव बढेको र तटबन्धलाई जोखिम पुर्‍याउन सक्ने भन्दै प्रशासनले सतर्क रह्न आग्रह गरेको हो । तटीय क्षेत्रका सर्वसाधारणलाई अग्रिम जानकारी र सचेत गराउनका लागि विभिन्न स्थानमा सुरक्षाकर्मीहरू परिचाल गरिएको पनि उनले जानकारी दिए ।

प्रकाशित मिति: बिहीबार, असार १७, २०७८ १७:११