निषेधाज्ञामा कर्णालीका यातायात व्यवसायीद्वारा चर्को भाडा असुली, सुर्खेतदेखि कालीकोटसम्म ५ हजार

निषेधाज्ञामा कर्णालीका यातायात व्यवसायीद्वारा चर्को भाडा असुली, सुर्खेतदेखि कालीकोटसम्म ५ हजार

A+ A A-

निषेधाज्ञाको मौका छोपी कर्णालीका यातायात व्यवसायीले यात्रुसँग चर्को भाडा असुल्न थालेका छन् । कर्णालीका सुर्खेत, जुम्ला, कालीकोट, रुकुमपश्चिम, जाजरकोट र सल्यान जिल्लाका यातायात व्यवसायीहरूले चर्को भाडा असुल्न थालेका हुन् ।

सुर्खेतदेखि नेपागञ्जका लागि नियमित भाडा २ सय ५० रुपैयाँ रहेकोमा अहिले १ हजारदेखि २ हजार रुपैयाँसम्म असुल्न थालिएको छ । त्यस्तै, यातायात व्यवसायीहरूले सुर्खेतदेखि कालीकोटसम्मको भाडा ८ सय रुपैयाँ रहेकोमा अहिले ५ हजार रुपैयाँसम्म असुल्ने गरेका छन् ।

बिहीबार बिहान काठमाडौं जानका लागि दैलेखदेखि सुर्खेत झरेका आठबिस नगरपालिका– ५ का श्यामबहादुर थापाले नेपालगञ्ज जानका बस खोजे । सुर्खेत बसपार्कभन्दा अलि अगाडि रोकिएको मिनी बसलाई नेपालगञ्ज जानका लागि थापाले भाडा सोध्दा गाडीका स्टाफले १ हजार रुपैयाँ लाग्ने बताए । थापाले सुर्खेतदेखि नेपालगञ्जसम्मको चर्को भाडा नदिने बताएपछि गाडीका स्टाफले जिल्ला प्रशासन कार्यालय सुर्खेतले १६ असारदेखि १८ असारसम्म सवारी सञ्चालनका लागि दिएको पत्र देखाए ।

स्टाफले भाडा लिन सरकारले छुट दिएको बताएपछि थापाले नेपालगञ्जसम्मको १ हजार रुपैयाँ भाडा तिरेको बताए । ‘दैलेखबाट सुर्खेत आउँदाभन्दा सुर्खेतबाट नेपालगञ्जको भाडा बढी लाग्यो,’ उनले भने, ‘सुर्खेतबाट नेपालगञ्जको भाडा त २५० रुपैयाँ मात्र थियो । अहिले लकडाउनमा यातायात व्यवसायीहरूले ठग्न थालेछन् ।’

जुम्लादेखि सुर्खेतसम्म मात्र ७ हजार रुपैयाँ भाडा तिरेर आएको जुम्ला कनका सुन्दरी गाउँपालिका– ६ का रामबहादुर बुढाले बताए । ‘जथाभावी भाडा लिन थालेका छन्,’ उनले भने, ‘स्थानीय प्रशासनले कुनै पनि कारबाही गर्दैन ।’

सल्यानको सल्लीबजारबाट नेपालगञ्जसम्म भाडा ३५० रुपैयाँ भए पनि अहिले यातायात व्यवसायीहरूले २ हजार रुपैयाँ तिर्नुपर्ने बाध्यता भएको सल्यान वनगाड कुपिण्डे नगरपालिका– ४, वीरबहादुर पुनले बताए । जिल्ला प्रशासन कार्यालय सुर्खेतले भने चर्को भाडा असुल्न नपाइने र त्यस्तो गरेको पाइए कारबाही गरिने जनाएको छ ।

प्रकाशित मिति: बिहीबार, असार १७, २०७८ १४:३६