बल्ल पुग्यो गाँउमा सिंहदरबार

सेवा लिन लाइनमा बसेका स्थानीय

A+ A A-

सत्तारुढ दलले चुनावी घोषणापत्रमा एउटा नारा ल्यायो, गाउँगाउँमा सिंहदरबार । नारा दुई वर्ष पुरानो भएपछि कालिकोटको दुर्गम गाँउमा ‘सिंहदबार’ पुगेको छ ।

कालिकोटको पलाता गाउँपालिकाले पहिलोपटक गाउँमै कर्मचारी (डोर) खटाएर सेवा सुरु गरेपछि स्थानीयले ‘सिंहदरबारको एउटा सानो कोठा गाउँमा आएको’ महसुस गरेका छन् ।

अंशबन्डा, जग्गा पास, जन्मदर्ता, मृत्युदर्तालगायतका लागि सदरमुकाम मान्म नै पुग्दै आएका स्थानीयले अब यस्ता सेवा गाँउबाटै पाउन थालेका छन् ।

पलाता गाउँपालिका–१ का जयबहादुर भण्डारीले डोरमा खटिएका कर्मचारीबाट गाउँमै जग्गाको लालपुर्जा पाए । त्यसैले उनी दंग छन् । भन्छन्, ‘अबचाहिँ बल्ल सिंहदरबारको अलिकति अधिकार गाउँमा आयो ।’

सदरमुकाम पुगेर कम्तीमा तीन दिन खर्चेर अंशबन्डा, जग्गापासलगायतका सेवा पाउँदै आएका स्थानीयलाई यो सेवाले ठूलो राहत मिलेको छ ।

गाउँमै सञ्चालन भएको डोरबाट लालपुर्जा बनाउन पाउँदा स्थानीयले खुसी व्यक्त गरे ।

‘कहिले लालपुर्जा बन्ला भन्ने लागेको थियो,’ उनी भन्छन्, ‘यति सहजै लालपुर्जा बन्छ भन्ने सोचेको पनि थिइनँ, मान्मसम्म पुग्ने खर्च जोगियो ।’

पलाता गाउँपालिका–१ का मनबहादुर रोकायाको पनि खुसीले सीमा नाघेको छ । गाउँघरमै जग्गाधनी पुर्जा पाउँदा आफू खुसी भएको रोकाया बताउँछन् । भन्छन्, ‘जनताको सेवाका लागि डोर सञ्चालन गरेकोमा गाउँपालिकालाई धन्यवाद छ ।’

डोर सञ्चालनपछि पलाताका स्थानीय नागरिकको गाउँपालिका केन्द्रमै जग्गासम्बन्धी सबै समस्याको समाधान भइरहेको छ । लामो समयदेखि बसोबास गर्दै आएको जग्गाको लालपुर्जा नहुँदा समस्या रहेका दलबहादुर बुढाजस्ता थुप्रै स्थानीय निकै खुसी छन् । खुसी हुनेमध्येका एकजना लालबहादुर भन्छन्, ‘बल्ल हाम्रो समस्या समाधान भयो ।’

पलाता गाउँपालिकाले पहिलोपटक गाउँपालिका केन्द्रमै ७ दिने डोर सञ्चालन गरेर स्थानीय नागरिकलाई सेवाप्रवाह गरेको हो । स्थानीय नागरिकलाई मान्म जानुपर्ने बाध्यता अन्त्य गर्न गाउँपालिकामा ७ दिने डोर सञ्चालन गरेको पलाता गाउँपालिका अध्यक्ष लक्ष्मणबहादुर बम बताउँछन् ।

गाउँपालिकामा डोर सञ्चालन भएपछि खर्च कम भएको अध्यक्ष बमले बताए । उनले भने, ‘मालपोत र नापी कार्यालयले लिने राजस्व मात्र हो, धेरै शुल्क पनि नलिने भएकाले जनतालाई सेवा पुगेको छ ।’

प्रकाशित मिति: बुधबार, जेठ १५, २०७६ ०१:५६