कोरोना कहरबीच अत्यधिक कर्जा बढेपछि अध्ययनमा जुट्यो राष्ट्र बैंक

A+ A A-

कोरोना महामारीको कारण आर्थिक क्रियाकलाप सुस्त भएकै अवस्थामा वार्णिज्य बैंकहरूले दिने ऋण अत्यधिक बढेपछि नेपाल राष्ट्र बैंकले कर्जा प्रवृत्तिबारे अध्ययन थालेको छ ।

आगामी आर्थिक वर्षको मौद्रिक नीतिको तयारी थालेको राष्ट्र बैंकले त्यसअगावै कर्जाको प्रवृत्तिबारे अध्ययन गरेर आवश्यक नीतिगत व्यवस्था गर्ने तयारी गरेको हो ।

चालु आर्थिक वर्षको ११ महिनामा वाणिज्य बैंकबाट ७ खर्ब ४४ अर्ब रुपैयाँ लगानी विस्तार भएको छ । गत आर्थिक वर्षको कोरोना महामारीकै कारण अघिल्लो वर्षको तुलनामा कर्जा प्रवाहमा १० प्रतिशतले ह्रास आएको थियो । चालू वर्षमा भने २ गुणा बढीले वृद्धि भएको छ ।

आर्थिक वर्ष २०७५/७६ र २०७६/७७ मा प्रवाह भएको कर्जाबराबरको रकम चालू वर्षको ११ महिनामा नै गएको छ । यी दुई आर्थिक वर्षमा गरी ७ खर्ब ९० अर्ब रुपैयाँको कर्जा प्रवाह भएको छ ।

गत आर्थिक वर्षको अन्त्यसम्म २९ खर्ब ३ अर्ब रुपैयाँ रहेको वाणिज्य बैंकको कर्जा चालु वर्षको जेठ मसान्तसम्म ३६ खर्ब ४६ अर्ब रुपैयाँ पुगेको छ । यसरी कर्जा प्रवाह निरन्तर बढेपछि कर्जाको प्रवृत्तिबारे अध्ययन गर्न थालिएको राष्ट्र बैंकका डेपुटी गर्भनर बमबहादुर मिश्रले बताए ।

उनले कर्जा कुन क्षेत्रमा प्रवाहित भएको छ र त्यसले कस्तो प्रभाव पार्छ भन्ने विषयमा अध्ययन गर्न खोजिएको बातए । ‘टेस्ट मात्रै गराउन खोजिएको हो, रिपोर्ट आएपछि ठीक छ वा छैन त्यसपछि उपचारको प्रयास गर्नुपर्ला,’ मिश्रले शिलापत्रसँग भने ।

नेपाल राष्ट्र बैंकको १० महिनाको प्रतिवेदनअनुसार वैशाख मसान्तसम्म प्रवाह भएको कर्जामध्ये सबैभन्दा बढी आयातका लागि प्रयोग हुने कर्जा करिब ९२ अर्ब रुपैयाँ गएको छ भने शेयर कर्जा ८१ अर्ब बढी रहेको छ । ओभर ड्राफ्ट १ खर्ब ७५ अर्ब बढी गएको देखिएको छ ।

वाणिज्य बैंकहरूको चालू वर्षमा ७ खर्ब ४४ अर्बले कर्जा बढ्दा निक्षेप भने ५ खर्ब ४ अर्बले मात्रै बढेको छ । यसरी कर्जाको माग बढ्दै जाँदा बजारमा लगानीयोग्य रकम अभाव देखिन थालेको छ । राष्ट्र बैंकका अनुसार अहिले प्रणालीमा करिब १० अर्ब बराबरको मात्रै लगानीयोग्य रकम देखिएको छ ।

विगतका वर्षहरूमा बैंकमा यो समयमा अधिक तरलता हुने गरे पनि यो वर्ष भने अभाव देखिएको हो । सरकारले गर्ने पुँजीगत खर्चसमेत बढाउन नसक्दा बैंकमा तरलता अभावदेखि थालेको बैंकरहरूको भनाइ छ । विगतका वर्षहरूमा जस्तै सरकारले पुँजीगत खर्च बढाएमा भने तरलता अभाव टर्ने बैंकरहरू बताउँछन् ।

प्रकाशित मिति: सोमबार, असार १४, २०७८ १९:०९