सात महिनाकी गर्भवती सन्ध्याको दर्द : कमाउने श्रीमान् कोभिडले बिते, घरमा खानेकुरा छैन

सात महिनाकी गर्भवती सन्ध्याको दर्द : कमाउने श्रीमान् कोभिडले बिते, घरमा खानेकुरा छैन

A+ A A-

बुटवल– ११, प्रगतिनगर (जीएफ टोल) विजय पथको उत्तरतर्फ रहेको सानो टिनको टहरोमा बस्छिन् २९ वर्षीया सन्ध्या चौधरी । उनी गर्भवती भएको सात महिना लाग्यो ।

गर्भवती हुँदा पोसिलो खानुपर्ने हो । तर, उनलाई दुई छाक टार्न पनि धौ-धौ छ । गर्भमा हुर्कंदै गरेको शिशुको अवस्था कस्तो छ ? उनले जँचाउन पनि सकेकी छैनन् ।

‘पेटको बच्चा चलेको आफूले महसुस गरेको छैन,' सन्ध्या भन्छिन्, 'जँचाउन पैसा पनि छैन ।’ उनको आर्थिक स्थिति कमजोर छ । कसैले राहत दिए चुलो बल्छ, नदिए बल्दैन ।

सन्ध्याका श्रीमान् रामु चौधरी दैनिक मजदुरी गर्थे । परिवारको आयस्रोत त्यही थियो । तर, रामुलाई २५ वैशाखमा एक्कासि ज्वरो आयो । परीक्षण गराउँदा कोरोनाको संक्रमण पुष्टि भयो । २८ वैशाखमा कोरोनाका कारण रामुको मृत्यु भयो ।

श्रीमान्‌को मृत्युपछि शोकमा डुबेकी सन्ध्याले राम्रोसँग खान पनि पाएकी छैनन् । सन्ध्यालाई शोक मात्र छैन, साँझ-बिहान के खाने भन्ने चिन्तासमेत छ ।

सन्ध्याका ६५ वर्षीय ससुरा ठगे थारू पनि उनीसँगै छन् । ठगे थारू उच्च रक्तचाप र मधुमेहका रोगी हुन् । उनी कमाउन सक्ने अवस्थामा छैनन् । अहिले छिमेकीले गरेको सहयोगकै आधारमा सन्ध्या र ठगेको गुजारा चल्दै आएको छ ।

‘डाक्टरले सुरुमा जाँच गर्दा बच्चा सानो छ भन्नुभएको थियो । तर, अहिले बच्चाको अवस्था के छ, थाहा छैन,’ उनी भक्कानिँदै भन्छिन्, ‘श्रीमान्‌को यो नाशोलाई संसार देखाउन त मन छ । तर, कस्तो छ, यसको अवस्था थाहा छैन ।’

सन्ध्याकी सासू अर्थात् ठगेकी श्रीमतीको मृत्यु भइसकेको छ । ‘उमेर छँदै बुढीको मृत्यु भयो,' ठगे भन्छन्, 'छोराले दुःख पाऊला भनेर अर्की बिहे गरिनँ । तर, छोराले पनि ३५ वर्षमै छाडेर गयो ।’

सन्ध्या रामुकी कान्छी श्रीमती हुन् । पहिलो श्रीमतीले साथ छाडेपछि रामुले तीन वर्षअघि सन्ध्यालाई भित्र्याएका हुन् ।

रामुका जेठी श्रीमतीतर्फ दुई छोरी छन् । एउटी आमासँगै छिन् भने एउटी मामाघरमा बस्छिन् । यता घरमा भने सन्ध्या र ससुरा मात्र छन् ।

सन्ध्याले गर्भमा हुर्कंदै गरेको शिशुलाई पढाउने, बढाउने सपना देखेकी छन् । ‘यो पेटको बच्चा जन्मिएर बाबु खोज्दा त यसलाई म बाबु देखाउन सक्दिनँ,' उनी भन्छिन्, 'तर, बाबुको अभाव हुन नदिने गरी यसलाई पढाउँछु बढाउँछु ।’

प्रकाशित मिति: सोमबार, असार १४, २०७८ १३:३०