माइती पक्षले दाबी गरेकै ठाउँमा भेटियाे सुजिताकाे शव, हत्या आशंकामा प्रहरीले थाल्याे अनुसन्धान

माइती पक्षले दाबी गरेकै ठाउँमा भेटियाे सुजिताकाे शव, हत्या आशंकामा प्रहरीले थाल्याे अनुसन्धान

A+ A A-

महोत्तरीमा २५ दिनदेखि बेपत्ता भएकी एक महिलाको शव फेला परेको छ । लोहरपट्टी नगरपालिका– ७, भ्रमरपुरास्थित मुकेश ठाकुरको खेतमा स्थानीय सुजिता ठाकुरको शव फेला परेको हो । प्रहरीका अनुसार स्थानीय मुकेश ठाकुरकी श्रीमती सुुजिता गत १९ जेठदेखि बेपत्ता थिइन् ।

सुजिताका माइती पक्षले छोरीको हत्या गरिएको भनेर दिएको जाहेरीका आधारमा प्रहरीले खोजतलास गर्दा मुकेशकै खेतमा आइतबार शव भेटिएको हो ।

शव गाडिएको आशंकामा खनेर हेर्दा कपाल, नङ र रगत लत्पतिएको माटो फेला परेको प्रहरीले जनाएको छ । अनुसन्धानमा संलग्न एक प्रहरीका अनुसार शव गलाउन मलखाद र नुनको समेत प्रयोग गरिएको छ । शंकाका आधारमा माइती पक्षले दाबी गरेको स्थानमै गलेको अवस्थामा महिलाको शव भेटिएको हो । महोत्तरीका एसपी दिनेश आचार्यका अनुसार घटनास्थल सुजिताको घरदेखि करिब एक किलोमिटरको दूरीमा छ ।

उनका अनुसार करिब ४ फिट गहिरो खाल्डो खन्दा ती प्रमाणहरू फेला परेका हुन् । घटनाबारे अनुसन्धान भइरहेकाले त्यसबारे अहिले केही भन्न नमिल्ने उनको भनाइ छ । सुजिताका आफ्नै देवर रुपेश ठाकुर र ससुरा पतिराम ठाकुरले हत्या गरी खेतमा शव गाडेको सुजिताकी भाइ शिवम् पाण्डेयको आरोप छ ।

शिवमले भने, 'बिहे भएकै बेलादेखि पटकपटक झगडा हुँदै आएको थियो । बेलाबेलामा मेरी बहिनीमाथि कुटपिट भएकाे थियाे । केही दिनअघि मात्र सिरानीले मुख छाेपेर हत्या गर्ने प्रयास भएको बहिनीले बताएकी थिइन् ।’

सुजिता बेपत्ता भएपछि हत्याको आशंकामा उजुरी दिन जाँदासमेत प्रहरीले उजुरी दर्ता नगरेको उनको भनाइ छ । त्यसपछि उनले अधिकारकर्मीहरू गुहारेका थिए । उनीहरूकै पहलमा सुजिता बेपत्ताको घटनाबारे खोजबिन तथा अनुसन्धानलाई प्रहरीले तीव्रता दिएको थियो ।

प्रकाशित मिति: आइतबार, असार १३, २०७८ १८:२९