प्रदेश २ : तयारीबिना मन्त्रालय फुटाउँदा समस्या, न कार्यालयको टुंगो, न कर्मचारीको व्यवस्था

प्रदेश २ : तयारीबिना मन्त्रालय फुटाउँदा समस्या, न कार्यालयको टुंगो, न कर्मचारीको व्यवस्था

२६ जेठको राति टर्च बालेर शपथ लिँदै नवनियुक्त मन्त्री ।

A+ A A-

नेपाली कांग्रेसका तर्फबाट प्रदेश २ सरकारमा सहभागी भएका तीन जना मन्त्रीले २६ जेठ राति पौने १० बजे मोबाइलको टर्च बालेर शपथ लिए । कांग्रेस पनि सरकारमा सहभागी हुने सहमति भएलगत्तै राम सरोज यादव, ओमप्रकाश शर्मा र विरेन्द्र प्रसाद सिंहले शपथ लिएका थिए ।

यादवलाई भौतिक पूर्वाधार तथा विकास, शर्मालाई खानेपानी तथा ऊर्जा विकास र सिंहलाई महिला, बालबालिका, युवा तथा खेलकुद मन्त्री बनाइएको थियो । तर, शपथ लिएको तीन साता पुग्न लाग्दा पनि कांग्रेसले पाएका तीनमध्ये दुई मन्त्रालयको संरचना नै तयार भएको छैन ।

सामाजिका विकास मन्त्रालय टुक्र्याएर बनाइएको महिला, बालबालिका, युवा तथा खेलकुद मन्त्रालय र भौतिक पूर्वाधार विकास मन्त्रालय टुक्र्याएर बनाइएको खानेपानी तथा ऊर्जा विकास मन्त्रालयको अझैसम्म न प्रशासनिक भवनको अत्तोपत्तो छ न त कर्मचारीकै । नवनियुक्त खेलकुदमन्त्री सिंह र ऊर्जा विकासमन्त्री ओमप्रकाश सर्राफ अहिले सम्मान कार्यक्रममै दिन कटाइरहेका छन् । मन्त्रालयको व्यवस्थापन तथा बजेट बाँडफाँट नहुँदा उनीहरूले आगामी आर्थिक वर्षबाट मात्र काम गर्ने बताएका छन् ।

नयाँ मन्त्रालयको सचिव संघीय सरकारले पठाउने भएकाले टुंगो नलागेको र साविकको महाशाखालाई मन्त्रालयको कामकाजको जिम्मेवारी तोकिएको मुख्यमन्त्री तथा मन्त्रिपरिषद् कार्यालयका सचिव यामप्रसाद भुसाल बताउँछन् । मन्त्रीको निवासका लागि घरको खोजी भइरहेको भुसालले बताए ।

मन्त्री सिंहले सामाजिक विकास राज्यमन्त्रीको निजी सचिवालयमा कार्यभार ग्रहण गरेका थिए । उनी अहिले पनि त्यहीँ बस्ने गरेका छन् । उनको कार्यकक्षमा नाम लेखिएको प्लेटसँगै मन्त्रालयको नाम कागजमा प्रिन्ट गरेर टाँसिएको छ । नयाँ मन्त्रालय भएकाले कार्यालय व्यवस्थापन, कर्मचारी र बजेट व्यवस्थापनको काम भइरहेको सिंहले बताए ।

‘१४ असारसम्ममा रेडबुक ल्याउने तयारी छ । अहिले त्यसमै लागेका छौँ । यो महिनाभित्रै कार्यालय व्यवस्थापन भइहाल्छ । अनि त्यसपछि काम थाल्छौँ,’ मन्त्री सिंहले भने ।

मन्त्रालय फुटाइएपछि मन्त्रालयको अधिकारक्षेत्र सीमित भएको भन्दै नयाँ कर्मचारीसमेत मन्त्रालयमा आउन नमानेको एक कर्मचारी बताउँछन् ।

मन्त्री सिंहका अनुसार क्वार्टर र मन्त्रालय व्यवस्थापनको काम अघि बढाइएको छ । त्यसका लागि अर्थ मन्त्रालयले ८३ लाख बजेट निकासा गरेको उनले जानकारी दिए ।

त्यस्तै खानेपानी तथा ऊर्जा विकासमन्त्री पनि भौतिक पूर्वाधार राज्यन्त्रीको कार्यकक्षमै बसेका छन् । त्यहीँ भौतिक पूर्वाधारको भन्दा केही सानो बनाएर खानेपानी तथा ऊर्जा विकास मन्त्रालयको बोर्ड लगाइएको छ ।

कर्मचारी र सचिव नतोकिएका कारण ऊर्जामन्त्री शर्मासमेत प्राय: जिल्लातिरै बस्ने गरेको उनका स्वकीय सविच सुजित मिश्रले बताए ।

प्रकाशित मिति: सोमबार, असार १४, २०७८ ११:१२