विमला वली कुन पार्टीकी सांसद ? एमाले भन्छ- हाम्री हुन्, विमला भन्छिन्- माओवादीकी हुँ

विमला वली कुन पार्टीकी सांसद ? एमाले भन्छ- हाम्री हुन्, विमला भन्छिन्- माओवादीकी हुँ

A+ A A-

लुम्बिनी प्रदेशसभा सदस्य विमला वलीले प्रदेश सरकारले ल्याएको नीति तथा कार्यक्रमको विपक्षमा मत दिइन् भने बजेटको छलफलबाट बाहिरिइन् । त्यसपछि एमालेले उनलाई स्पष्टीकरण सोध्यो । विमलाले आफूले दल रोज्न पाउने अधिकार बमोजिम माओवादी रोजेको जवाफ दिइन् ।

विमला प्रदेशसभाको उपनिर्वाचनमा सूर्य चिह्न लिएर निर्वाचित भएकी थिइन् । सडक दुर्घटनामा परी दाङ क्षेत्र नं. ३ (ख) का प्रदेशसभा सदस्य उत्तरकुमार वलीको मृत्यु भएपछि तत्कालीन नेकपाले विमलालाई उम्मेदवार बनाएको थियो । विमला उत्तरकुमार वलीकी श्रीमती हुन् ।

सर्वोच्च अदालतको आदेशसँगै पूर्ववत रूपमा एमाले र माओवादी ब्युँतिएपछि विमला माओवादीमा लागेकी छन् । तर, लुम्बिनीका मुख्यमन्त्री शंकर पोखरेलले आफू पुन: मुख्यमन्त्रीमा नियुक्त हुँदा वली पनि आफ्नै पक्षमा रहेको दाबी गरेका थिए ।

सोही आधारमा प्रदेश प्रमुख धर्मनाथ यादवले पोखरेललाई पुन: मुख्यमन्त्रीमा नियुक्त गरे । विमला भने त्यसयता प्रदेशसभाको विपक्षी आसनमा बस्दै आएकी छन् । एमाले र माओवादी केन्द्र दुवैले विमलालाई आफ्नो पार्टीको सांसद दाबी गर्दै आएका छन् ।

प्रदेशस्थित एमाले संसदीय दलका प्रमुख सचेतक भूमिश्वर ढकाल पार्टी विभाजनपछि पनि एमाले संसदीय दलको बैठकमा सहभागी भएकाले विमलाले पार्टी रोज्न पाउने हक गुमाइसकेको बताउँछन् । सोही कारण नीति तथा कार्यक्रमको विपक्षमा मत दिएकाले विमलालाई स्पष्टीकरण सोधिएको ढकालको भनाइ छ । ढकालका अनुसार विमलाले स्पष्टीकरणको चित्तबुझ्दो जवाफ नदिएकाले उनीमाथि थप कारबाही हुँदै छ ।

यता विमला भने एमाले र माओवादी ब्युँतिएपछि आफू कुनै पनि पार्टीको संसदीय दलको बैठकमा नगएकाले दल रोज्न पाउने बताइन् । उनले आफ्नो नाममा गरिएको हस्ताक्षर नक्कली भएको दाबी गरिन् ।

‘मैले माओवादी रोज्ने दिनै मेरो हस्ताक्षर मुख्यमन्त्री शंकर पोखरेलले नियुक्तिका लागि लैजानुभएको छ,' विमलाले भनिन्, 'त्यो मेरो हस्ताक्षर होइन । नक्कली हो ।’

प्रकाशित मिति: आइतबार, असार १३, २०७८ ११:३९