यार्सा संकलन खुल्यो, स्कुलसमेत बन्द गरेर ३२ हजार उक्लिए पहाड

A+ A A-

कर्णाली प्रदेशका २ र पूर्वी रुकुम गरी तीन जिल्लामा आजदेखि यार्सा संकलन खुला गरिएको छ । ३२ हजार संकलकले सम्बन्धित जिल्लाका विभिन्न पाटन क्षेत्रमा गएर यार्सा संकलन गर्नेछन् । सोमबार मात्र उनीहरुले प्रवेश पाएका छन् ।

यार्सा संकलन गर्नेको सुरक्षाका लागि तीन जिल्लामा ३ सयभन्दा बढी सुरक्षाकर्मी परिचालन गरिएको छ । त्यसैगरी, यार्सा संकलकको स्वास्थ्यलाई ध्यानमा राखी सयभन्दा बढी स्वास्थ्यकर्मी खटाइएको छ ।

३२ हजार यार्सा संकलकबाट कम्तीमा पनि ७ करोड राजस्व संकलन हुने जनाइको छ । सबैभन्दा बढी यार्सा पाइने डोल्पाका धो, तैजुम र सुलिगाड गरी तीन नाका र ११ वटा उपनाकाबाट १५ हजारभन्दा बढी यार्सा संकलकले प्रवेश पाएका छन् ।

सम्बन्धित गाउँपालिकाभित्रका स्थानीयले १ हजार, जिल्लाभित्रकाले २ हजार र जिल्लाबाहिरकाले ३ हजार रुपैयाँ शुल्क तिरेर यार्सा संकलनको प्रवेश पाएका हुन् ।

त्यस्तै, मुगुमा पनि आजबाटै यार्सा संकलनका लागि खुला गरिएको छ । करिब १० हजारको संख्यामा प्रवेश पाएका यार्सा संकलकले मुख्य ५ नाकाबाट प्रवेश पाएका छन् । मुगुकार्मा रोँग गाउँपालिकाभित्र पर्ने थापाखोलाका झुमरु र थ्याँजु पाटन, रिमा, टाँटी पाटन, ठूलो कोइकी पाटन र सिरानचौर पाटन मुख्य पाटनका नाका हुन् । यी नाकाबाट १० हजारले प्रवेश पाएका छन् ।

रुकुमपूर्वको उत्तरगंगा गाउँपालिकाको वडा १ देखि ४ सम्मका चौरीखर्क र आङ्ला क्षेत्रका सानो–ठूलो बुकिपाटनमा ५ हजार जनाले प्रवेश पाएका छन् । उनीहरुले गत १० जेठमा नै प्रवेश पाएका थिए ।

बर्सेनि हजारौंले यार्सा संकलन गर्ने गरेका छन् । यार्सा संकलन गर्दा चोरी निकासी मात्र नभई हत्यासम्म हुने भएपछि यो वर्ष सुरक्षाकर्मी खटाइएको मुगु जिल्लाका प्रमुख जिल्ला अधिकारी जयकुमार घिमिरेले बताए ।

मूल्य नपाउने सम्भावना

यार्साका व्यपारीले यो वर्ष यार्सा राम्रै पाइने अनुमान गरेका छन् । गत साल यार्सा ९ लाख रुपैयाँप्रति केजी बिक्री गरेका थिए । तर, यो वर्ष त्यसभन्दा कम मूल्य हुन सक्ने व्यापारी प्रेमबहादुर कार्कीले बताए । जथाभावी यार्सा संकलन गरिने र त्यसको कुनै पनि संरक्षण नहुने भएकाले यार्साको उत्पादन घट्दै जाने बताइएको छ ।

विद्यालय बन्द, शिक्षक पनि यार्सा टिप्न

यार्सा संकलनकै लागि दर्जन बढी विद्यालय बन्द भएका छन् । विद्यालय बन्द भएपछि शिक्षक पनि विद्यालय जान छाडेर यार्सा संकलनतिर लागेका छन् । कक्षा १ मा पढ्ने विद्यार्थीसमेत यार्सा संकलनमा जाने गरेका छन् ।

यार्सा टिप्न तिखा र तेजिला आँखा चाहिने भएकाले बालबालिकालाई बोकेर भए पनि यार्सा संकलन गर्न लगिने चलन छ । हजारौं बालबालिका यार्सा टिप्न जाने गरेका छन् । अविभावकभन्दा बालबालिकाले नै बढी यार्सा संकलन गर्ने गरको जनाएको छ । एक अविभावकले भने, ‘बालबालिका नभएकाले त यार्सा संकलन गर्न नगए पनि भयो ।’

बालबालिकालाई यार्सा टिप्न जान प्रतिबन्ध तर सकिएन

यार्सा संकलन गर्न जाने अधिकांश बालबालिका बिरामी पर्ने गरेका छन् । त्यही जोखिमलाई मध्यनजर गरी बालबालिकालाई यार्सा संकलन गर्न रोक लगाइएको डोल्पा जिल्लाका प्रमुख जिल्ला अधिकारी मुकेशकुमार केसरीले बताएका छन् ।

‘१५ बुँदे आचरसंहिता बनाउँदै लागू गरेका केसरीले भने बालबालिका नै यार्सा संकलनका लक्षित वर्ग हुने र उनीहरु नै बढी रोगको सिकार हुने भएकाले यासो गरिएको हो,’ केसरीले भने, ‘तर पनि सोचे जतिको रोक्न सकिएको छैन ।’ यो वर्ष मात्रै १० हजारभन्दा बढी बालबालिका जान सक्ने उनको ठम्याइ छ ।

प्रकाशित मिति: मंगलबार, जेठ १४, २०७६ ०४:३१